យោងតាមសមត្ថកិច្ចថៃបានឲ្យដឹងថា ជនសង្ស័យ៥នាក់ ក្នុងនោះមានឈ្មោះ Sombun, Suchat, Wanchai, Woraping និងបុរសជនជាតិម៉ាឡេស៊ីដើមកំណើតចិនម្នាក់ផងដែរ ត្រូវបានចាប់ខ្លួន ក្រោយបានធ្វើសកម្មភាពចាប់ជំរិតបុរសជាអ្នកជំនួញជនជាតិចិនម្នាក់ ទាមទារប្រាក់លោះចំនួន ១៥ លានបាត (ស្មើជិត ៥ សែនដុល្លារ)។
អគ្គស្នងការរងនគរបាលជាតិថៃ លោកឧត្តមសេនីយ៍ទោ Pakpong Pongpetra បានថ្លែងប្រាប់ឲ្យដឹងថា ក្រុមជនសង្ស័យចាប់ជំរិតខាងលើ បានទាមទារប្រាក់លោះពីជនរងគ្រោះឈ្មោះ Lucas (អ្នកជំនួញជនជាតិចិន) នូវទឹកប្រាក់ចំនួន ១៥ លានបាត ដើម្បីជាថ្នូរនៃការដោះលេង។ លោកបន្តថា ប៉ូលិសក៏បានរកឃើញភស្តុតាងក្នុងនោះរួមមាន៖ រថយន្តម៉ាក Mitsubishi ពណ៌ស១គ្រឿង, កាត ATM, សៀវភៅធនាគារ និងទូរស័ព្ទតម្លៃ ៥ សែនបាត។
លោក Pakpong ក៏បានបញ្ជាក់ឲ្យដឹងថា ការឈានចាប់ខ្លួនជនសង្ស័យ គឺបន្ទាប់ទទួលបានព័ត៌មានពីឈ្មោះ Kriangkrai Jaikum ដែលជាមិត្តភក្តិរបស់ជនរងគ្រោះ កាលពីថ្ងៃទី៤ ខែធ្នូ ឆ្នាំ២០២០ ប្រាប់ថា Lucas ត្រូវបានគេចាប់ជំរិតចេញពី Sukhumvit 39 នៅថ្ងៃទី៤ ហើយជនសង្ស័យបានទាមទារប្រាក់ចំនួន ១៥ លានបាត ដើម្បី Lucas អាចមានជីវិត។
ការស៊ើបអង្កេតរបស់សមត្ថកិច្ច បានបញ្ចេញថា Lucas ត្រូវបានគេចាប់បញ្ចូលទៅក្នុងរថយន្ត១គ្រឿង ដែលផ្លាកលេខត្រូវបានបិទបាំងដោយក្រដាស។ បន្ទាប់មក ប៉ូលិសបានធ្វើការតាមដានរថយន្តនោះ ហើយរកឃើញវាកំពុងត្រូវបានថតនៅក្នុងរមណីយដ្ឋានមួយកន្លែងនៅក្នុងខេត្ត Suphan Buri ចម្ងាយប្រមាណ ១០០ គីឡូម៉ែត្រ ពីទីក្រុងបាងកក។ ហើយនៅពេលនោះផងដែរ ប៉ូលិសក៏បានធ្វើការឡោមព័ទ្ធ និងឆែកឆេរទីកន្លែងនោះ ដែលជនរងគ្រោះ Lucas ត្រូវបានរកឃើញ និងជួយសង្គ្រោះ។
ជនសង្ស័យបានឆ្លើយសារភាព ចំពោះការចោទប្រកាន់ទាំងអស់ ដោយអះអាងថា Lucas ជាម្ចាស់ស្ប៉ាជាច្រើនកន្លែងនៅក្នុងទីក្រុងបាងកក។ Lucas បានជួលម្នាក់ក្នុងចំណោមពួកគេឈ្មោះ Suchat សម្រាប់ការរចនាខាងក្នុងនៅស្ប៉ា។ Lucas បានបំបែកកិច្ចសន្យារបស់ពួកគេ ដែលធ្វើឲ្យពួកគេខាតបង់ទឹកប្រាក់ជាង ៤០ ម៉ឺនបាត ដែលជាហេតុធ្វើឲ្យពួកគេមិនសប្បាយចិត្ត។ ដោយឡែកជនសង្ស័យជាជនជាតិម៉ាឡេស៊ីដើមកំណើតចិន ដែលជាមគ្គុទ្ទេសក៍ បានអះអាងថា Lucas បានយកលុយជាង ១០ លានបាត ពីខ្លួន ហេតុនេះ ពួកគេក៏រួមផែនការចាប់ជំរិត និងទាមទារប្រាក់លោះបែបនេះតែម្តងទៅ។
តែយ៉ាងណា ប៉ូលិសបានបង្ហាញថា ពួកគេកំពុងបន្តស្វែងរកចាប់ខ្លួនជនសង្ស័យ ២នាក់ទៀត ដែលជាប់ពាក់ព័ន្ធនឹងបទឧក្រិដ្ឋនេះ។ ពួកគេទាំង២គឺជាជនជាតិភូមា ដែលត្រូវបានគេជួលឲ្យចាប់ជំរិត Lucas នៅថ្ងៃទី៤។ ជនសង្ស័យបានដកហូតលុយចំនួនជាង ១ លានបាត ពីកាត ATM របស់ជនរងគ្រោះផងដែរ។ ពួកគេបានប្រើប្រាស់លុយទាំងនេះដើម្បីទិញខ្សែកមាស២០បាត, MacBook ១, Speaker ជាច្រើនគ្រឿង និងនៅសេសសល់ប៉ុន្មានចែកគ្នា៕ រក្សាសិទ្ធិដោយ៖ លឹម ហុង
