ស្ត្រីចំណាស់ម្នាក់ បានធ្វើឲ្យអ្នកឡើងផ្សារមានការហួសចិត្ត និងគួរឲ្យស្អប់ជាខ្លាំង ក្រោយស្ត្រីរូបនេះស្រាប់តែបានដោះស្បែកជើងដេញវាយ និងស្រែកជេរសន្តិសុខផ្អើលពេញផ្សារច្បារអំពៅ កាលពីព្រឹកថ្ងៃទី៩ ខែធ្នូ ឆ្នាំ២០២ នេះ ដោយសារផ្ទុះកំហឹងនឹងសន្តិសុខបានយកម៉ាសឲ្យគាត់ពាក់ មុនពេលដើរចូលផ្សារ ដើម្បីចូលរួមការពារការឆ្លងរីករាលជំងឺកូវីដ។
ជុំវិញករណីដ៏ហួសចិត្តនេះផងដែរ លោក សាន់ ប៊ុនណា ប្រធានគ្រប់គ្រងផ្សារបន្លែច្បារអំពៅ បានថ្លែងប្រាប់អ្នកសារព័ត៌មានឲ្យដឹងថា ស្ត្រីវ័យចំណាស់ខាងលើ បានដើរចូលមកផ្សារ ដើម្បីទិញបន្លែ ក្នុងស្ថានភាពកន្សែងឃ្មុំក្បាល ប៉ុន្តែ ពុំបានពាក់ម៉ាសការពារនោះទេ។ ដោយឃើញបែបនេះ សន្តិសុខក៏បានយកម៉ាសឲ្យគាត់ពាក់ ស្រាប់តែស្ត្រីរូបនេះបានផ្ទុះកំហឹង ដោះស្បែកជើងគំរាមវាយសន្តិសុខ និងថែមទាំងជេរក្រុមសន្តិសុខទាំងហួសចិត្តបែបនេះថា៖ «ពួកហ្អែងមើលងាយអ្នកក្រ»។
ទោះយ៉ាងណា នៅទីបំផុត ស្ត្រីរូបនេះត្រូវបានដេញចេញពីផ្សារទៅវិញផងដែរ ព្រោះថាមិនអាចឲ្យនៅបន្តអាងចាងធ្វើព្យុះធ្វើភ្លៀង នាំឲ្យរំខានអារម្មណ៍អ្នកដើរផ្សារ និងប៉ះពាល់ដល់ការលក់ដូររបស់អាជីវករ។
លោក សាន់ ប៊ុនណា ក៏បានបញ្ជាក់ថា ប្រសិនអ្នកណាមិនពាក់ម៉ាសនៅក្នុងដំណាក់កាលនេះទេ គឺដាច់ខាតមិនឲ្យចូលផ្សារឡើយ ព្រោះខ្លាចឆ្លងចំងឺកូវីដដល់គេឯងគ្រប់គ្នាដែលកំពុងអនុវត្តត្រឹមត្រូវ៕ រក្សាសិទ្ធិដោយ៖ លឹម ហុង
