បន្ទាយមានជ័យ ៖ ក្រោយពេលទទួលបានបណ្ដឹងរបស់ប្រពន្ធ កម្លាំងជំនាញព្រហ្មទណ្ឌ និងកម្លាំងប៉ុស្តិ៍ប៉ោយចារ បានចុះបង្ក្រាប ធ្វើការនាំខ្លួនបុរសជាប្តីមកកាន់អធិការដ្ឋាននគរបាលស្រុកភ្នំស្រុក ដើម្បីធ្វើការសាកសួរ បន្ទាប់ពីបុរសប្រមឹកផឹកស្រាស្រវឹងម្នាក់នេះ តែងតែបង្ករករឿងឈ្លោះក្នុងគ្រួសារ បានខឹងប្រពន្ធ បានទាញកាំបិតខ្វែវ ដេញកាប់ប្រពន្ធ តែត្រូវប្រពន្ធដឹងខ្លួនទាន់ក៏រត់គេចផុតរួចខ្លួន តែត្រូវបុរសជាប្តី ដុតផ្ទះចោល កាលពីវេលា១១និង៣០នាទីព្រឹង ថ្ងៃទី១០ ខែធ្នូ ឆ្នាំ២០២០ នៅភូមិព្រះអណ្តូង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។
លោកវរសេនីយ៍ឯក យ៉ត សុផល អធិការនគរបាលស្រុកភ្នំស្រុក បានឲ្យដឹងថា តាមបណ្តឹងពីឈ្មោះព្រឹម បួត ភេទស្រី អាយុ៤៨ឆ្នាំ នៅភូមិព្រះអណ្តូង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យថា ឈ្មោះវ៉ាន វ៉ោន ភេទប្រុស អាយុ៥០ឆ្នាំ ត្រូវជាប្ដីរបស់គាត់ មកពីដើរផឹកស្រាស្រវឹង ហើយបង្ករករឿងក្នុងគ្រួសារ និងបានឈ្លោះប្រកែកគ្នាជាមួយនឹងគាត់ រហូតឈានដល់ការប្រតាយប្រតប់គ្នា នៅពេលនោះ ប្តីប្រមឹក បានទាញកាំបិតខ្វែវដេញកាប់ តែគាត់រត់គេចខ្លួន។ ដោយមិនអស់ចិត្ត ប្តីប្រមឹករូបនេះ បានវាយបំបែកពាងទឹក វាយចាន ឆ្នាំង និងដុតផ្ទះបាយបណ្តាឲ្យខូចខាតអស់៨០% និងដុតផ្ទះបាយ ឆេះរបស់របរ ខោ អាវ ចាន ឆ្នាំង ធុងចម្រោះទឹក និងសម្ភារមួយចំនួនទៀត។ម្យ៉ាងវិញទៀតប្តីប្រមឹកនេះ គឺផឹកស្រាស្រវឹងជាប្រចាំ ហើយប្រច័ណ្ឌគាត់ ពេលគាត់ទៅដើររើសគួរស្រូវយកមកបុកអង្ករដាំបាយហូប បែរចោទថាគាត់លួចទៅមានប្រុសសហាយ។
លោកអធិការបានបញ្ជាក់ថា ៖ ក្រោយពេលទទួលបានបណ្ដឹងកម្លាំងជំនាញព្រហ្មទណ្ឌ និងកម្លាំងប៉ុស្តិ៍ប៉ោយចារ បានចុះបង្ក្រាប ធ្វើការនាំខ្លួនជនបង្កខាងលើមកកាន់អធិការដ្ឋាននគរបាលស្រុកភ្នំស្រុក ដើម្បីធ្វើការសាកសួរ។ នៅចំពោះមុខសមត្ថកិច្ច ជនបង្កបានសារភាពថា ខ្លួនពិតជាបានដេញនិងដុតផ្ទះបាយចោលមែន ។
ដោយផ្អែកលើចម្លើយសារភាពនិងបណ្តឹង ព្រមទាំងសំណូមពរ ជនរងគ្រោះជាប្រពន្ធ សុំឲ្យសមត្ថកិច្ចចាត់ការប្តីកំណាចនេះ តាមវិធានការច្បាប់។ ជនបង្កឈ្មោះវ៉ាន វ៉ោន ត្រូវកម្លាំងនគរបាលជំនាញព្រហ្មទណ្ឌ រៀបចំសំណុំរឿង បញ្ជូនខ្លួនទៅស្នងការដ្ឋាន ដើម្បីចាត់ការបន្ត៕ រក្សាសិទ្ធិដោយ៖បញ្ញាស័ក្តិ