ភ្នំពេញ៖បុរសម្នាក់សង្ស័យប្រើប្រាស់គ្រឿងញៀនហួសកម្រិត ចេញពីក្នុងសួនច្បារមកគំរាមបុរសម្នាក់ជាអ្នកដឹកអីវ៉ាន់អនឡាញ យកសោពីម៉ូតូពីជនរងគ្រោះ ត្រូវបានជនរងគ្រោះប្រតាយប្រតប់ស្រែកឲ្យគេជួយ ចាប់ឃាត់ខ្លួនប្រគល់ឱ្យសមត្ថកិច្ច។
ហេតុការណ៍ខាងលើនេះ បង្កឱ្យមានការភ្ញាក់ផ្អើលនៅវេលាម៉ោង ១២ និង ៣០ នាទីថ្ងៃត្រង់នាថ្ងៃទី ២៤ ខែធ្នូ ឆ្នាំ ២០២០ ស្ថិតនៅត្រង់ចំណុចរង្វង់មូលនាងមច្ឆា ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
ជនសង្ស័យមានឈ្មោះយិន ណុចភេទប្រុស អាយុ២១ឆ្នាំមុខរបរកម្មករសំណង់ មានទីលំនៅមិនពិតប្រាកដ ចំណែកជនរងគ្រោះមានឈ្មោះ ចាន់វ៉ាន ឌី មុខរបរជាអ្នកដឹកអីវ៉ាន់តាមអនឡាញ មានទីលំនៅស្នាក់នៅម្ដុំកាណាឌីយ៉ា ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានពីជនរងគ្រោះ បានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូតូមួយគ្រឿងម៉ាក zoomer x ពណ៌ក្រហមពាក់ ផ្លាកលេខភ្នំពេញ1FH6407 បានធ្វើដំណើរចេញពីលើស្ពានដែកបាឡេ មកដល់ចំណុចរង្វង់មូលនាងមច្ឆា ជនរងគ្រោះបានឈប់ម៉ូតូក្នុងគោលបំណងយកទូរស័ព្ទ ខលទៅរកអតិថិជនដើម្បីយកអីវ៉ាន់អនឡាញ ខណៈពេលដែលជនរងគ្រោះ កំពុងតែខលទូរស័ព្ទស្រាប់តែលេចមុខជនសង្ស័យម្នាក់ ចេញមកពីក្នុងសួនច្បារមកទះស្មាពីរបីដៃ គំរាមទេយកសោម៉ូតូ ភ្លាមនោះត្រូវបានជនរងគ្រោះ មិនឲ្យក៏មានការប្រតាយប្រតប់គ្នា ហើយបានស្រែកឲ្យគេជួយ ខណៈនោះត្រូវបានប្រជាពលរដ្ឋ រួមទាំងសន្តិសុខការពារនៅជិតកន្លែងឯង កើតហេតុបានចេញមកជួយ ហើយចាប់ជនសង្ស័យ ចងស្លាបសេករាយការណ៍ប្រាប់ទៅសមត្ថកិច្ចមូលដ្ឋាន។
ក្រោយកើតហេតុពេលសមត្ថកិច្ច មកដល់ក៏បាននាំខ្លួនជនសង្ស័យ យកទៅកាន់នគរបាលប៉ុស្តិ៍ជ្រោយចង្វា ដើម្បីសាកសួរកសាងសំណុំរឿង បញ្ជូនទៅអធិការដ្ឋាននគរបាលខណ្ឌជ្រោយចង្វា បន្តចាត់ការទៅតាមនីតិវិធីច្បាប់៕ រក្សាសិទ្ធិដោយ ៖ពន្លឺ