បាត់ដំបង ៖ អាជ្ញាធរស្រុកឯកភ្នំ បានធ្វើការស្ដារបឹងតាគម មានអាយុកាលប្រមាណមួយពាន់ឆ្នាំមានទីតាំងនៅក្បែរប្រាសាទឯកភ្នំដែលមានសភាពគោករាក់ មិនអាចស្តុកទឹកបានច្រើនសម្រាប់ពលរដ្ឋប្រើប្រាស់និងរៀបចំឲ្យក្លាយទៅជារមណីយដ្ឋានទេសចរណ៍។
លោក ម៉ឹល សុផល អភិបាលស្រុកឯកភ្នំ បានមានប្រសាសន៍ប្រាប់ឲ្យដឹងថាបន្ទាប់ពីមានការអនុញ្ញាតពីក្រសួងវប្បធម៌និងវិចិត្រសិល្បៈ បឹងតាគមដែលមានទីតាំងស្ថិតក្នុងភូមិតាគមឃុំពាមឯកស្រុកឯកភ្នំខេត្តបាត់ដំបង ត្រូវបានចាប់ផ្ដើមស្ដារនៅអំឡុងខែមិថុនាឆ្នាំ២០២០ រហូតមកដល់បច្ចុប្បន្នសម្រេច បានប្រមាណជាង៧០ភាគរយ។ ការស្ដារឡើងវិញនូវបឹងនេះ ដើម្បីឆ្លើយតបទៅនឹងសំណូមពររបស់ពលរដ្ឋក្នុងតំបន់នោះ ដែលបានផ្ដិតមេដៃចំនួនជាង ២០០គ្រួសារ ស្នើអាជ្ញាធរស្រុកនិងខេត្តឲ្យជួយស្ដារ ដើម្បីពួកគាត់អាចនាំយកទឹកពីបឹងនេះ ទៅស្រោចស្រពដំណាំកសិកម្មផ្សេងៗ និងសម្រាប់ប្រើប្រាស់ប្រចាំថ្ងៃ។ ការស្ដារបឹងតាគមនេះ មិនបានប្រើប្រាស់ថវិការបស់សាលាស្រុកនោះទេ ខាងក្រុមហ៊ុនកាយដីជួយស្ដារ ប៉ុន្តែអាចម៍ដី ត្រូវឲ្យទៅខាងក្រុមហ៊ុន។ លោកបានបញ្ជាក់និងច្រានចោលនូវសារព័ត៌មានមួយចំនួន ដែលផ្សព្វផ្សាយព័តមានចោទប្រកាន់ថាលោកយកអាចម៍ដីនេះ ទៅលក់សម្រាប់ប្រយោជន៍ផ្ទាល់ខ្លួន ។ បឹងតាគម មានផ្ទៃដីទំហំ១០ហិកតា ប៉ុន្តែស្ដារត្រឹម៧ហិកតា ជម្រៅ៦ម៉ែត្រ ដោយ៣ហិកតាទៀត ត្រូវបានចាក់ដីសម្រាប់ធ្វើបរិវេណជុំវិញ ឲ្យបានស្អាត ដើម្បីដាំដើមឈើផ្សេងៗ។
អំឡុងគ្រឿងចក្រកាយស្ដារបឹងតាគម បានប្រទះឃើញនូវឆ្អឹងសត្វក្របីដ៏ធំ ត្រូវបានអាជ្ញាធរស្រុកកប់វិញនៅកណ្ដាលបឹង និងគម្រោងធ្វើស្ពាននាគ ពីមាត់បឹងឆ្ពោះទៅផ្នូរសត្វក្របីនេះផងដែរ។អាជ្ញាធរស្រុកឯកភ្នំ ក្រៅពីស្ដារបឹងតាគម បានស្ដាររួចរាល់ផងដែរនូវស្រះទឹករលួសដែលស្ថិតក្នុងភូមិឃុំជាមួយគ្នានេះ។
គួរបញ្ជាក់ថាសម្រាប់ស្រុកឯកភ្នំនេះ រាជរដ្ឋាភិបាល តាមរយៈក្រសួងធនធានទឹកនិងឧតុនិយម កំពុងសាងសង់នូវទំនប់ស្ទាក់ទឹកសាលាតាអនស្ថិតក្នុងឃុំព្រែកនរិន្ទ ដែលសម្រេចជាង៧០ភាគរយ។ក្នុងស្រុកឯកភ្នំមួយនេះ ក៏សម្បូរផងដែរនូវតំបន់ទេសចរណ៍បែបប្រវត្តិសាស្ត្រ មានប្រាសាទបុរាណ វត្តបុរាណ រួមទាំងកន្លែងទេសចរណ៍ដ៏ទាក់ទាញជាច្រើនទៀត៕ រក្សាសិទ្ធិ ដោយ៖អ៊ុងសារុំ
