ភ្នំពេញ៖ បុគ្គលដែលចូលចិត្តនិយាយបញ្ចើចបញ្ចើ អំពីស្ថានភាពផ្សេងៗ ក្នុងសង្គមឈ្មោះ នី ណាក់ ម្ចាស់ផេក «Iman KH» ដែលតែងបង្ហោះព័ត៌មានញុះញង់ និងបង្កចលាចលតាមបណ្ដាញសង្គម Facebook ត្រូវបានកម្លាំងនគរបាលចាប់ខ្លួន និងបញ្ជូនទៅកាន់តុលាការនៅរសៀលថ្ងៃទី១១ ខែធ្នូ ឆ្នាំ២០២០។
ការចាប់ខ្លួនបុគ្គលឈ្មោះ នី ណាក់ ធ្វើឡើងតាមដីកាបញ្ជាឲ្យចាប់ខ្លួនរបស់លោក ប្លង់ សុផល ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ដោយកម្លាំងនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ។
មន្ដ្រីនាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា បុគ្គលនេះត្រូវបានចាប់ខ្លួន តាមពាក្យបណ្តឹងរបស់ក្រសួងកសិកម្មពាក់ព័ន្ធការរិះគន់ និងបង្ហោះព័ត៌មានមិនពិត នាំឲ្យមានចលាចលនៅក្នុងសង្គម អំពីថា «ខ្ញុំបានត្រៀម ឬព្រាងលិខិត និងឯកសាររួចរាល់អស់ហើយ ក្នុងការស្នើដាក់ទ្រុងមាន់ របស់ខ្ញុំក្នុងភាពអាសន្ន ព្រោះមូលហេតុ មានមេរោគផ្តាសាយរលាកផ្លូវដង្ហើម កំពុងតែរាតត្បាតក្នុងកសិដ្ឋាន។ ខ្ញុំមិនចង់គិតដល់ចំណុចនេះទេ ព្រោះវាធ្វើឱ្យខូចខាតសេដ្ឋកិច្ចរបស់កូនមាន់យ៉ាងធ្ងន់ធ្ងរ ។ ខ្ញុំសង្ឃឹមថា កូនមាន់នឹងចេះពាក់ម៉ាស់គ្រប់គ្នា ហើយដេកនៅក្នុងទ្រុង កុំចេញក្រៅឱ្យសោះបើគ្មានការចាំបាច់»។
សំណេររបស់ឈ្មោះ នី ណាក់ នាពេលនេះ ត្រូវបានមជ្ឈដ្ឋានជាច្រើនកំពុងជជែកគ្នា និង អះអាងថា កំពុងឌឺដង ឬ ផ្គើន នឹងប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានមានប្រសាសន៍ទៅកាន់ប្រជាពលរដ្ឋឲ្យប្រកាន់ខ្ជាប់ ក្នុងការការពារ ពាក់ម៉ាស និងកុំចេញទៅក្រៅបើគ្មានការចាំបាច់។
គួរបញ្ជាក់ថា នេះមិនមែនជាលើកទី១នោះទេ ដែលបុគ្គលឈ្មោះ នី ណាក់ ម្ចាស់ផេក «Iman KH» តែងតែបង្ហោះសារមានលក្ខណៈញុះញង់ និងមាក់ងាយទៅលើរាជរដ្ឋាភិបាល ក្នុងចេតនាបង្កចលាចលនៅលើបណ្ដាញទំនាក់ទំនងសង្គម៕រក្សាសិទ្ធិដោយ៖CEN
