កែប៖ ជនសង្ស័យ ងិន ស៊ុយទ្រី ដែលបង្កើតគណនីហ្វេសប៊ុកក្លែងក្លាយជាច្រើន យកទៅជេរប្រមាថដល់ថ្នាក់ដឹកនាំកំពូលៗ មានព្រះមហាក្សត្រ សម្តេចអគ្គមហាសេនាបតីតេជោ នាយករដ្ឋមន្ត្រីកម្ពុជា និងអភិបាលខេត្ត រួមទាំងស្នងការតាមបណ្តាខេត្តមួយចំនួន នៅព្រឹកថ្ងៃទី ១៧ ខែធ្នូ ឆ្នាំ២០២០ ត្រូវបានតុលាការចេញដីកាបង្គាប់ឱ្យឃុំខ្លួននៅពន្ធនាគារហើយ។
យោងតាមដីកាបង្គាប់ឱ្យឃុំខ្លួនរបស់សាលាដំបូងខេត្តកំពត លោកសេង ម៉ាឡាប ចៅក្រមស៊ើបសួរ នៃសាលាដំបូងខេត្តកំពត បានឃើញមាត្រា ២០៦,២១៩,២៦០,៦២១, និង មាត្រាង៦២ នៃក្រមនីតិវិធីព្រហ្មទណ្ឌ – បានឃើញសំណុំរឿងព្រហ្មទណ្ឌលេខ ៩៤១ ចុះថ្ងៃទី ១៦ ខែធ្នូ ឆ្នាំ២០២០ ។ -បានឃើញដីកាសន្និដ្ឋានបញ្ជូនរឿងឱ្យស៊ើបសួរលេខ ៥៤៩ ចុះថ្ងៃទី ១៦ ខែធ្នូ ឆ្នាំ ២០២០ របស់តំណាង អយ្យការអមសាលាដំបូងខេត្តកំពត ដែលទាក់ទិននឹងឈ្មោះ ងិន ស៊ុយទ្រី ហៅ ទី ភេទប្រុស ថ្ងៃខែឆ្នាំកំណើត ២៥-០៩ -១៩៩៥ ជាតិខ្មែរ ទីកន្លែងកំណើតភូមិកែប ឃុំកែប ស្រុកកែប ខេត្តកែប និងទីលំនៅបច្ចុប្បន្នភូមិកែប សង្កាត់កែប ក្រុងកែប ខេត្តកែប ឪពុកឈ្មោះ វ៉ែន សុវណ្ណារេត (រ) ម្តាយឈ្មោះ ជា ដាលី ( រ) នៅលីវ ជានីតិជន ទោសពីមុន គ្មាន ។
ជននេះត្រូវបានដាក់ឲ្យស្ថិតនៅក្រោមការត្រួតពិនិត្យពីបទ បរិហាកេរ្តិ៍ជាសាធារណៈ, ជេរប្រមាថជាសាធារណៈ, ញុះញង់ឲ្យប្រព្រឹត្តបទទក្រិដ្ឋជាអាទិ៍, ប្រមាថចំពោះអង្គព្រះមហាក្សត្រ និង រូបភាពនិងសម្ភារៈអាសអាភាស ប្រព្រឹត្តនៅចំណុចភូមិកែប សង្កាត់កែប ក្រុងកែប ខេត្តកែប កាលពីអំឡុងខែតុលា, វិច្ឆិកា ឆ្នាំ២០២០ បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមបញ្ញត្តិមាត្រា ៣០៥, ៣០៧, ៤៩៥ នៃក្រមព្រហ្មទណ្ឌ មាត្រា ៤៣៧ (ស្ទួន ) នៃ ច្បាប់ស្តីពីវិសោធនកម្មព្រហ្មទណ្ឌ មាត្រា ៣៩ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
បានឃើញដីកាសម្រេចឱ្យឃុំខ្លួនបណ្តោះអាសន្នលេខ ១១៦៤ ចុះថ្ងៃទី ១៦ ខែធ្នូ ឆ្នាំ ២០២០។
ហេតុដូច្នេះ សម្រេច គឺ ១-ឲ្យភ្នាក់ងារមានសមត្ថកិច្ច នៃកងកម្លាំងសាធារណៈ ធ្វើការនាំខ្លួនជនត្រូវចោទដែលមានឈ្មោះ ស៊ុយទ្រី ហៅ ទី ខាងលើទៅពន្ធនាគារ ឬ មណ្ឌលឃុំខ្លួនខេត្តកំពត ដោយអនុវត្តឱ្យបានត្រឹមត្រូវតាមច្បាប់។ ២- ឱ្យប្រធានពន្ធនាគារ ឬ មណ្ឌលឃុំខ្លួនខេត្តកំពតទទួល និង ឃុំខ្លួនជននេះរហូតដល់មានបទបញ្ជាថ្មីសម្រេចផ្សេងពីនេះ។ -ឱ្យភ្នាក់ងារនៃកងកម្លាំងសាធារណៈទាំងអស់ សហការអនុវត្តឱ្យបានល្អ នៅពេលដីកានេះត្រូវបានបង្ហាញក្នុងករណីចាំបាច់។
សូមបញ្ជាក់ថា ក្រោយពីទទួលបានពាក្យបណ្ដឹងជាច្រើនពីបណ្ដាអង្គភាពមួយចំនួន និងជនរងគ្រោះជាច្រើននាក់ និងក្រោមការចង្អុលបង្ហាញពី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ នាយកដ្ឋានប្រឆាំងបទល្មើសបច្ចេកវិទ្យា ក្រោមការដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ជា ពៅ បានធ្វើការស្រាវជ្រាវ រហូតដល់មានការឃាត់ខ្លួនបុរសម្នាក់ នៅព្រឹកថ្ងៃទី១៥ ខែធ្នូ ឆ្នាំ២០២០ ដោយមានការសហការជាមួយកម្លាំងនគរបាលខេត្តកែប។
ការឃាត់ខ្លួនជនសង្ស័យឈ្មោះ ងិន ស៊ុយទ្រី ភេទប្រុស អាយុ២៥ឆ្នាំ ធ្វើឡើងនៅចំណុចភូមិកែប សង្កាត់កែប ក្រុងកែប ខេត្តកែប ដែលជាកន្លែងរស់នៅរបស់ជនសង្ស័យតែម្តង។ សូមបញ្ជាក់ផងដែរថា យុវជនរូបនេះមានចេតនាទុច្ចរិត បានបង្កើតគណនីហ្វេសប៊ុក ក្លែងក្លាយជាច្រើន ធ្វើការជេរប្រមាថ បរិហាកេរ្តិ៍ បំប៉ោងព័ត៌មាន បំពុលសង្គម និងបង្កើតព័ត៌មានក្លែងក្លាយ ដើម្បីបរិហារកេរ្តិ៍ ថ្នាក់ដឹកនាំកំពូលៗ មានទាំងព្រះមហាក្សត្រ សម្តេចនាយករដ្ឋមន្ត្រី អភិបាលខេត្ត ព្រមទាំងស្នងការនគរបាលខេត្តមួយចំនួន ដោយគេបានសរសេរនូវភាសាអសុរោះ កាត់តរូបភាព លើគណនីហ្វេសប៊ុកក្លែងក្លាយទាំងនោះ។
យុវជន ងិន ស៊ុយទ្រី បានសារភាពថា ខ្លួនមានទំនាក់ទំនងស្នេហាជាមួយនឹងនារីម្នាក់កាលពីដើមឆ្នាំ២០១៦ ក្រោយមកនាងបានផ្លាស់ប្ដូរមកធ្វើការនៅរាជធានីភ្នំពេញ តាំងពីពេលនោះមកទំនាក់ទំនងរបស់ពួកគេបានត្រូវឃ្លាតឆ្ងាយ និងដោយសារនារីនោះមានទំនាក់ទំនងជាមួយបុរសជាច្រើនផ្សេងទៀត ធ្វើឱ្យគេកើតចិត្តប្រចណ្ឌ ហើយក៏បានបង្កើតគណនីក្លែងក្លាយ ដោយប្រើឈ្មោះរបស់នាង ឪពុក និងជាមិត្តភក្តិរបស់នាងជាច្រើនទៀត ដើម្បីធ្វើការវាយប្រហារថ្នាក់ដឹកនាំកំពូលៗ ក្នុងចេតនាដើម្បីទម្លាក់កំហុសឱ្យនាង ព្រមទាំងមិត្តភក្កិ និងដៃគូរស្នេហា ក៏ដូចជាគ្រួសាររបស់នាងផង។
បច្ចុប្បន្ននេះនាយកដ្ឋានប្រឆាំងបទល្មើសបច្ចេកវិទ្យាសហការជាមួយស្នងការដ្ឋាននគរបាលខេត្តកែប កំពុងរៀបចំកសាងសំណុំរឿងបញ្ជូនជនសង្ស័យនេះទៅតុលាការដើម្បីចាត់ការតាមនីតិវិធី។
អគ្គស្នងការនគរបាលជាតិ ក៏ដូចជានាយកដ្ឋានប្រឆាំងបទល្មើសបច្ចេកវិទ្យា បានធ្វើការក្រើនរំឭកដល់អ្នកប្រើប្រាស់បណ្តាញទំនាក់ទំនងសង្គមទាំងអស់ សូមមានក្រមសីលធម៌ក្នុងការប្រើប្រាស់ កុំប្រើដើម្បីធ្វើជាទីលានបញ្ចេញកំហឹងសងសឹកស្នេហា ដែលនាំឱ្យអាប់ឱនដល់ប្រពៃណីដ៏ផូរផង់របស់ជាតិ និងកុំព្យាយាមប្រើដើម្បីប្រព្រឹត្តបទល្មើស ព្រោះមិនអាចគេចចេញពីសំណាញ់ច្បាប់បានឡើយ៕រក្សាសិទ្ធិដោយ៖បញ្ញាស័ក្តិ
