ភ្នំពេញ៖ គ្រោះថ្នាក់ចរាចរណ៍មួយ បានធ្វើឲ្យអ៊ំប្រុសម្នាក់សម្រេចចិត្តមិនបង្អង់យូរ ដោយគាត់បានលុតជង្គង់ក្រាបសំពះសុំទោសម្ចាស់រថយន្តព្រូស១គ្រឿង ទាំងដែលខ្លួនឯងគាត់ក៏មានរបួស ព្រោះតែគាត់ដឹងថាពុំមានលទ្ធភាព ប្រសិនបើខាងម្ចាស់រថយន្តទាមទារសំណងការខូចខាត។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោងប្រមាណជាង ១១ ព្រឹកថ្ងៃទី១០ ខែធ្នូ ឆ្នាំ២០២០ ស្ថិតនៅតាមបណ្តោយផ្លូវ២១៧ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។
បើយោងតាមប្រភពព័ត៌មាន នៅកន្លែងកើតហេតុ បានឲ្យដឹងថា បុរសវ័យចំណាស់ម្នាក់ ដែលមានអាយុខ្ទង់ជាង ៦០ ឆ្នាំក្រាស់ បានជិះម៉ូតូសង់កូរ៉េ ដឹកដបស្រាថ្នាំខ្មែរដើរលក់ និងឆ្លៀតរើសសម្បកកំប៉ុងអេតចាយ ដាក់ថង់ខាងក្រោយម៉ូតូ ស្រាប់តែបានប៉ះជាមួយរថយន្តព្រូស១គ្រឿង ខណៈកំពុងធ្វើដំណើរស្របទិសគ្នា បណ្តាលឲ្យដួលម៉ូតូ ហើយគាត់ក៏រងរបួសជើងផងដែរ។ តែយ៉ាងណា ក្រោយពីបានដឹងកំហុស លោកអ៊ំខាងលើភ្លាមៗនោះ ក៏បានលុតជង្គង់ក្រាបសំពះម្ចាស់រថយន្តដែលជាប្តីប្រពន្ធ ដើម្បីសុំផ្តល់ការអភ័យទោសឲ្យរូបគាត់ផង ព្រោះគាត់គ្មានចេតនាធ្វើឲ្យប៉ះពៀរបែបនេះទេ។
តែយ៉ាងណា ក្រោយកម្លាំងសមត្ថកិច្ចផ្នែកចរាចរណ៍ ចុះមកធ្វើការវាស់វែង និងជួយសម្របសម្រួល លោកអ៊ំវ័យចំណាស់ក៏ត្រូវបានដឹងថា ត្រូវបានម្ចាស់រថយន្តទទួលយកចំពោះការដឹងខុស និងការសុំទោសរបស់គាត់ ហើយក៏បានបញ្ចប់រឿងនៅកន្លែងកើតហេតុផងដែរ៕ រក្សាសិទ្ធិដោយ៖ លឹម ហុង
