ភ្នំពេញ៖ នាយឧត្តមសេនីយ៍អគ្គនាយកអន្តោប្រវេសន៍ បានក្រើនរំលឹកដល់មន្ត្រីអន្តោប្រវេសន៍ប្រចាំច្រកទ្វារអន្តរជាតិ ពង្រឹងកិច្ចសហប្រតិបត្តិការជាមួយក្រុមចត្តាឡីស័ក របស់ក្រសួងសុខាភិបាល ដើម្បីអនុវត្តនូវវិធានទប់ស្កាត់ការរីករាលដាលនៃជំងឺកូវីដ-១៩ តាមការណែនាំរបស់ក្រសួងសុខាភិបាល។
នាថ្ងៃចន្ទ ទី២១ ខែធ្នូ ឆ្នាំ២០២០ វេលាម៉ោង ០៨និង៣០នាទី ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានអញ្ជើញដឹកនាំកិច្ចប្រជុំ ស្តាប់របាយការណ៍ និងត្រៀមផែនការគ្រប់គ្រងច្រកទ្វារអន្តរជាតិ នៅអគ្គនាយកដ្ឋានអន្តោប្រវេសន៍។ ក្នុងកិច្ចប្រជុំនេះដែរ ក៏មានការអញ្ជើញចូលរួមពី ឯកឧត្តម នាយឧត្តមសេនីយ៍ ឧត្តមសេនីយ៍ឯក អគ្គនាយករង, ប្រធាន-អនុប្រធាននាយកដ្ឋាន ព្រមទាំងមន្ត្រីជំនាញដែលពាក់ព័ន្ធ។
មានប្រសាសន៍ក្នុងកិច្ចប្រជុំនេះ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានលើកឡើងពី ការពង្រឹងការងារជំនាញនៅតាមច្រកទ្វារអន្តរជាតិ ជាពិសេសច្រកទ្វារអាកាសយានដ្ឋានអន្តរជាតិភ្នំពេញ និងពង្រឹងកិច្ចសហប្រតិបត្តិការជាមួយក្រុមចត្តាឡីស័ក របស់ក្រសួងសុខាភិបាល ដើម្បីអនុវត្តនូវវិធានទប់ស្កាត់ការរីករាលដាលនៃជំងឺកូវីដ-១៩ តាមការណែនាំរបស់ក្រសួងសុខាភិបាល។
ក្នុងឱកាសនេះដែរ ឯកឧត្តម នាយឧត្តមសេនីយ៍ អគ្គនាយក បានក្រើនរម្លឹកដល់មន្ត្រីអន្តោប្រវេសន៍ ប្រចាំច្រកទ្វារអន្តរជាតិ ឲ្យយកចិត្តទុកដាក់រក្សាគម្លាតបុគ្គល រក្សាអនាម័យលាងដៃនឹងសាប៊ូ អាកុល ឬជែល និងប្រុងប្រយ័ត្នការឆ្លងពីអ្នកដំណើរ ដែលចូលមកព្រះរាជាណាចក្រកម្ពុជា៕រក្សាសិទ្ធិដោយ ៖ បញ្ញាស័ក្តិ
