ភ្នំពេញ៖ នៅថ្ងៃទី២៣ ខែធ្នូ ឆ្នាំ២០២០នេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានកំណត់ជាថ្ងៃបោះឆ្នោតជ្រើសរើសប្រធានសមាគម និងក្រុមប្រឹក្សាភិបាលនាអាណត្តិទី៧ សម្រាប់ឆ្នាំ២០២១-២០២២។
បើតាមសេចក្តីប្រកាសព័ត៌មានរបស់សមាគម គណៈកម្មការរៀបចំការបោះឆ្នោត នឹងរៀបចំកិច្ចប្រជុំមួយតាមរយៈកម្មវិធី Zoom ចាប់ពីម៉ោង៩-១០ ព្រឹក ដើម្បីឃោសនាបេក្ខភាពឈរឈ្មោះថ្នាក់ដឹកនាំសមាគមនីមួយៗដល់សមាជិកដែលមានសិទ្ធបោះឆ្នោតចំនួន១០២ ក្រុមហ៊ុន។
សមាជិករបស់សមាគមអាចមកបោះឆ្នោតនៅទីស្នាក់ការសមាគម ចាប់ពីម៉ោង ៩ព្រឹក ដល់ម៉ោង ៤ល្ងាច ដោយតម្រូវឱ្យមានការជួបជុំមិនលើសពី២០នាក់ ដើម្បីរក្សាគម្លាត ក្នុងការទប់ស្កាត់ជំងឺកូវីដ-១៩ តាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល។
សម្រាប់អាណត្តិឆ្នាំ២០២១-២០២២ មានបេក្ខជនពីររូបគឺលោកច្រឹក សុខនីម នាយកប្រតិបត្តិក្រុមហ៊ុន Mekong Brokerage Co., Ltd និងលោក វ៉ន ចាន់ថន នាយកប្រតិបត្តិក្រុមហ៊ុន Town City Real Estate Co., Ltd បានឈរឈ្មោះជាបេក្ខភាពប្រធានសមាគម CVEA ហើយបេក្ខជនម្នាក់នឹងត្រូវបានជ្រើសរើសជាប្រធានដឹកនាំក្នុងអាណត្តិថ្មីនេះ។ ដូចគ្នានេះដែរ CVEA ក៏នឹងធ្វើការបោះឆ្នោតជ្រើសរើសប្រធានក្រុមប្រឹក្សាភិបាលរបស់សមាគមផងដែរ ដែលមានបេក្ខភាពឈរឈ្មោះចំនួន៦រូបរួមមាន អ្នកស្រី ហ្គ្រេស រចនីហ្វុង លោកខាត់ សុវណ្ណ លោកលីម សុជាតិ លោកគុយ វ៉ាត លោកវ៉ា វីរៈ និងលោក ឌិត ចាន់ណា។
ការបោះឆ្នោតជ្រើសរើសប្រធានសមាគម និងប្រធានក្រុមប្រឹក្សាភិបាល ចាប់ផ្តើមបោះ និងរាប់សន្លឹកឆ្នោតនៅវេលាម៉ោង ៣រសៀលថ្ងៃទី២៣ ខែធ្នូ ឆ្នាំ២០២០នេះ។
បច្ចុប្បន្នសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានសមាជិកជាង១០០ក្រុមហ៊ុន។ សមាគមនេះត្រូវបានបង្កើតដំបូងនៅខែ សីហា ឆ្នាំ ២០០៨ ដែលមានឈ្មោះដើមថា សមាគមអ្នកវាយតម្លៃអចលនវត្ថុ កម្ពុជា( NVAC )។ បន្ទាប់មកត្រូវបានប្តូរឈ្មោះមកជា សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នៅថ្ងៃទី០៧ ខែមេសា ឆ្នាំ២០១១។
សូមជម្រាបថា ក្នុងអាណត្តិទី១ និងទី ២ សមាគមនេះត្រូវបានដឹកនាំដោយលោក ស៊ឹង ប៉ុណ្ណា អគ្គនាយកក្រុមហ៊ុនប៉ុណ្ណា រៀលធីគ្រុប ហើយលោកឧកញ៉ា ចេង ខេង អគ្គនាយកក្រុមហ៊ុនកម្ពុជា ស៊ីភីអិល បានជាប់ជាប្រធានក្នុងអាណត្តិទី៣ដោយឡែកអាណត្តិទី៤ និងទី៥ ត្រូវបានដឹកនាំដោយលោកបណ្ឌិត គីម ហ៊ាង និងអាណតិ្តទី៦ ដឹកនាំដោយលោក ច្រឹក សុខនីម ដែលជាប្រធានសមាគមនាពេលបច្ចុប្បន្ន៕
រក្សាសិទ្ធិដោយ៖CEN