សៀមរាប៖ សសាលាខេត្តសៀមរាប បានឲ្យដឹងថា អគ្គិសនីតង់ស្យុងខ្ពស់ ២៣០គីឡូវ៉ុល ដែលផលិតដោយរោងចក្រអគ្គិសនីដុតធ្យុងថ្មនៅខេត្តឧត្តរមានជ័យនឹងធ្វើការបញ្ជូនមកឱ្យខេត្តសៀមរាបប្រើប្រាស់ក្នុងពេលឆាប់ៗនេះ។
នៅរសៀលថ្ងៃទី១៦ ខែធ្នូ ឆ្នាំ២០២០ នៅសាលប្រជុំលេខ១ សាលាខេត្តសៀមរាប បានរៀបចំកិច្ចប្រជុំពិភាក្សាស្តីពី ការចុះពិនិត្យសាងសង់គ្រឹះបង្គោល តម្លេីងបង្គោល អូសខ្សែបញ្ជូនអគ្គិសនី និងកាប់សម្អាតដេីមឈេីតាមបណ្តោយគន្លងខ្សែបញ្ជូន អគ្គិសនីតង់ស្យុងខ្ពស់ ២៣០គីឡូវ៉ុលពីរោងចក្រអគ្គិសនីដុតធ្យុងថ្ម នៅខេត្តឧត្តរមានជ័យមកអនុស្ថានីយ៍អគ្គិសនីសៀមរា បខាងកេីត ស្ថិតក្នុងភូមិសាស្ត្រខេត្តឧត្តរមានជ័យ និងខេត្តសៀមរាប ដែលឆ្លងកាត់ដែនជម្រកសត្វព្រៃគូលែន-ព្រហ្មទេព គ្រប់គ្រងដោយក្រសួងបរិស្ថាន និងស្នេីសុំការឯកភាពលេីអត្តសញ្ញាណរបស់កម្មករ ការប្រេីប្រាស់ម៉ាសុីនរណាយន្ត លេខរណាយន្ត គ្រឿងចក្រ និងរថយន្តដែលត្រូវបម្រេីការកាត់ឆ្ការដេីមឈេីតាមបណ្តោយគន្លងខ្សែបញ្ជូនអគ្គិសនីតង់ស្យុងខ្ពស់ ក្រោមការដឹកនាំប្រជុំដោយឯកឧត្តម មាស សុផល អនុរដ្ឋលេខាធិការក្រសួងបរិស្ថាន និងលោក ង៉ាន់ ភិរុណ អភិបាលរងខេត្ត តំណាងឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ដោយមានការអញ្ជេីញចូលរួមពី តំណាងក្រសួងបរិស្ថាន អគ្គីសនីកម្ពុជា អាជ្ញាធរជាតិអប្សរា អាជ្ញាធរស្រុកពាក់ព័ន្ធលោក ប្រធានមន្ទីរបរិស្ថានខេត្ត មន្ទីររ៉ែ និងថាមពលខេត្ត អគ្គិសនីសៀមរាប និងតំណាងក្រុមហ៊ុនសាងសង់។
ក្នុងកិច្ចប្រជុំពិភាក្សា នេះ លោក អភិបាលរងខេត្ត បានមានប្រសាសន៍ចូលរួមយ៉ាងផុលផុស និងសូមគាំទ្រចំពោះគម្រោងនេះ ព្រមទាំងជួយជំរុញពន្លឿនក្នុងការសាងសង់បង្គោលអគ្គិសនីតង់ស្យុងខ្ពស់ ២៣០គីឡូវ៉ុល ឱ្យទទួលបានជោគជ័យ និងទាន់ពេលវេលា ព្រោះគម្រោងនេះ នឹងក្លាយជាមុខព្រួញសេដ្ឋកិច្ចជាតិដ៏សំខាន់មួយ។
ស្របតាមផែនការមេអភិវឌ្ឍប្រភពអគ្គិសនីបន្ថែមពីឆ្នាំ២០២០ដល់ឆ្នាំ២០៣០ រាជរដ្ឋាភិបាលបានសម្រេចអនុម័តគម្រោងវិស័យអគ្គិសនីចំនួន០៣បន្ថែមទៀត ដែលរួមមាន៖
ទី១៖ គម្រោងអភិវឌ្ឍរោងចក្រអគ្គិសនីដុតធ្យូងថ្ម ២៦៥មេហ្កាវ៉ាត់ នៅស្រុកត្រពាំងប្រាសាទ ខេត្តឧត្តរមានជ័យ។
ទី២៖ គម្រោងអភិវឌ្ឍខ្សែបណ្តាញបញ្ជូន២៣០គីឡូវ៉ុល ពីរោងចក្រអគ្គិសនីដុតធ្យូងថ្ម ខេត្តឧត្តរមានជ័យមកអនុស្ថានីយខាងកេីតសៀមរាប។
ទី៣៖ គម្រោងអភិវឌ្ឍរោងចក្រអគ្គិសនីដុតធ្យូងថ្មនាំចូល៧០០មេហ្កាវ៉ាត់ នៅស្រុកបុទុមសាគរ ខេត្តកោះកុង៕ រក្សាសិទ្ធិដោយ៖បញ្ញាស័ក្តិ
