ភ្នំពេញ៖ អូស្ដ្រាលី និងកម្ពុជា បានប្រកាសផ្សព្វផ្សាយ និងដាក់ឱ្យអនុវត្តផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ-១៩ នៅកម្ពុជា (Cambodia COVID-19 Development Response Plan) នាថ្ងៃពុធ ទី៩ ខែធ្នូ ឆ្នាំ២០២០។ ក្នុងស្មារតីភាពជាដៃគូ រដ្ឋាភិបាលអូស្ដ្រាលី ដោយសហការជាមួយរាជរដ្ឋាភិបាលកម្ពុជា តាមរយៈកិច្ចពិគ្រោះយោបល់ជាបន្ដបន្ទាប់ បានរៀបចំផែនការនេះដែលមានសុពលភាពរហូតដល់ខែមិថុនា ឆ្នាំ២០២២ ដើម្បីតម្រង់ទិសការគាំទ្ររបស់អូស្ដ្រាលី សម្រាប់ស្ដារសេដ្ឋកិច្ច-សង្គមកម្ពុជា ពីវិបត្តិជំងឺកូវីដ-១៩ ។
ផែនការនេះបានកំណត់អំពីការគាំទ្ររបស់អូស្ដ្រាលីសម្រាប់ការស្ដារកម្ពុជា តាមរយៈសសរស្តម្ភ ៣ គឺ៖ ការធានាសនិ្ដសុខផ្នែកសុខាភិបាល, សិ្ថរភាពសង្គមនិងបរិយាប័ន្ន និងការស្ដារសេដ្ឋកិច្ច ។
បើតាមសេចក្តីប្រកាសព័ត៌មានរួម រវាងស្ថានទូតអូស្ត្រាលីប្រចាំនៅព្រះរាជាណាចក្រកម្ពុជា និងក្រុមប្រឹក្សាអភិវឌ្ឍន៍កម្ពុជា ស្តីពីការប្រកាសផ្សព្វផ្សាយ និងដាក់ឱ្យអនុវត្តផែនការអភិវឌ្ឍន៍សម្រាប់ការឆ្លើយតបនឹងជំងឺកូវីដ-១៩។
ឯកឧត្តម ជាប្លូ កាង ឯកអគ្គរាជទូតអូស្ត្រាលីប្រចាំនៅព្រះរាជាណាចក្រកម្ពុជា បានមានប្រសាសន៍ថា រដ្ឋាភិបាលអូស្ត្រាលីនឹងវិនិយោគលើចង្កោមសកម្មភាពនៃសសរស្តម្ភទាំង ៣ ដើម្បីស្តារសេដ្ឋកិច្ច និងសង្គមកម្ពុជា ពីវិបត្តិជំងឺកូវី២១៩ ។ ចង្កោមសកម្មភាពទាំងនោះរួមមាន៖ ការធ្វើឱ្យប្រសើរឡើងគុណភាព និងភាពងាយស្រួល ក្នុងការទទួលបានសេវាសុខភាពតាមមន្ទីរពេទ្យ , ការលើកកម្ពស់យេនឌ័រ និងពិការភាព និងពិការភាព , ការជំរុញផលិតកម្មស្បៀង , ការគាំទ្រដល់ការផ្លាស់ប្តូរប្រភពថាមពល និងការចូលរួមរបស់ប្រជាពលរដ្ឋជាមួយអាជ្ញាធរមូលដ្ឋាន ដើម្បីឆ្លើយតប នឹងជំងឺកូវីដ -១៩ ។
ដើម្បីអនុវត្តផែនការនេះ អូស្ត្រាលីគ្រោងផ្តល់ហិរញ្ញប្បទានឥតសំណងប្រមាណ ៨៥ លានដុល្លារអាមេរិក ដល់កម្ពុជា ដែលជាផ្នែកមួយនៃកម្មវិធីសហប្រតិបត្តិការទ្វេភាគីដែលកំពុងអនុវត្ត ។ ហិរញ្ញប្បទាននេះ ជាការផ្តល់បន្ថែមលើហិរញ្ញប្បទានប្រមាណ ១៧០ លានដុល្លារអាមេរិក ដែលឯកឧត្តម Scott Morrison នាយករដ្ឋមន្ត្រី អូស្ត្រាលី បានប្រកាសគាំទ្រដល់ការធ្វើសមាហរណកម្មសេដ្ឋកិច្ច និងការអភិវឌ្ឍរបស់បណ្តាប្រទេសក្នុងតំបន់ ទន្លេមេគង្គ និងហិរញ្ញប្បទានប្រមាណ ៤៤៥ លានដុល្លារអាមេរិក ដែលអូស្ត្រាលីបានប្តេជ្ញាផ្តល់សម្រាប់ការ ចែកចាយវ៉ាក់សាំងជំងឺកូវី៥-១៩ ក្នុងតំបន់អាស៊ីអាគ្នេយ៍ និងប៉ាស៊ីហ្វិក ។
ឯកយុត្ដម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងអគ្គលេខាធិការគណៈកម្មាធិការ និតិសម្បទា និងអភិវឌ្ឍន៍កម្ពុជា បានលើកឡើងថា រាជរដ្ឋាភិបាលកម្ពុជា បានវាយតម្លៃខ្ពស់ចំពោះគោលដៅចម្បង នៃផែនការនេះ ក្នុងការជួយការពារប្រជាជនកម្ពុជា ដែលរងផលប៉ះពាល់ពីជំងឺកូវីដ-១៩ និងគាំទ្រការស្តារសេដ្ឋកិច្ច និងសង្គមកម្ពុជា ឆ្ពោះទៅកាន់ឋានៈជាប្រទេសមានចំណូលមធ្យម ប្រកបដោយភាពធន់នឹងវិបត្តិ និងបរិយាប័ន្ន ។ ក្នុងពិធីនេះ ឯកឧត្តមរដ្ឋមន្ត្រី និងឯកឧត្តមឯកអគ្គរាជទូត បានចុះហត្ថលេខាលើសេចក្តីថ្លែងការណ៍រួម ដើម្បីធានាប្រសិទ្ធភាព នៃការអនុវត្តផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ-១៩ នៅកម្ពុជា ។ ឯកឧត្តម ឈៀង យ៉ាណារ៉ា បានបញ្ជាក់បន្ថែមថា អូស្ត្រាលី គឺជាដៃគូអភិវឌ្ឍន៍បុរេសកម្មមួយ ដែលបានចាត់វិធានការតាំងពីដើមដំបូង ក្នុងការរៀបចំផែនការអភិវឌ្ឍន៍ សម្រាប់ឆ្លើយតបនឹងជំងឺកូវីដ-១៩ នេះ ។ ផែនការនេះបានបញ្ជាក់ ពីកិច្ចសហការដ៏សំខាន់ក្នុងភាពជាដៃគូសម្រាប់ការអភិវឌ្ឍ រវាងរាជរដ្ឋាភិបាលកម្ពុជា និងរដ្ឋាភិបាលអូស្ត្រាលី ។ រាជរដ្ឋាភិបាលកម្ពុជា បានវាយតម្លៃខ្ពស់ចំពោះផែនការនេះ ពិសេសសកម្មភាពអាទិភាព ដែលផ្តោតលើវិស័យសំខាន់ទាំង ៣ ដែលមានសង្គតិភាពជាមួយនឹងផែនការរបស់រាជរដ្ឋាភិបាល ក្នុងការស្តារសេដ្ឋកិច្ច និងសង្គម កម្ពុជា ក្រោយវិបត្តិជំងឺកូវីដ-១៩ ។ ចុងបញ្ចប់ ឯកឧត្តមឯកអគ្គរដ្ឋទូតអូស្ត្រាលី បានមានប្រសាសន៍ថា អគារដ៏មានតេជរិទ្ធិនៃក្រុមប្រឹក្សាអភិវឌ្ឍន៍កម្ពុជា ដែលយើងបានប្រកាសផ្សព្វផ្សាយ និងដាក់ឱ្យអនុវត្តផែនការនេះ គឺជាអតិតទីស្នាក់ការកណ្តាល របស់អាជ្ញាធរបណ្តោះអាសន្ន របស់អង្គការសហប្រជាជាតិនៅកម្ពុជា (UNTAC) ។ ដោយអូស្ត្រាលីបានបំពេញ តួនាទីចម្បងក្នុងកិច្ចដំណើរការឆ្ពោះទៅរកសន្តិភាពនៅកម្ពុជា ហើយបច្ចុប្បន្នអូស្ត្រាលីកំពុងបន្តតួនាទីសំខាន់ក្នុង ការផ្តល់ការគាំទ្រដល់កម្ពុជា សម្រាប់ស្តារសេដ្ឋកិច្ច និងសង្គម ដែលទទួលរងផលប៉ះពាល់ ពីជំងឺកូវីដ១៩ ៕រក្សាសិទ្ធិដោយ៖បញ្ញាស័ក្តិ