បេក្ខនារី ៣ នាក់ក្នុងចំណោម ៣០ រូបដែលមានសម្រស់ស្រស់ស្អាត នៅក្នុងការប្រកួតបវរកញ្ញាថៃឆ្នាំ ២០២០ បានរងរបួសស្រាល បន្ទាប់ពីស្ពានយោលមួយបានដាច់ដោយចៃដន្យ ខណៈពេលពួកគេកំពុងថតរូបដើម្បីផ្សព្វផ្សាយនៅឯហាងផេនពៅកាហ្វេ និងភោជនីយដ្ឋានមួយ នៅខេត្តឈៀងម៉ៃ កាលពីម្សិលមិញថ្ងៃទី៧ ខែធ្នូ ឆ្នាំ២០២០។
ឧប្បត្តិហេតុនេះបានកើតឡើងនៅម៉ោងប្រហែល ៣ រសៀល ក្នុងអំឡុងពេល៦ថ្ងៃជាប់ៗគ្នានៃវគ្គបណ្តុះបណ្តាល និងសកម្មភាពនៅខេត្តភាគខាងជើងនៃប្រទេសថៃ។ ស្ពានយោលតូចនេះដៃលសាងសង់ពីខ្សែពួរ និងដែក នៅច្រកចូលភោជនីយដ្ឋាន ហើយភ្លាមៗនោះវាស្រាប់តែបានដាច់ប្រាវតែម្តង ខណៈពេលដែលបេក្ខនារីចូលរួមប្រកួតទាំងអស់ កំពុងឈរនៅលើស្ពានដើម្បីថតរូប។
ម្នាក់ក្នុងចំនោមពួកគេបានរងរបួសជាំនៅលើថ្ងាសរបស់នាង រីឯ២នាក់ទៀតមុតនឹងដែករបួសតិចតួច។ ពួកគេត្រូវបានគេបញ្ជូនទៅមន្ទីរពេទ្យភ្លាមៗ ដើម្បីព្យាបាលរបួស ខណៈបេក្ខនារីពុំបានរងរបួស ដែលត្រូវបានឃើញសើចឱបគ្នាពីហេតុការណ៍នេះ ត្រូវបានអនុញ្ញាតឲ្យសម្រាកដើម្បីសម្រួលខ្លួនបន្តិចសិន មុនពេលដំណើរការវគ្គបណ្តុះបណ្តាលផ្សេងទៀត។
លោកវេជ្ជបណ្ឌិត Adisorn Suddee ប្រធានរៀបចំការប្រកួតបវរកញ្ញាថៃឆ្នាំ ២០២០ បានបញ្ជាក់បន្ទាប់ពីឧប្បត្តិហេតុនេះថា ស្ពាននេះអាចនឹងដាច់ដោយសារតែមិនអាចទ្រទម្ងន់បាន ដែលជាហេតុបណ្តាលឱ្យពួកគេធ្លាក់ចូលទៅក្នុងទឹកជម្រៅជាងកន្លះម៉ែត្រខាងក្រោម។
លោកបានបន្ថែមថា “យើងមិនរំពឹងថាស្ពាននេះនឹងបាក់ទេ។ តែយ៉ាងណា ទន្ទឹមនឹងនេះការប្រលងនិងវគ្គបណ្តុះបណ្តាលនឹងបន្តរហូតដល់ថ្ងៃទី១៣ ខែធ្នូ ហើយយើងនឹងយកចិត្តទុកដាក់បំផុតចំពោះបេក្ខជនដែលរងរបួសគ្រប់វគ្គទាំងអស់”។
លោក Worapot Chatkanjana ជាម្ចាស់ហាងកាហ្វេ និងភោជនីយដ្ឋាន Pang Pao Beach បានប្រាប់សារព័ត៌មានថា ភោជនីយដ្ឋានទើបតែបើកដំណើរការកាលពីថ្ងៃទី២ ធ្នូ ប៉ុណ្ណោះ ដោយមានភ្ញៀវទេសចរជាច្រើនបានចូលមកទស្សនា។ ទោះយ៉ាងណាស្ពាននេះអាចទ្រទ្រង់តែទំងន់សរុប ២៥ នាក់ប៉ុណ្ណោះ ដែលជាហេតុធ្វើអោយស្ពាននេះបាក់រលំជាយថាហេតុ។
ម្ចាស់ហាងខាងលើបន្តថាថា “ហាង និងភោជនីយដ្ឋាន Pang Pao សុខចិត្តទទួលខុសត្រូវវអ្វីដែលបានកើតឡើង និងចំណាយលើការព្យាបាលសំរាប់បេក្ខនារីដែលរងរបួសផងដែរ។ យើងក៏នឹងពង្រឹងស្ថេរភាពស្ពាន ក៏ដូចជាវិធានការណ៍សុវត្ថិភាព ដើម្បីការពារកុំអោយកើតមានឧប្បត្តិហេតុបែបនេះម្តងទៀតនាពេលអនាគត”៕ រក្សាសិទ្ធិដោយ៖ លឹម ហុង