ក្រុមហ៊ុនផលិតឱសថ Pfizer បាននិយាយកាលពីថ្ងៃសុក្រ (១៨ ធ្នូ) ថាខ្លួនបានដាក់ពាក្យស្នើសុំការអនុម័តយល់ព្រមពីប្រទេសជប៉ុននូវវ៉ាក់សាំងកូវីដ១៩របស់ខ្លួន ដែលកំពុងត្រូវបានចរាចររួចហើយនៅចក្រភពអង់គ្លេសនិងសហរដ្ឋអាមេរិក។
រដ្ឋាភិបាលជប៉ុនបានចុះកិច្ចព្រមព្រៀងទិញវ៉ាក់សាំងកូវីដ១៩ ជាមួយក្រុមហ៊ុន Pfizer សម្រាប់ផ្គត់ផ្គង់វ៉ាក់សាំងកូវីដ១៩ចំនួន ១២០ លានដូស ដែលផលិតដោយ Pfizer និងដៃគូអាល្លឺម៉ង់ BioNTech ។
ក្រុមហ៊ុន Pfizer បាននិយាយនៅក្នុងសេចក្តីថ្លែងការណ៍មួយថា ខ្លួនបានដាក់ពាក្យសុំទៅក្រសួងសុខាភិបាលជប៉ុនរួមជាមួយការផ្តល់ព័ត៌មានស្តីពីការធ្វើតេស្ត ដែលខ្លួនបានអនុវត្តរហូតមកដល់ពេលនេះ។ ប្រធានខុទ្ទកាល័យគណៈរដ្ឋមន្ត្រីជប៉ុនលោក Katsunobu Kato បានប្រាប់សន្និសីទសារព័ត៌មានមុនពេលការប្រកាសរបស់ Pfizer ថា ប្រសិទ្ធភាពនិងសុវត្ថិភាពវ៉ាក់សាំងគឺជាអាទិភាព។
លោកបានបន្ថែមទៀតថា ប្រទេសជប៉ុនសង្ឃឹមថាប្រជាជនទាំងអស់របស់ខ្លួននិងអាចចាក់វ៉ាក់សាំងនៅឆមាសទីមួយនៃឆ្នាំក្រោយ ហើយរដ្ឋាភិបាលនឹងខិតខំប្រឹងប្រែងសម្រាប់ការរៀបចំឱ្យបានត្រឹមត្រូវដើម្បីអនុវត្តការផ្តល់វ៉ាក់សាំងនេះ។ ប្រភព៖ Reuters