ភ្នំពេញ៖ រាជរដ្ឋាភិបាលកម្ពុជា បានសម្រេចលើកលែងពន្ធប្រថាប់ត្រាសម្រាប់អ្នកទិញផ្ទះដែលមានតម្លៃទាបជាង ឬស្មើ ៧ម៉ឺនដុល្លារអាមេរិក ដោយគិតចាប់ពីខែមករា ឆ្នាំ២០២១ ដល់ដំណាច់ខែធ្នូ ឆ្នាំ២០២១ ។
ជាមួយគ្នានេះ ម្ចាស់គម្រោងសង់លំនៅឋាន ដែលមានអាជ្ញាប័ណ្ណស្របច្បាប់មួយចំនួន បានរីករាយនិងត្រេកអរ និងការសម្រេចចិត្តរបស់រាជរដ្ឋាភិបាល ដែលរំពឹងថា នឹងជួយពន្លឿនដល់ការលក់របស់ខ្លួន និងជួយរួមចំណែកជំរុញដល់កំណើនវិស័យអចលនទ្រព្យ និងសំណង់នៅកម្ពុជា។
ក្រុមអ្នកអភិវឌ្ឍន៍លំនៅដ្ឋាននៅកម្ពុជា បានបង្ហាញពីការត្រេកអរ នៅពេលទទួលបានព័ត៌មាននេះ ដែលវានឹងពន្លឿនដល់ការលក់របស់ក្រុមហ៊ុន ដែលមានអាជ្ញាប័ណ្ណគ្រប់គ្រាន់ទាំងពីក្រសួងរៀបចំដែនដី និងក្រសួងសេដ្ឋកិច្ច ប៉ុន្តែសម្រាប់ក្រុមហ៊ុនសាងសង់លំនៅឋានខ្នាតតូចដែលពុំមានអាជ្ញាប័ណ្ណ នឹងនៅតែបន្តបង់ពន្ធប្រថាប់ត្រាចំនួន ៤ភាគរយដដែល។
បើតាមលោកឧកញ៉ាបណ្ឌិត គីម ហ៊ាង ប្រធានក្រុមហ៊ុន KW Cambodia ដែលមានជំនាញក្នុងវិស័យអចលនទ្រព្យជាច្រើនឆ្នាំមកហើយ បានឲ្យដឹងថា បច្ចុប្បន្នក្រុមហ៊ុនអភិវឌ្ឍន៍លំនៅឋាននៅកម្ពុជា ភាគច្រើន មិនមានអាជ្ញាប័ណ្ណគ្រប់គ្រាន់ទេ ដូច្នេះពួកគេនឹងត្រូវជាប់ពន្ធនេះដដែល តែរាជរដ្ឋាភិបាលធ្វើបែបនេះ គឺជួយលើកទឹកចិត្តដល់ក្រុមហ៊ុនដែលមានការចុះបញ្ជីត្រឹមត្រូវ ហើយជំរុញឲ្យក្រុមហ៊ុន ដែលមិនបានចុះបញ្ជីទាំងនោះ មកស្នើសុំអាជ្ញាប័ណ្ណពីក្រសួងជំនាញ។ តែយ៉ាងណាក៏ដោយអ្នកជំនួញក្នុងវិស័យអចលនទ្រព្យរូបនេះយល់ឃើញថា ប្រសិនបើរាជរដ្ឋាភិបាលផ្តល់ការអនុគ្រោះដល់ក្រុមហ៊ុនអភិវឌ្ឍន៍លំនៅឋានទាំងអស់ ទោះជាគ្មានច្បាប់ក្តី និងមានច្បាប់ក្តី ក្នុងស្ថានភាពពេលនេះ គឺវាកាន់តែល្អប្រសើរ។
រាជរដ្ឋាភិបាល ក៏អំពាវនាវដល់ក្រុមហ៊ុនអភិវឌ្ឍន៍លំនៅឋានទាំងអស់ ឱ្យចូលរួមជាមួយរាជរដ្ឋាភិបាល ក្នុងការបញ្ចុះថ្លៃផ្ទះ ទៅតាមលទ្ធភាពដែលអាចធ្វើទៅបាន។
យោងតាមសេចក្ដីណែនាំអំពីវិធានការបន្ថែម ដើម្បីបន្តគ្រប់គ្រងផលប៉ះពាល់លើវិស័យសំខាន់ៗ នៃសេដ្ឋកិច្ច នៅក្នុងបរិការណ៍នៃវិបត្តិ ការស្ដារ និងលើកជំរុញកំណើនសេដ្ឋកិច្ចកម្ពុជា ក្រោយពីវិបត្តិនៃជំងឺកូវីដ១៩ បានបញ្ជាក់ថា ការលើកលែងពន្ធប្រថាប់ត្រាសម្រាប់អ្នកទិញផ្ទះដែលមានតម្លៃទាបជាង ៧ម៉ឺនដុល្លារ គឺសម្រាប់អ្នកទិញពីក្រុមហ៊ុនអភិវឌ្ឍន៍លំនៅឋានដែលចុះបញ្ជីនៅក្រសួងសេដ្ឋកិច្ច និងហិរញ្ញវត្ថុ និង/ឬ នៅតាមមន្ទីរសេដ្ឋកិច្ច និងហិរញ្ញវត្ថុ តែប៉ុណ្ណោះ៕
រក្សាសិទ្ធិដោយ៖CEN