ហ្សាកាតា៖ ប្រធានាធិបតីឥណ្ឌូនេស៊ី លោក ចូកូ វីដូដូ បានស្ម័គ្រចិត្តធ្វើជាមនុស្សដំបូងគេនៅក្នុងប្រទេស ដើម្បីទទួលវ៉ាក់សាំងការពារកូវីដ១៩។
លោកក៏បាននិយាយផងដែរថា វ៉ាក់សាំងទាំងនេះ នឹងចាក់ជូនប្រជាពលរដ្ឋដោយមិនគិតថ្លៃអ្វីទាំងអស់។ ប្រទេសនេះបានទទួលវ៉ាក់សាំងកូវីដ១៩ពីចិន ចំនួន ១,២ លានដូសពី ក្រុមហ៊ុន ស៊ីណូវ៉ាក់ បាយអូតិករបស់ចិនកាលពីថ្ងៃទី ៦ ធ្នូ ហើយគ្រោងនឹងទទួលវត្ថុធាតុដើម ដើម្បីផលិត ១៥ លានដូសពីក្រុមហ៊ុនដដែលនៅចុងខែនេះ។
វ៉ាក់សាំងវីរុសកូវីដ១៩ CoronaVac ទោះយ៉ាងណា គឺស្ថិតក្នុងការសាកល្បងដំណាក់កាលចុងក្រោយរបស់ខ្លួន នៅក្នុងប្រទេសឥណ្ឌូនេស៊ីក៏ដូចជា ប្រេស៊ីល ឈីលី និងតួកគី។ ទីភ្នាក់ងារត្រួតពិនិត្យចំណីអាហារនិងឱសថរបស់ឥណ្ឌូនេស៊ី (BPOM) នឹងផ្តល់ការយល់ព្រមរបស់ខ្លួនលើគុណភាពសុវត្ថិភាព និងប្រសិទ្ធភាពវ៉ាក់សាំងនៅពេលលទ្ធផលនៃការសាកល្បងគ្លីនិកចេញ។
នៅក្នុងការស្ទង់មតិរបស់រដ្ឋាភិបាលនៅក្នុងខែកញ្ញាប្រហែល ៦៥ ភាគរយ នៃអ្នកឆ្លើយសំណួរបាននិយាយថា ពួកគេមានឆន្ទៈក្នុងការទទួលបានការដោយមិនបង់ប្រាក់។ ដោយឡែក ៣៥ ភាគរយនៃអ្នកដែលនិយាយថា ពួកគេប្រាថ្នាចង់ចាក់វ៉ាក់សាំងគឺសុខចិត្តបង់ប្រាក់។
លោកវីដូដូដែលត្រូវបានគេស្គាល់ជាទូទៅថា ជា ជូកូវី បាននិយាយនៅក្នុងវីដេអូថា៖» ខ្ញុំនឹងក្លាយជាអ្នកទទួលវ៉ាក់សាំងដំបូងគេ ដើម្បីបង្កើនការទុកចិត្តក្នុងចំណោមប្រជាជនថា វ៉ាក់សាំងដែលបានប្រើមានសុវត្ថិភាព»។
មុននេះរដ្ឋាភិបាលបានគ្រោងនឹងផ្តល់វ៉ាក់សាំង ដោយឥតគិតថ្លៃ ដល់បុគ្គលិកសុខាភិបាល យោធានិងប៉ូលីសក៏ដូចជាមន្ត្រីរាជការចំនួន ៣២ លាននាក់ដោយឥតគិតថ្លៃ ខណៈដែលប្រជាជនដទៃទៀត នឹងត្រូវចំណាយដើម្បីចាក់ថ្នាំបង្ការកូវីដ១៩នេះ។
ឥណ្ឌូណេស៊ីមានប្រជាជនជាង ២៦០ លាននាក់។ ការសម្រេចចិត្តនេះបានធ្វើឱ្យមានការរិះគន់ដោយមានមនុស្សមួយចំនួន បានលើកឡើងពីការពិតដែលថា ប្រទេសផ្សេងទៀតកំពុងផ្តល់វ៉ាក់សាំងដោយឥតគិត
ថ្លៃ។ “ បន្ទាប់ពីទទួលបានធាតុចូលពីប្រជាពលរដ្ឋ ហើយបន្ទាប់ពីយើងបានធ្វើការគណនាឡើងវិញ ទាក់ទងនឹងថវិការបស់រដ្ឋ ខ្ញុំអាចនិយាយបានថាការចាក់វ៉ាក់សាំងកូវីដ១៩ សម្រាប់ពលរដ្ឋនឹងមិនគិតថ្លៃទេ។
លោកថា៖« ដូច្នេះខ្ញុំបានណែនាំសមាជិកគណៈរដ្ឋមន្រ្តី ក្រសួងទីភ្នាក់ងារនិងរដ្ឋាភិបាល ក្នុងតំបន់ឱ្យផ្តល់អាទិភាពដល់ការចាក់វ៉ាក់សាំងក្នុងថវិកាឆ្នាំ ២០២១ ។ ខ្ញុំក៏ណែនាំដល់រដ្ឋមន្រ្តីហិរញ្ញវត្ថុ ឱ្យផ្តល់អាទិភាពនិងចាត់ចែងការចំណាយផ្សេងៗ ដើម្បីធានាឱ្យមានវ៉ាក់សាំងឥតគិតថ្លៃទាំងនេះ ដូច្នេះវាគ្មានហេតុផលអ្វី ដែលប្រជាជនមិនត្រូវចាក់វ៉ាក់សាំងនោះទេ។
ទីភ្នាក់ងារត្រួតពិនិត្យចំណីអាហារនិងឱសថរបស់ឥណ្ឌូនេស៊ី (BPOM) បាននិយាយថាវ៉ាក់សាំងដំបូងបង្អស់ដែលអាចត្រូវបានប្រើ គឺនៅពេលដែលលទ្ធផល នៃការសាកល្បងព្យាបាលត្រូវបានគេដឹងនៅចុងខែមករា។
ក្រៅពីវ៉ាក់សាំងពីស៊ីណូវ៉ាក់ បាយអូតិក ឥណ្ឌូណេស៊ីក៏កំពុងធ្វើការជាមួយក្រុមហ៊ុនផលិតថ្នាំអាមេរិក Pfizer ក្រុមហ៊ុនផលិតឱសថអង់គ្លេស – ស៊ុយអែត AstraZeneca និងកម្មវិធីចាក់វ៉ាក់សាំងសកល COVAX។ ប្រទេសឥណ្ឌូនេស៊ីគឺជាប្រទេសមួយ ក្នុងចំណោមប្រទេសដែលមានការឆ្លងកូវីដ១៩ អាក្រក់បំផុត ដែលមានចំនួនជាង ៦០ ម៉ឺនករណី និងជិត ២០.០០០ នាក់បានស្លាប់៕
ប្រភព៖ រ័យទ័រ
រក្សាសិទ្ធិដោយ៖CEN
