ភ្នំពេញ÷ សង្សារមួយគូបានបើករថយន្តក្នុងល្បឿនលឿនមិនប្រយ័ត្នក៏ជ្រុលទៅបុកនឹងទ្រូងផ្លូវពេញទំហឹងបណ្តាលឲ្យបាក់អស់ ២កង់រួចបន្តទៅបុករះម៉ូតូកម្មករស៊ីនទ្រីមួយគ្រឿងទៀតបណ្តាលឲ្យរងការខូចខាត ចំណែកឯសង្សារមួយគូក៏រត់គេចចេញពីកន្លែងកើតហេតុបាត់ស្រមោល។
ហេតុការណ៍នេះដែរកើតឡើងនៅវេលាម៉ោង ១ និង ៥០ នាទីយប់រំលងអធ្រាត្រឈានចូលថ្ងៃព្រហស្បតិ៍ទី ២៤ ខែធ្នូឆ្នាំ ២០២០ ស្ថិតនៅតាមបណ្ដោយផ្លូវសហព័ន្ធរុស្ស៊ីក្នុងសង្កាត់ស្រះចកខណ្ឌដូនពេញ រាជធានីភ្នំពេញ។
បើយោងតាមប្រភពព័ត៌មានពីបងប្រុសជាកម្មករស៊ីនទ្រីបានបញ្ជាក់ថាមុនពេលកើតហេតុគាត់បានឃើញបុរសស្ត្រីពីរនាក់ទំនងជាគូសង្សារបានបើករថយន្តម៉ាក Lexus NH250 មួយគ្រឿង ពណ័ ស ដែលពាក់ផ្លាកលេខ ភ្នំពេញ 2AG 5253 ធ្វើដំណើរក្នុងទិសដៅពីលិចមកកើតក្នុងល្បឿនលឿន ខណៈមកដល់ចំណុចកើតហេតុក៏ជ្រុលទៅបុកទ្រូងផ្លូវពេញទំហឹងបណ្តាលឲ្យបាក់អស់២កង់រួចបន្តទៅបុកនិងម៉ូតូមួយគ្រឿងទៀតបណ្តាលឲ្យរងការខូចខាតយ៉ាងដំណំ ។ ហើយសំណាងណាស់ដែតៃកុងរថយន្តនិងស្ត្រីរួមដំណើរជាសង្សារមិនមានរងរបួសនោះទេរងការខូចខាតតែរថយន្តផ្ទៃខាងមុខស្ទើរទាំងស្រុង។
ក្រោយពេលកើតហេតុសមត្ថកិច្ចមូលដ្ឋានចុះមកដល់រួចក៏ប្រគល់តួនាទីនេះទៅខាងចរាចរណ៍ជំនាញក្រុងចុះមកវាស់វែងនិងធ្វើកំណត់ហេតុយករថយន្តស្ទូចមកស្ទូចយករថយន្តបង្ករហេតុខាងលើទៅរក្សាទុកនៅចរាចរណ៍ផ្លូវគោករង់ចាំដោះស្រាយនៅពេលក្រោយ៕ រក្សាសិទ្ធិដោយ៖សាមេត
