ភ្នំពេញៈ សាលាឧទ្ធរណ៍រាជធានីភ្នំពេញប្រកាសសាលដីកាសម្រេចមិនអនុញ្ញាតឲ្យសមាជិកក្រុមខ្មែរថាវរៈចំនួនបីនាក់ និងសមាជិកសមាគមនិស្សិតបញ្ញវន្តខ្មែរចំនួនពីរនាក់ នៅក្រៅឃុំនោះទេ ពោលគឺតម្កល់ការសម្រេចរបស់សាលាដំបូងរាជធានីភ្នំពេញទុកជាបានការដដែល។
ការប្រកាសសាលដីកាធ្វើនៅព្រឹកថ្ងៃទី១៨ ខែធ្នូ ឆ្នាំ២០២០ នេះ។
ការប្រកាសនេះ បានធ្វើឡើងបន្ទាប់ពីសាលាឧទ្ធរណ៍រាជធានីភ្នំពេញបាន បើកសវនាការ ជំនុំជម្រះលើបណ្តឹងសុំនៅក្រៅឃុំរបស់សមាជិកក្រុមខ្មែរថាវរៈចំនួនបីនាក់ និងសមាជិកសមាគមនិស្សិតបញ្ញវន្តខ្មែរចំនួនពីរនាក់
កាលពីព្រឹកថ្ងៃទី១៦ ខែធ្នូ ឆ្នាំ២០២០។ អ្នកទាំងប្រាំមិនមានវត្តមានក្នុងសវនាការនេះឡើយ។
សូមជម្រាបថា លោក ថា ឡាវី និងកញ្ញា សូ មេត្តា ( ឬ កញ្ញា អេង ម៉ាឡៃ ) សមាជិកក្រុមខ្មែរថាវរៈ ត្រូវបានចាប់ខ្លួននៅថ្ងៃទី ៧ ខែកញ្ញា ឆ្នាំ ២០២០ ពាក់ព័ន្ធ នឹងការចូលរួមការតវ៉ាទាមទារឱ្យដោះលែង លោក រ៉ុង ឈុន មេដឹកនាំសហជីពលេចធ្លោមួយរូប ។
នៅថ្ងៃទី ៦ ខែកញ្ញា ឆ្នាំ ២០២០ អនុប្រធានសមាគមនិស្សិតបញ្ញវន្តខ្មែរ លោក មាន ព្រហ្ម មុនី និងព្រះតេជគុណ កើត សា រ៉ា យ ដែលជាសមាជិកខ្មែរ ថាវរៈ ដែរនោះ ត្រូវបានចាប់ខ្លួនដោយសារការរៀបចំការជួបជុំ ដោយសន្តិវិធីនៅទីលានប្រជាធិបតេយ្យ ក្នុងក្រុងភ្នំពេញ ។
នៅថ្ងៃទី ១០ ខែកញ្ញា ឆ្នាំ ២០២០ សមាជិកសមាគម និស្សិតបញ្ញវន្តខ្មែរ លោក មួង សុភ័ក្ត្រ ត្រូវបានចាប់ខ្លួនបន្ទាប់ពីលោកចូលរួម ក្នុងការតវ៉ាមួយ ។
អ្នកទាំងប្រាំនាក់ ត្រូវបានចោទប្រកាន់ពីបទញុះញង់ឱ្យមានភាពវឹកវរ ដល់សន្តិសុខសង្គម និងឃុំខ្លួនបណ្តោះអាសន្ន នៅមណ្ឌលអប់រំ កែប្រែម១ និងម២ ក្នុងរាជធានីភ្នំពេញ ៕រក្សាសិទ្ធិដោយ៖CEN
