ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន បានផ្ញើលិខិតមួយជូន ឯកឧត្តម ចូ បៃដិន ដោយសម្តែងការអបអរសាទរចំពោះការជាប់ឆ្នោត ក្លាយជាប្រធានាធិបតីទី៤៦ របស់សហរដ្ឋអាមេរិក កាលពីពេលថ្មីៗនេះ។
សារលិខិតផ្ញើជូន ឯកឧត្តម ចូ បៃដិន សម្តេចតេជោ បានមានប្រសាសន៍ថា តាងនាមឱ្យរាជរដ្ឋាភិបាល និងប្រជាជនកម្ពុជា ខ្ញុំមានកិត្តិយសដ៏ធំធេង និង សេចក្តីសោមនស្សរីករាយឥតឧបមា សូមសម្តែងនូវអំណរសាទរជូនចំពោះ ឯកឧត្តម ដែលបានជាប់ឆ្នោតជាប្រវត្តិសាស្ត្រ ជាប្រផានាធិបតី សហរដ្ឋអាមេរិកទី ៤៦។
បទពិសោធន៍ដ៏ធំធេង និងភាពជាអ្នកដឹកនាំដ៏វៀងវៃរបស់ឯកឧត្តម គឺជាកត្តា សត្យានុម័តក្នុងការទទួលបាននូវទំនុកចិត្តពីប្រជាជនអាមេរិក។ ខ្ញុំមានជំនឿ ជឿជាក់យ៉ាងឺមុតមាំថា ក្រោមការដឹកនាំរបស់ឯកឧត្តមជាប្រធានាធិបតី សហរដ្ឋអាមេរិក នឹងបន្តរីក៏ចម្រើនទៅមុខ និងរួមចំណែកនាំឲ្យពិភពលោកមានសេរីភាព និងវិបុលភាពកាន់តែល្អប្រសើរថែមទៀត។ រាជរដ្ឋាភិបាល និងប្រជាជនកម្ពុជា តែងតែផ្តល់សារៈសំខាន់យ៉ាងធំធេងដល់ ការពង្រឹង និងពង្រីកនូវទំនាក់ទំនងជាមិត្តភាពដ៏យូរអង្វែង រវាងប្រទេសទាំងពីរ ដែលនៅក្នុងឆ្នាំនេះ យើងកំពុងតែប្រារព្ធខួបលើកទី៧០។ ខ្ញុំសូមគូសបញ្ជាក់ថា រាជរដ្ឋាភិបាលរបស់ខ្ញុំបានប្តេជ្ញាចិត្តយ៉ាងពេញលេញ ក្នុងការធ្វើការងារ ជាមួយរដ្ឋបាលរបស់ឯកឧត្តម ដើម្បីជំរុញទំនាក់ទំនងទ្វេភាគីឱ្យក៏ន់តែល្អប្រសើរបន្ថែមទៀត។
ក្នុងឱកាសដ៏មហានក្ខត្តឫក្សនេះ ខ្ញុំសូមជូនពរឯកឧត្តមប្រធានាធិបតីជាប់ឆ្នោត និងរដ្ឋាភិបាលរបស់ឯកឧត្តម សូមទទួលបានជោគជ័យដ៏ ត្រចះត្រចង់ក្នុងការបំពេញភារកិច្ចជាប្រវត្តិសាស្ត្រីរបស់ឯកឧត្តម ក្នុងការដឹកនាំប្រជាជាតិអាមេរិក។
សូមឯកឧត្តមប្រធានាធិបតីជាប់ឆ្នោត មេត្តាទទួលនូវការរាប់អានដ៏ខ្ពង់ខ្ពស់បំផុតពីខ្ញុំ៕រក្សាសិទ្ធិដោយ៖បញ្ញាស័ក្តិ