ភ្នំពេញ៖ជនល្មើសម្នាក់ ចាប់លោកយាយម្នាក់អាយុ៨១ឆ្នាំរំលោភសេពសន្ថវៈ នៅសង្កាត់អូបែកក្អមខណ្ឌសែនសុខ។ជនល្មើសម្នាក់ញៀនថ្នាំ មានវ័យ៣២ឆ្នាំម្នាក់ ត្រូវនគរបាលអូរបែកក្អមឃាត់ខ្លួន។ ដោយក្តីអាណិតអាសូរចំពោះលោកយាយកាលពីរសៀលថ្ងៃទី១១ ខែធ្នូ ឆ្នាំ២០២០នេះ ក្រុមការងារសង្កាត់អូរបែកក្អម បានអញ្ជើញទៅសាកសួរសុខទុក្ខ និងបាននាំយកថវិកា លោក ម៉ូវ ម៉ានិត អភិបាលខណ្ឌសែនសុខចំនួន៥០០.០០០រៀល ទឹកដោះគោឆៅ៤ឡូតិ៍ ជូនដល់លោកយាយ។
គួរបញ្ជាក់ថា កាលពីថ្ងៃទី៩ ខែធ្នូ ឆ្នាំ២០២០ វេលាម៉ោង១៩ និង៣០នាទី មានករណីរំលោភសេពសន្ថវៈលើជនរងគ្រោះម្នាក់អាយុ៨១ឆ្នាំ ឈ្មោះ ជ ផ ស ជាជនជាតិខ្មែរ មុខរបរនៅផ្ទះ ស្នាក់នៅបន្ទប់ជួលជិតគ្នា ផ្លូវបេតុង ភូមិស្លែងរលើង សង្កាត់អូរបែកក្អម ខណ្ឌសែនសុខ ។
ការឃាត់ខ្លួនជនល្មើសរូបនេះ កាលពីម៉ោង១២ថ្ងៃទី១០ ខែធ្នូ ឆ្នាំ២០២០ បន្ទាប់ពីក្រុមគ្រួសារ បានប្តឹងនគរបាលប៉ុស្តិ៍អូរបែកក្អម។ ជនសង្ស័យរូបនោះ ឈ្មោះ ជា ប៊ុនធឿន អាយុ៣២ឆ្នាំ ស្នាក់នៅបន្ទប់ជួល ផ្លូវបេតុង ភូមិស្លែងរលើង សង្កាត់អូរបែកក្អម ខណ្ឌសែនសុខ មានសារធាតុញៀន។
នៅមុនកើតហេតុ កាលពីថ្ងៃទី៩ ខែធ្នូ ឆ្នាំ២០២០ វេលាម៉ោង ៧និង៣០នាទីយប់ ជនសង្ស័យស្ថិតនៅក្នុងស្ថានភាពស្រវឹងស្រាដេកក្នុងបន្ទប់ជួល ហើយលោកយាយរងគ្រោះ បានទៅទារលុយពីជនល្មើសជំពាក់ចំនួន២ម៉ឺនរៀល។ ពេលនោះ ជនសង្ស័យក៏ចាប់លោកយាយ រំលោភសេពសន្ថ វៈរហូតបានសម្រេច។
បន្ទាប់ពីការរំលោភ បណ្តាលឱ្យលោកយាយធ្លាក់ខ្លួនឈឺ ត្រូវបញ្ជូនទៅព្យាបាលជំងឺនៅមន្ទីរពេទ្យព្រះកុសុមៈ ហើយលោកយាយបានដាក់ពាក្យប្តឹងនៅប៉ុស្តិ៍នគរបាលរដ្ឋបាលអូបែកក្អម ទើបឈានទៅឃាត់ខ្លួនបាន ។
ជនល្មើសបានសារភាពសារ ខ្លួនពិតជាចាប់លោកយាយរំលោភពិតមែន។ នគរបាល បានធ្វើតេស្តទឹកនោមរកឃើញថា ជនសង្ស័យមានផ្ទុកសារធាតុញៀន។
សមត្ថកិច្ចឱ្យដឹងថា បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធីច្បាប់ ៕ រក្សាសិទ្ធិដោយ៖បញ្ញាស័ក្តិ