កំពត ៖ លោក ជាវ តាយ អភិបាលនៃគណៈអភិបាលខេត្តកំពត បានជួបជាមួយតំណាងប្រជាពលរដ្ឋដែលមានបញ្ហាដីធ្លីជាមួយក្រុមហ៊ុន សូ ងួន ដែលស្ថិតនៅ ឃុំតេជោអភិវឌ្ឍន៍ និងឃុំត្រពាំងភ្លាំង ស្រុកឈូក ខខេត្តកំពតហើយអភិបាលខេត្ត នឹងធ្វេីការស្នេីសុំឲ្យក្រុមហ៊ុន សូ ងួន ផ្អាកក្នុងការរុះរេីជាបណ្តោះអាសន្ន និងបង្កេីតក្រុមការងារចុះពិនិត្យដីស្រែចំការដែលប្រជាពលរដ្ឋកំពុងកាន់កាប់។
សមាសភាពអញ្ជេីញចូលរួម មាន ឯកឧត្ដម អភិបាល រងខេត្ត មន្ទីរអង្គភាពពាក់ព័ន្ធជុំវិញខេត្ត លោកអភិបាលស្រុកឈូក លោកមេឃុំ និងតំណាងប្រជាពលរដ្ឋ ប្រមាណ ៤០នាក់នៅថ្ងៃព្រហស្បតិ៍ត ទី ១៧ ខែ ធ្នូ ឆ្នាំ២០២០ ។
បន្ទាប់ពីបានស្តាប់ការលេីកឡេីង នូវបញ្ហា និងសំណូមពររបស់តំណាងប្រជាពលរដ្ឋរួចមក លោក ជាវ តាយ ទទួលយកសំណូមពរទាំងអស់ដែលបានលេីកឡេីងនាពេលនេះ ដេីម្បីយកទៅពិនិត្យឡេីងវិញ និងធ្វេីការផ្ទៀងផ្ទាត់ដោះស្រាយជូនបងប្អូន។
លោក អភិបាលខេត្ត នឹងធ្វេីការស្នេីសុំឲ្យក្រុមហ៊ុន សូ ងួន ផ្អាកក្នុងការរុះរេីជាបណ្តោះអាសន្ន និងបង្កេីតក្រុមការងារចុះពិនិត្យដីស្រែចំការដែលប្រជាពលរដ្ឋកំពុងកាន់កាប់អាស្រ័យផលជាក់ស្តែង ដេីម្បីស្នេីសុំរាជរដ្ឋាភិបាលធ្វើការកាត់ជ្វៀលចុះបញ្ជីជូន។
សូមបញ្ជាក់ថា សមត្ថកិច្ចឃាត់ខ្លួនជនសង្ស័យ2នាក់ ពាក់ព័ន្ធករណីប្រើកាំភ្លើងកែច្នៃបាញ់សន្តិសុខយាមដី ក្រុមហ៊ុន សូ ងួន បណ្តាលឲ្យស្លាប់ម្នាក់និងរបួសម្នាក់ ។ ចាប់ខ្លួននេះ បានធ្វើឡើងនៅថ្ងៃទី២០ ខែវិច្ឆិកា ឆ្នាំ២០២០នេះ។ សមត្ថកិច្ចបានឃាត់ខ្លួនជនសង្ស័យពីរនាក់ពាក់ព័ន្ធករណីប្រើកាំភ្លើងកែច្នៃបាញ់សន្តិសុខយាមដីក្រុមហ៊ុន សូ ងួន បណ្តាលឲ្យស្លាប់ម្នាក់និងរបួសម្នាក់នៅក្នុងភូមិត្រពាំងភ្លាំង ស្រុកឈូក ខេត្តកំពតកាលពីព្រឹកថ្ងៃទី១៨ ខែវិច្ឆិកា ឆ្នាំ២០២០។ ឃាត់ខ្លួនបានពីរនាក់ ជនដៃដល់លាក់ខ្លួននៅលើភ្នំក្បែរកន្លែងកើតហេតុ ។
ជនសង្ស័យឃាត់ខ្លួនទាំងពីរនាក់ឈ្មោះ ញ៉ាន សែង ភេទប្រុស អាយុ២៣ឆ្នាំ នៅភូមិព្រៃពាយ ឃុំត្រពាំងភ្លាំង ស្រុកឈូកនិងឈ្មោះ ស៊ឹម ថែ ភេទប្រុស អាយុ២១ឆ្នាំ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ។
សូមជម្រាបថា ជម្លោះដីធ្លីរវាងប្រជាពលរដ្ឋជាមួយក្រុមហ៊ុនរបស់ឧកញ៉ា សូ ងួន បានបង្កឲ្យប្រជាពលរដ្ឋផ្ទុះកំហឹង យកកាំភ្លើងកែច្នៃបាញ់ទៅលើសន្តិសុខយាមដីក្រុមហ៊ុនបណ្តាលឲ្យស្លាប់ម្នាក់ និងរបួសធ្ងន់ម្នាក់។ ហេតុការណ៍នេះ បានកើតឡើងនៅក្នុងភូមិត្រពាំងផ្លាំង ស្រុកឈូក ខេត្តកំពត កាលពីព្រឹកថ្ងៃទី១៨ ខែវិច្ឆិកា ។
កាលពីថ្ងៃទី១៨ខែវិច្ឆិកា ករណីនេះកើតឡើងរវាងក្រុមហ៊ុន សូ ងួន ជាមួយប្រជាពលរដ្ឋដែលមានបញ្ហារឿងដីធ្លី ដោយក្រុមហ៊ុនចោទប្រកាន់ប្រជាពលរដ្ឋថា ទៅទន្ទ្រានដីរបស់ក្រុមហ៊ុន ហើយប្រជាពលរដ្ឋចោទប្រកាន់ក្រុមហ៊ុនថា ទៅទន្ទ្រានដីរបស់ប្រជាពលរដ្ឋហើយក្រុមហ៊ុនបានដាក់សន្តិសុខយាមដីនៅពេលដែលប្រចាពលរដ្ឋចូលមក គឺសន្តិសុខដេញចេញ។ នៅថ្ងៃទី១៨ វិច្ឆិកា នេះ សន្តិសុខបានជិះម៉ូតូល្បាតនៅក្នុងភូមិសាស្ត្រក្រុមហ៊ុន ត្រូវបានប្រជាពលរដ្ឋប្រើកាំភ្លើងកែច្នៃ (ប្រើគ្រាប់កាំកង់) បានបាញ់ទៅលើសន្តិសុខបានបណ្តាលឲ្យរបួសម្នាក់ និងម្នាក់ទៀតស្លាប់។
ជនរងគ្រោះទាំងពីរនាក់ ឈ្មោះ ផន ដា អាយុ៣១ឆ្នាំ មានស្រុកសំពៅមាស ខេត្តពោធិ៍សាត់ បានរងរបួសធ្ងន់។ ឈ្មោះ នួន ភ័ក្ត្រា អាយុ២៧ឆ្នាំ មានស្រុកកំណើតនៅខេត្តស្វាយរៀង រងរបួសត្រង់ក្រោមក្លៀក ស្លាប់នៅនឹងកន្លែង៕ រក្សាសិទ្ធិដោយ៖បញ្ញាស័ក្តិ