បន្ទាយមានជ័យ ៖ ទីស្នាក់ការក្រុមការងារទំនាក់ទំនងកម្ពុជា-ថៃ ច្រកម៉ាឡៃ ដែលពីមុន និងពេលបច្ចុប្បន្ននេះជួលដីពីប្រជាពលរដ្ឋសម្រាប់ធ្វើការ។ ក្នុងពេលនេះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានដឹកនាំក្រុមការងារចុះត្រួតពិនិត្យ ទីតាំងសាងសង់ទីស្នាក់ការក្រុមការងារទំនាក់ទំនងព្រំដែនកម្ពុជា-ថៃ ច្រកតំបន់ម៉ាឡៃ ស្ថិតនៅក្នុងភូមិក្បាលស្ពាន ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ នាព្រឹកថ្ងៃទី១៧ ខែធ្នូ ឆ្នាំ២០២០ ។
ការចុះត្រួតពិនិត្យទីតាំងសាងសង់ស្នាក់ការក្រុមការងារទំនាក់ទំនងកម្ពុជា-ថៃ ច្រកទ្វារតំបន់ម៉ាឡៃនាពេលនេះ គឺធ្វើឡើង បន្ទាប់ពីមានការស្នើសុំរបស់ក្រុមការងារ ទំនាក់ទំនងព្រំដែនកម្ពុជា-ថៃ ច្រកទ្វារតំបន់ម៉ាឡៃ តាមរយៈមេបញ្ជាការយោធភូមិភាគទី៥ នៅដីមួយកន្លែង សម្រាប់សាងសង់ទីស្នាក់ការទំនាក់ទំនងព្រំដែនកម្ពុជា-ថៃ ដែលពីមុន និងពេលបច្ចុប្បន្ននេះ ទីស្នាក់ការក្រុមការងារទំនាក់ទំនងកម្ពុជា-ថៃ ច្រកម៉ាឡៃ ជួលដីពីប្រជាពលរដ្ឋសម្រាប់ធ្វើការ។
ឆ្លើយតបនឹងសំណើខាងលើ ទើបឯកឧត្តម អ៊ុំ រាត្រីអភិបាលខេត្តបន្ទាយមានជ័យ បានអញ្ជើញដឹកនាំក្រុមការងារចុះពិនិត្យទីតាំងជាក់ស្ដែង និងបានប្រគល់ដី សម្រាប់ឲ្យក្រុមការងារទំនាក់ទំនងព្រំដែនកម្ពុជា-ថៃ ធ្វើការសាងសង់ទីស្នាក់ការរបស់ខ្លួន ទៅតាមសំណើដែលបានស្នើសុំ ៕ រក្សាសិទ្ធិដោយ៖បញ្ញាស័ក្តិ
