ភ្នំពេញៈ បុរស ម្នាក់បានជិះម៉ូតូឡើងមកលើស្ពានជ្រោយចង្វា ដើម្បីលោតទឹកសម្លាប់ខ្លួនឯង តែសំណាងល្អត្រូវបានបងប្រុសដែលជាអ្នក់បើកទូកនេសាទឃើញទាន់ ទើបជួយសង្គ្រោះជីវិតបានទាន់ពេលវេលា។
ហេតុការភ្ញាក់ផ្អើលនេះ បានកើតឡើងកាលពីវេលាម៉ោង ៩ និង ៣០ នាទីព្រឹក ថ្ងៃទី១៨ ខែធ្នូ ឆ្នាំ ២០២០ នៅត្រង់ចំណុចលើស្ពានជ្រោយចង្វា ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញបុរសរូបនោះ ជិះម៉ូតូមួយគ្រឿងឡើងមកលើស្ពានជ្រោយចង្វា ដើម្បីលោតទឹកសម្លាប់ខ្លួន ដោយមិនទាន់ដឹងថារូបគាត់មានវិបត្តិអ្វីឲ្យពិតប្រាកដនៅឡើយទេ។
ជនរងគ្រោះមានឈ្មោះវាសនា ភេទប្រុស អាយុ៣០ឆ្នាំ បច្ចុប្បន្នស្នាក់នៅសង្កាត់កំពង់សំណាញ់ ក្រុងតាខ្មៅ ខេត្តកណ្តាល។
តាមប្រភពព័ត៌មានពីកន្លែងកើតហេតុ ឱ្យដឹងថា ជនរងគ្រោះម្នាក់នេះ បានជិះម៉ូតូស្កុបពីមួយគ្រឿង មកឈប់នៅលើស្ពាន ហើយក៏បានចុះពីលើម៉ូតូរបស់ខ្លួនរួចឡើងលើបង្កាន់ដៃស្ពាន លោតចុះទៅក្នុងទឹកទន្លេ ដើម្បីសម្លាប់ខ្លួន តែត្រូវបានបងប្រុសដែលជាអ្នកបើកទូកនេសាទ ក្រឡេកឃើញទាន់ ក៏បានជួយសង្គ្រោះរួចផុតពីសេចក្ដីស្លាប់។
ក្រោយពីបានជួយសង្គ្រោះបានហើយ បងប្រុសក៏នាំយកជនរងគ្រោះ មកប្រគល់ឲ្យសមត្ថកិច្ច ដែលប្រចាំនៅគោលដៅទី៣ ខាងក្រោមស្ពានយកទៅធ្វើការសាកសួរ និងណែនាំនៅដល់រូបគាត់ឈប់ឲ្យគិតខ្លីអ៊ីចឹងទៀត ហើយក៏បានទំនាក់ទំនងទៅក្រុមគ្រួសារ ឲ្យមកទទួលយកជនរងគ្រោះទៅផ្ទះវិញ៕ រក្សាសិទ្ធិដោយ ៖ ហេងវុត្ថា