គណៈកម្មការមូលបត្រកម្ពុជា (គ.ម.ក.) និងគណៈកម្មការមូលបត្រថៃ (Securities and Exchange Commission, Thailand-SEC-Thailand) នៅព្រឹកថ្ងៃទី២២ ខែធ្នូ ឆ្នាំ២០២០ បានសហការគ្នារៀបចំវគ្គបណ្ដុះបណ្ដាល និងកសាងសមត្ថភាពតាមប្រព័ន្ធអនឡាញសម្រាប់មន្ត្រីនៃ គ.ម.ក. ស្តីពី “ការអនុវត្ដនូវវិធីសាស្ដ្រត្រួតពិនិត្យអនុលោមភាពផ្អែកតាមហានិភ័យចំពោះក្រុមហ៊ុនចុះបញ្ជីលក់មូលបត្រ។
វគ្គបណ្តុះបណ្តាលនេះមានការចូលរួមជាអធិបតីពីសំណាក់ លោក ស៊ូ សុជាតិ អគ្គនាយកនៃ គ.ម.ក. និងលោកស្រី Ruenvadee Suwanmongkol អគ្គលេខាធិការនៃគណៈកម្មការមូលបត្រថៃ។
វគ្គបណ្ដុះបណ្ដាលនេះ ត្រូវបានរៀបចំឡើងដោយផ្តោតជាសំខាន់ទៅលើផ្នែកធំៗចំនួន ៣ រួមមាន៖ ទី១). ការវិនិច្ឆ័យតាមដានរបាយការណ៍ហិរញ្ញវត្ថុរបស់ក្រុមហ៊ុនចុះបញ្ជីលក់មូលបត្រ ទី២). បញ្ជីដើម្បីត្រួតពិនិត្យមើលនូវរបាយការណ៍ហិរញ្ញវត្ថុរបស់ក្រុមហ៊ុនចុះបញ្ជីលក់មូលបត្រ និង ទី៣). យន្តការ និងឧបករណ៍ត្រួតពិនិត្យមើលនូវអនុលោមភាពនៃការពិនិត្យឡើងវិញនូវរបាយការណ៍ហិរញ្ញវត្ថុរបស់ក្រុមហ៊ុនចុះបញ្ជីលក់មូលបត្រដែលបានធ្វើសវនកម្ម និងករណីសិក្សាជាក់ស្ដែង។
វគ្គបណ្ដុះបណ្ដាលខាងលើ មានសិក្ខាកាមចូលរួមសរុបចំនួន ៥៨ នាក់ ដែលមានសមាសភាពជាថ្នាក់ដឹកនាំ និងមន្ដ្រីនៃនាយកដ្ឋានពាក់ព័ន្ធនៃ គ.ម.ក.៕ រក្សាសិទ្ធិដោយ ៖ CEN
