ភ្នំពេញ៖ រដ្ឋបាលខណ្ឌសែនសុខ បានពិនិត្យឃើញថា កាលពីរសៀលថ្ងៃទី៩ ខែធ្នូ ឆ្នាំ២០២០ មានការបង្ហោះ និងចែករំលែកលើបណ្តាញទំនាក់ទំនងសង្គមហ្វេសប៊ុក នូវខ្លឹមសារវីដេអូ ដែលមានបុរសម្នាក់ បានបោះចោលមិនទទួលយកម៉ាសពីក្រុមការងាររបស់សង្កាត់ភ្នំពេញថ្មី ដែលចុះផ្សព្វផ្សាយ និងចែកម៉ាសដោយឥតគិតថ្លៃដល់ប្រជាពលរដ្ឋ និងអាជីវករលក់ដូរក្នុងផ្សារដីហុយ។
ក្រោយពីទទួលបានព័ត៌មានខាងលើ រដ្ឋបាលខណ្ឌបានចាត់វិធានការស្វែងរកបុរសនៅក្នុងវីដេអូ ដើម្បីអញ្ជើញមកធ្វើការអប់រំ។ នៅថ្ងៃទី១០ ខែធ្នូ ឆ្នាំ២០២០ នេះ រដ្ឋបាលខណ្ឌសែនសុខ បានអញ្ជើញបុរសឈ្មោះ រនី សាគី អាយុ ៣៩ឆ្នាំ មានទីលំនៅភូមិច្រាំងចំរេះទី៨ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ មកធ្វើការអប់រំណែនាំអំពីវិធានការទប់ស្កាត់ការរីករាលដាលនៃជំងឺកូវីដ១៩ របស់ក្រសួងសុខាភិបាល ក្រោយបោះចោលមិនទទួលយកម៉ាសពីក្រុមការងារសង្កាត់ភ្នំពេញថ្មី ដែលចុះផ្សព្វផ្សាយពីវិធានការការពារ ទប់ស្កាត់ជំងឺកូវីដ-១៩ ក្រោយព្រឹត្តិការណ៍ «សហគមន៍ ២៨ វិច្ឆិកា» តាមការណែនាំរបស់ក្រសួងសុខាភិបាល។
ឈ្មោះរនី សាគី បានទទួលស្គាល់នូវកំហុសរបស់ខ្លួន ធ្វើការសុំទោសជាសាធារណៈ សន្យាមិនឱ្យមានកំហុសនេះ កើតឡើងជាថ្មីទៀតនោះទេ និងចូលរួមអនុវត្តវិធានការទប់ស្កាត់ជំងឺកូវីដ-១៩ របស់ក្រសួងសុខាភិបាលឱ្យបានខ្ជាប់ខ្ជួន។
ជាមួយគ្នានេះដែរ រដ្ឋបាលខណ្ឌសែនសុខ សូមធ្វើការអំពាវនាវ ដល់សាធារណជន បន្តអនុវត្តឱ្យបានហ្មត់ចត់ នូវវិធានការទប់ស្កាត់ជំងឺកូវីដ-១៩ របស់ក្រសួងសុខាភិបាល ដោយត្រូវពាក់ម៉ាស រក្សាគម្លាត១,៥ម៉ែត្រ និងលាងដៃដោយអាល់កុល ឬដែលសម្លាប់មេរោគ៕រក្សាសិទ្ធិដោយ៖បញ្ញាស័ក្តិ
