ភ្នំពេញ៖ បច្ចុប្បន្នភាពអំពីវឌ្ឍនភាពនៃការអនុវត្តការចិញ្ចឹមត្រីអណ្តែង និងកង្កែប រយៈពេល ៥ខែ ដែលបានចាប់ផ្តើមតាំងថ្ងៃទី២៥ ខែកក្កដា រហូតដល់ខែធ្នូ ឆ្នាំ២០២០នេះ ក្នុងខេត្តគោលដៅសរុបចំនួន ១៥ បន្ទាប់ពីសម្តេចតេជោ បានដាក់ចេញយុទ្ធនាការជំរុញ ប្រជាពលរដ្ឋឲ្យខិតខំបង្កើន និងពង្រឹងភាពម្ចាស់ការក្នុងការផលិត ធានាបាននូវសន្តិសុខស្បៀង ការផ្គត់ផ្គង់ទីផ្សារ ការបង្កើតឱកាសការងារតាមរយ:ការចិញ្ចឹមត្រី-កង្កែប ជាលក្ខណៈគ្រួសារក្នុងក្របខណ្ឌបច្ចេកទេសសមស្រប សាមញ្ញ ប្រើប្រាស់រយៈពេលខ្លី ចំណាយដើមទុនតិច ទទួលបានផលច្រើន រក្សាបាននូវស្ថានភាពជីវភាពប្រក្រតីតាមគន្លងថ្មីក្នុងអំឡុងពេលនៃការរីករាលដាលនៃជំងឺឆ្លងកូវីដ-១៩ សម្តេចតេជោបានជួយឧបត្ថម្ភថវិកាចំនួន ២.០០០លានរៀលសម្រាប់អនុវត្តកម្មវិធីនេះផងដែរ។
ឯកឧត្តម វេង សាខុន បានបង្ហាញលទ្ធផលសរុបទាំង១៥ខេត្ត ក្នុងនោះ កសិករសរុបចំនួន ១.២២៨ គ្រួសារ ដែលចិញ្ចឹមត្រីអណ្ដែង ៩៩០គ្រួសារ និងចិញ្ចឹមកង្កែប ២៣៨គ្រួសារ មានកូនត្រីអណ្ដែងសរុបចំនួនជាង ៦៩ម៉ឺនក្បាល និងកូនកង្កែបសរុបចំនួនជាង ៩ម៉ឺន ៥ពាន់ក្បាល។
ចំណែកទិន្នផលត្រីអណ្តែង ៩៩តោន និងកង្កែប ១៩តោន ហើយគិតជាទឹកប្រាក់ត្រីអណ្តែងបានចំនួន ៦៩៣លានរៀល (តម្លៃ ៧០០០រៀលក្នុងមួយគីឡូក្រាម) និងកង្កែប ១៩០លានរៀល (តម្លៃ ១០.០០០រៀល ក្នុងមួយគីឡូក្រាម) សរុបរួមប្រមូលចំណូលបាន ៨៨៣លានរៀល។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ពិតមែនតែយើងជួបវិបត្តិលើវិស័យមួយចំនួន ដូចជាវិស័យឧស្សាហកម្ម និងវិស័យសេវាកម្មជាដើម ក៏ប៉ុន្តែវិស័យកសិកម្ម គឺជាវិស័យមួយដែលនៅមានភាពល្អប្រសើរបំផុត ពីព្រោះវិស័យនេះវាបានធានាដល់បញ្ហាស្បៀងអាហារនៅក្នុងស្រុក និងការនាំចេញទៅកាន់ទីផ្សារបរទេស ខណៈកម្ពុជាមានផ្ទៃដីស្រែចម្ការដាំដុះដំណាំកសិកម្ម ប្រមាណ ៤លានហិកតា។ សម្តេចតេជោ បានលើកឡើងទៀតថា នៅក្នុងវិបត្តិជំងឺកូវីដ-១៩នេះ តម្រូវការសម្ភារប្រើប្រាស់ផ្សេងៗអាចនឹងថយចុះ ប៉ុន្តែតម្រូវការស្បៀងអាហារនឹងមិនថមថយនោះទេ។
គួរបញ្ជាក់ថា ក្នុងកាលៈទេសៈនៃវិបត្តិកូវីដ-១៩នេះ សម្តេចតេជោនាយករដ្ឋមន្ត្រី បានឱ្យដឹងថា កម្ពុជាសូមប្រកាសចូលរួមក្នុងខ្សែចង្វាក់ផ្គត់ផ្គង់ស្បៀងក្នុងតំបន់ ក្នុងនោះដូចជា ការផ្គត់ផ្គង់ស្រូវអង្ករ និងត្រី ជាដើម។ កម្ពុជា នឹងប្រែក្លាយវិបត្តិកូវីដ-១៩នេះ ឲ្យទៅជាឱកាសនៃវិស័យកសិកម្ម ហើយកម្លាំងដែលបាត់បង់ពីវិស័យឧស្សាហកម្ម នឹងបង្វែរមកវិស័យកសិកម្មវិញ៕
រក្សាសិទ្ធិដោយ៖CEN