ភ្នំពេញ ៖ ជនសង្ស័យជាស្ត្រីម្នាក់និងបុរសម្នាក់ជិះម៉ូតូមួយគ្រឿង រួមនឹងបក្ខពួក២នាក់ផ្សេងទៀត ជិះម៉ូូតូមួយគ្រឿងចាំបិទគូទ បានមកដូរលុយ នៅផ្ទះវីងវេរលុយបន្លំលួចលុយជិត២ម៉ឺនដុល្លារនៅកន្លែងដូរលុយវីង បានសម្រេចទៅហើយ តែប្អូនស្រីជនរងគ្រោះបានឃើញ ហើយស្រែកឲ្យម្ចាស់វីងរត់ទៅប្រតាយប្រតបបានមកវិញ។ នៅម៉ោងប្រមាណ៨និង៣០នាទីព្រឹក ថ្ងៃទី១៤ ខែធ្នូ ឆ្នាំ២០២០នេះ នៅចំណុចផ្ទះលក់អីវ៉ាន់ចាប់ហួយ និងវីងវេរលុយយីហោ វិន សាវុធ ស្ថិតនៅតាមផ្លូវជាតិលេខ៥ ក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
ម្ចាស់វីងវេរលុយ ដែលត្រូវជនសង្ស័យចូលលួចមិនបានសម្រេច មានឈ្មោះ វិន សាវុធ ភេទប្រុស អាយុ២២ឆ្នាំ។ នៅព្រឹកនោះជនសង្ស័យជាស្ត្រី និងបុរសម្នាក់ បានជិះម៉ូតូមួយគ្រឿងមកដូរលុយ នៅផ្ទះវីងចំនួន១០០ដុល្លារ ហើយក៏ត្រឡប់ទៅបាត់ទៅវិញ ។ លុះប្រមាណ១ម៉ោងក្រោយមក ជនសង្ស័យរូបនោះ ក៏បានត្រឡប់មកវិញឈប់នៅចិញ្ចើមផ្លូវ ធ្វើជាទិញភេសជ្ជៈខារ៉ាប៉ាវចំនួន១០កំប៉ុង ហើយអ្នកលក់រូបនោះក៏បានចេញពីកន្លែងវីងទៅយកឲ្យ ។ នៅពេលដែលអ្នកលក់រូបនោះយកភេសជ្ជៈទៅឲ្យជនសង្ស័យ ឲ្យលុយធ្វើជាពន្យារពេល ហើយជនសង្ស័យម្នាក់ទៀត បន្លំចូលទៅក្នុងតូបវីងវេរលុយ លួចយកឡាំងដែកដាក់លុយមានលុយ ប្រមាណជិត២ម៉ឺនរត់ចេញ ។ គាប់ជួនពេលនោះ ប្អូនស្រី ម្ចាស់វីងក៏បានឃើញទាន់ស្រែកចោរៗ និងដេញតាមប្រតាយដណ្តើមយកឡាំងនោះត្រឡប់មកវិញ ដោយបងប្រុសបានជួយដេញផងដែរ ។ ភ្លាមៗ ជនម្នាក់នោះ បានរត់ឡើងជិះម៉ូតូបក្ខពួកដែលឈប់ចាំ គេចបាត់ រួមជាមួយបក្ខពួក២នាក់ទៀត ដែលមកបន្លំធ្វើជាទិញខារ៉ាប៉ាវនោះ ។
តាមកាមេរ៉ាសុវត្ថិភាព ជនសង្ស័យមានបក្ខពួក៤នាក់ មានស្រីម្នាក់ ជិះម៉ូតូ២គ្រឿង ដោយប្រើល្បិចធ្វើជាទិញអីវ៉ាន់៕ រក្សាសិទ្ធិដោយ៖បញ្ញាស័ក្តិ
