តាមការចោទប្រកាន់ទាហានពិសេសរបស់អូស្ត្រាលី បានប្រព្រឹត្តអំពើឃាតកម្មលើមនុស្ស៣៩នាក់ នៅក្នុងប្រទេសអាហ្វហ្គានីស្ថាន ហើយទាហានពិសេសបច្ចុប្បន្ន ឬអតីតចំនួន ១៩ នាក់ នឹងត្រូវប្រឈមនឹងការកាត់ទោសពីបទឧក្រិដ្ឋកម្មសង្គ្រាម និង ត្រូវដកហូតមេដាយរបស់ពួកគេ បន្ទាប់ពីលទ្ធផលនៃការស៊ើបអង្កេត ផ្នែកការពារជាតិបានបង្ហាញឱ្យឃើញពីវប្បធម៌ នៃការលាក់បាំង និងការបោកបញ្ឆោតរបស់ទាហានពិសេសនេះ។
កងអនុសេនាធំទី ២ នៃកងវរសេនាធំជើងអាកាសពិសេស នឹងត្រូវរំសាយចោល បន្ទាប់ពីការរកឃើញអំពីវប្បធម៌ “វីរបុរសចម្បាំង” ដែលជាបច្ច័យរួមចំណែកដល់ការប្រព្រឹត្តបទឧក្រិដ្ឋ រួមទាំងការសម្លាប់មនុស្សដោយខុសច្បាប់។
សំណងនឹងត្រូវបង់ជូនក្រុមគ្រួសារអាហ្វហ្គានីស្ថាន ដែលមនុស្សជាទីស្រឡាញ់ របស់ពួកគេ ត្រូវបានសម្លាប់ដោយទាហានពិសេសអូស្ត្រាលី។ ភាគច្រើន នៃករណីឃាតកម្មនេះ គឺពាក់ព័ន្ធនឹងអ្នកទោស ដែលត្រូវបានចាប់ខ្លួន ឬរងរបួស។ អ្នកខ្លះត្រូវបានវាយខ្នោះដៃ ហើយបន្ទាប់មកត្រូវបាញ់សម្លាប់ចោល។
ការស្តីបន្ទោសភាគច្រើនត្រូវបានដាក់ទៅលើក្រុមមន្ត្រីយោធា ដែលគ្មានបេសកកម្មរបស់យោធាពិសេសអូស្ត្រាលីដែលទាមទារឱ្យទាហានក្មេងៗ “ចេះមានបាតដៃប្រឡាក់ឈាមឱ្យហើយ” តាមរយៈការបាញ់សម្លាប់អ្នកទោសដែលគ្មានអាវុធ ហើយបន្ទាប់មកកប់អាវុធ ដើម្បីបិទបាំងឧក្រិដ្ឋកម្មទាំងនោះ ខណៈធ្វើរបាយការណ៍ក្លែងក្លាយ អំពីអ្វីដែលបានកើតឡើង។
មុននេះសារព័ត៌មាន The Age និង The Sydney Morning Herald បានរាយការណ៍កាលពីខែវិច្ឆិកាថា ចំណុចសំខាន់នៃការស៊ើបអង្កេត គឺស៊ើបទៅលើវីរបុរសសង្គ្រាម និងអ្នកទទួលមេដាយ Victoria Cross លោក បិន រ៉ូបឺតស្មីត (Ben Roberts-Smith) ។
លោករ៉ូបឺតស្មីត ដែលបច្ចុប្បន្នជានាយកប្រតិបត្តិទូរទស្សន៍ប៉ុស្តិ៍លេខ៧ ក្នុងទីក្រុងប្រ៊ីសបេន បានបដិសេធរាល់ការប្រព្រឹត្តខុសណាមួយ ហើយចៅហ្វាយជាមហាសេដ្ឋីប្រព័ន្ធផ្សព្វផ្សាយ របស់លោក គឺលោក ឃើរី ស្តូក (Kerry Stokes) ជាប្រធានក្រុមហ៊ុន Seven West Media និងក្រុមហ៊ុន Australian War Memorial បានប្តេជ្ញាតាមរយៈអ្នកនាំពាក្យម្នាក់ កាលពីថ្ងៃព្រហស្បតិ៍ទី ១៩ វិច្ឆិកា ឆ្នាំ ២០២០ ដើម្បីជួយសមាជិក នៃកងទ័ពពិសេសអូស្ត្រាលីទាំងអស់ ដែលគេចោទប្រកាន់ពីបទឧក្រិដ្ឋកម្មសង្គ្រាម។
លោករ៉ូបឺតស្មីត បច្ចុប្បន្នកំពុងប្តឹងសារព័ត៌មាន Nine សារព័ត៌មាន TheAge និងកាសែត TheHerald ពីបទចុះផ្សាយអត្ថបទទាក់ទងនឹងសកម្មភាពរបស់គាត់ នៅអាហ្វហ្គានីស្ថាន ហើយលោកស្តូក បានឱ្យគាត់ខ្ចីប្រាក់ចំនួន ១,៩ លានដុល្លារ ដើម្បីទូទាត់ថ្លៃផ្លូវច្បាប់ ដើម្បីប្តឹងស្ថាប័នព័ត៌មានទាំងបី។
ឃាតកម្ម ដែលបានចោទប្រកាន់ខាងលើ គឺកើតឡើងតាំងពីឆ្នាំ ២០០៦ ប៉ុន្តែភាគច្រើនបានកើតឡើងនៅចន្លោះឆ្នាំ ២០១២ និងឆ្នាំ ២០១៣ ហើយតាមការចោទប្រកាន់ គឺប្រព្រឹត្តដោយទាហានពិសេសអូស្ត្រាលី មកពីមូលដ្ឋានទ័ពក្នុងទីក្រុងភឺត។
ការស៊ើបអង្កេតរយៈពេល ៤ ឆ្នាំ របស់ប្រធានតុលាការកំពូល របស់រដ្ឋញូវសៅវែល លោក ផូល ប្រេរីតុន បានរកឃើញថា មាន “ព័ត៌មានគួរឱ្យទុកចិត្តបាន” អំពីឧបទ្ទវហេតុចំនួន២៣ ក្នុងអំឡុងពេលដែលកងកម្លាំងពិសេសអូស្ត្រាលី បានចូលរួមក្នុងការធ្វើឃាត ទៅលើបុគ្គល ឬអ្នកប្រយុទ្ធម្នាក់ ឬច្រើននាក់ ដែលត្រូវបានចាប់ខ្លួន ឬរងរបួស។ ឧបទ្ទវហេតុចំនួន២ទៀត អាចត្រូវចាត់ថ្នាក់ជាឧក្រិដ្ឋកម្មសង្គ្រាមព្រោះតែ “ការប្រព្រឹត្តយ៉ាងសាហាវឃោរឃៅ”៕
ប្រភព ៖ The Ages.com.au
រក្សាសិទ្ធិដោយ៖CEN