ភ្នំពេញ៖ លោកឧត្តមសេនីយ៍ទោ អ៊ុក គឹមលី បន្ទាប់ពីត្រូវបានប្រជាពលរដ្ឋ ៤ គ្រួសារ ប្ដឹងទៅក្រសួងការពារជាតិ ឲ្យជួយអន្តរាគមន៍រកយុត្តិធម៌ជូនពួកគាត់ករណី លោកឧត្តមសេនីយ៍ទោរូបនេះ បន្លំឯកសារ និងរំលោភយកដីធ្លីរបស់ពួកគាត់នោះ ពេលនេះ ត្រូវ លោក ប៉ែន នួន ចាងហ្វាងការផ្សាយគេហទំព័រស្រទាប់យុវវ័យ ប្ដឹងទៅអង្គភាពប្រឆាំងអំពើពុករលួយ ( ACU ) ព្រមទាំងប្ដឹងមន្ត្រីតុលាការនៃសាលាដំបូងខេត្តឧត្តរមានជ័យ ជាច្រើនរូបទៀត។
បើយោងតាមពាក្យបណ្ដឹង ចុះថ្ងៃទឹ២៤ ខែធ្នូ ឆ្នាំ២០២០ របស់លោក ប៉ែន នួន បានសរសេរថា កម្មវត្ថុ ៖ សុំប្ដឹងបុគ្គលចំនួន ០៥រូប មាន ៖
ទី១ ៖ លោក ស៊ឹម ពិចិត្រ មានតួនាទីជាចៅក្រមជំនុំជម្រះ សាលាដំបូងខេត្តឧត្ដរមានជ័យ។
ទី២ ៖ លោក គង់ រតនា ព្រះរាជអាជ្ញារងអមសាលាដំបូងខេត្តឧត្ដរមានជ័យ។
ទី៣ ៖ លោក អ៊ុក គឹមលី ឋានៈ ឧត្ដមសេនីយ៍ ទោ មានតួនាទីជានាយរងទីចាត់ការ ការងារព្រំដែន នៅអគ្គបញ្ជាការកងទ័ពជើងគោក។
ទី៤ ៖ លោក យឹម សេន ឋានៈ វរសេនីយ៍ទោ មានតួនាទីជាអនុប្រធានក្រុមការងារទំនាក់ទំនងព្រំដែនកម្ពុជាថៃ ប្រចាំច្រកទ្វាអន្តរជាតិអូរស្មាច់។
ទី៥ ៖ លោក គឹម សំណាង មានតួនាទីជាអនុប្រធានការិយាល័យភូមិបាលស្រុកអន្លង់វែង។
តបតាមកម្មវត្ថុខាងលើ ៖ លោក ស៊ឹម ពិចិត្រ ចៅក្រមជំនុំជម្រះ និងលោក គង់ រតនា ព្រះ រាជអាជ្ញារង កាន់សំនុំរឿងរបស់ លោកផ្កាយពីរ អ៊ុក គឹមលី និងលោកស័ក្ដិបួនកន្លះ ឈ្មោះ យឹម សេន បានប្រើប្រាស់ឯកសារលិខិតកាន់កាប់ និងប្រើប្រាស់ដីធ្លីក្លែងបន្លំ ខុសទីតាំងភូមិ ចុះវាស់វែងចេញដោយលោក គឹម សំណាង អនុប្រធានការិយាល័យភូមិបាលស្រុកអន្លង់វែង នៅថ្ងៃទី០៥ ខែមេសា ឆ្នាំ២០១៩ ឱ្យទៅឈ្មោះ អ៊ុក គឹមលី និងឈ្មោះ យឹម សេន ជាន់លើដីកម្មសិទ្ធិរបស់យើងខ្ញុំ និងពលរដ្ឋចំនួន ០៤គ្រួសារ ដែលមានលិខិតកាន់កាប់ប្រើប្រាស់ទទួលស្គាល់ដឹងឮពីអាជ្ញាធរភូមិ – ឃុំ ។
នៅថ្ងៃទី១៩ ខែវិច្ឆិកា ឆ្នាំ២០២០ ចៅក្រមជំនុំជម្រះ ឈ្មោះ ស៊ឹម ពិចិត្រ និងព្រះរាជអាជ្ញារងលោក គង់ រតនា កាត់ក្ដីឱ្យខ្ញុំបាទ ប៉ែន នួន ចាងហ្វាងការផ្សាយគេហទំព័រស្រទាប់យុវវ័យ សងជំងឺចិត្ត អោយទៅឈ្មោះ អ៊ុក គឹមលី ចំនួន ៤០លានរៀល (សែសិបលានរៀល) និងសងជំងឺចិត្រ អោយទៅឈ្មោះ យឹម សេន ៤០លានរៀល (សែសិបលានរៀល) និងផាកពិន័យចូលរដ្ឋ ៥លានរៀល (ប្រាំលានរៀល) ដោយចោទប្រកាន់ខ្ញុំបាទ ពីបទ” បរិហារកេរ្ដិ៍ ” ដែលខ្ញុំបាទ ប៉ែន នួន បានចុះផ្សាយតាមផេកអង្គភាពសាព័ត៌មានស្រទាប់យុវវ័យ ដែលខ្ញុំបាទ ជាម្ចាស់កម្មសិទ្ធិដីធ្លី រងគ្រោះពិតប្រាកដមួយរូបក្នុងចំណោមពលរដ្ឋរងគ្រោះ ០៤គ្រួសារ ដែលលោកផ្កាយពីរ អ៊ុក គឹមលី និងលោកស័ក្ដិ បួនកន្លះ ឈ្មោះ យឹម សេន រំលោភយកអស់ ចំនួន ០៦ហិកតា ស្ថិតនៅជាប់ផ្លូវបារាំង ក្នុងភូមិទួលស្វាយសែនជ័យ ឃុំត្រពាំងតាវ ស្រុកអន្លង់វែង ខេត្តឧត្ដរមានជ័យ។
នៅក្នុងសវនាការ ពលរដ្ឋម្ចាស់ដីចំនួន ០៣នាក់ បានចូលធ្វើសាក្សី សុំឆ្លើយបំភ្លីជុំវិញរឿងរ៉ាវបណ្ដឹងចោទប្រាន់របស់លោក អ៊ុក គឹមលី តែត្រូវបានលោក ស៊ឹម ពិចិត្រ ចៅក្រមជុំនំជម្រះ បដិសេធ ព្រោះគ្មានឈ្មោះកោះអញ្ជើញអោយចូលរួម។
យោងតាមការចុះផ្សាយតាមផេកអង្គភាពព័ត៌មានស្រទាប់យុវវ័យ កាលពីថ្ងៃទី០៦ ខែតុលា ឆ្នាំ២០១៩ ក្រោមចំណងជើងថា ៖ ពលរដ្ឋទប់កំហឹងមិនបាន ចោទលោកផ្កាយពីរ អ៊ុក គឹមលី ថា ជាផ្កាយចោរ លួច និងប្លន់ ដីរបស់ពួកគាត់ យកទៅកាយស្រះ សង់ផ្ទះ និងដាំដំណាំ ស្ដែងៗនៅនឹងមុខ។
ដោយឡែកក្នុងពាក្យបណ្ដឹងមួយទៀតរបស់ប្រជាពលរដ្ឋ ទៅកាន់ក្រសួងការពារជាតិ បានជម្រាបជូន សម្ដេចពិជ័យសេនា ទៀ បាញ់ ថា ” លោកផ្កាយពីរ អ៊ុក គឹមលី និងលោកវរសេនីយ៍ទោ យឹម សេន យកអំណាចខ្លួនជាយោធាមករំលោភយក នឹងកាយស្រះដាំដំណាំស្វាយ ធ្វើផ្ទះនៅលើដីរបស់ពួកខ្ញុំទាំងបំពាន។ សូមបញ្ជាក់ថា នៅឆ្នាំ ២០១៥ ទីតាំងខាងលើនេះមានវិវាទជាមួយប្រជាពលរដ្ឋ ២១គ្រួសារនៅលើផ្ទៃដី ១៤០ហិកតាជាមួយនឹងលោកផ្កាយពីរ អ៊ុក គឹមលី ។
នៅថ្ងៃទី ២៤ ខែកុម្ភៈ ឆ្នាំ២០១៥ លោកផ្កាយពីរ អ៊ុក គឹមលី បានព្រមព្រៀងបញ្ចប់វិវាទដីធ្លីជាមួយប្រជាពលរដ្ឋ ២១គ្រួសារ ដែលមានការបែងចែកព្រំប្រទល់ច្បាស់លាស់ និងចូលរួមពីសំណាក់លោក ស៊ី ប្រាសិទ្ធ អភិបាលរងខេត្តឧត្តរមានជ័យ និងអភិបាលរងស្រុកអន្លង់វែង មេឃុំ ជាប់ព្រំប្រទល់ទាំងអស់ ការិយាល័យភូមិបាល មេភូមិ និងមន្ត្រីពាក់ព័ន្ធគ្រប់ស្ថាប័ន បានចូលរួមទៅដល់ទីតាំងដី និងចូលរួមប្រជុំធ្វើកំណត់ហេតុនៅក្នុងសាលាស្រុកអន្លង់វែង ដើម្បីបញ្ចប់រឿងរួចរាល់ ។ ប៉ុន្តែបែរជាលោកផ្កាយពីរ អ៊ុកលី បានរំលោភលើកិច្ចព្រមព្រៀងរបស់ខ្លួន ក្បត់នឹងកិច្ចសន្យាមកបំពានយកសាជាថ្មីទៀត ។
ក្នុងការឆ្លើយបំភ្លឺបកស្រាយជាមួយ CEN កាលពីល្ងាចថ្ងៃទី២៥ ខែធ្នូ ឆ្នាំ២០២០ លោកឧត្តមសេនីយ៍ទោ អ៊ុក គឹមលី បានបញ្ជាក់ប្រាប់ថា លោកធ្វើទៅតាមផ្លូវច្បាប់ បើប្រជាពលរដ្ឋរកឃើញកំហុស ឬក៏អ្វីដែលលោកបំពាន គាត់ធ្វើទៅតាមច្បាប់ទៅ ។ លោកបានបញ្ជាក់ថា “រឿងនេះ ជារឿងដដែលៗ យូរមកហើយ ឥឡូវខ្ញុំក៏កំពុងដំណើរការតាមផ្លូវច្បាប់ទាក់ទងគាត់បរិហាកេរ្តិ៍ខ្ញុំ វាអត់មានមូលដ្ឋាន ហើយគាត់បំពានខ្ញុំ ខ្ញុំក៏មានសិទ្ធិរបស់ខ្ញុំដែរ បើគាត់រកឃើញចំណុចណាដែលខ្ញុំធ្វើខុស គាត់ប្តឹងខ្ញុំទៅ អត់បញ្ហាទេ ព្រោះយើងរស់នៅក្រោមច្បាប់ដូចគ្នា បើអ្នកណាបំពានអ្នកណា អ្នកនឹងទទួលខុសត្រូវ ព្រោះខ្ញុំអត់ដែលបំពានគេទេ បើរកឃើញថា ខ្ញុំបំពាន រកភស្តុតាងមកដាក់បន្ទុកខ្ញុំទៅ”។
ទាក់ទិននឹងវិវាទដីធ្លីរវាង លោកឧត្តមសេនីយ៍ទោ អ៊ុក គឹមលី , លោក យឹម សេន ជាមួយប្រជាពលរដ្ឋ ៤គ្រួសារ ខាងលើនេះ មហាជនបានលើកឡើងថា ការកាត់ក្ដីរបស់សាលាដំបូងខេត្តឧត្តរមានជ័យ ដែលសម្រេចឲ្យភាគីលោកឧត្តមសេនីយ៍ទោអ៊ុកគឹមលីឈ្នះក្ដីពីប្រជាពលរដ្ឋនេះ អាចបង្កប់ជាមួយនឹងការប្រើអំណាចតួនាទី និងទឹកប្រាក់ ដូច្នេះមានតែ អង្គភាពប្រឆាំងអំពើពុករលួយ ( ACU ) នោះទេ ដែលអាចលាងជម្រះការពាក់ព័ន្ធនឹងអំពើពុករលួយបក្ខពួកនិយម និងអំណាចតួនាទី ក្នុងរឿងក្ដីនេះបាន ពេលនេះមហាជនកំពុងរង់ចាំមើលការអនុវត្តនីតិវិធីរបស់អង្គភាពប្រឆាំងអំពើពុករលួយ, ពាក់ព័ន្ធនឹងករណីនេះដែរ CEN បានព្យាយាមស្វែងរកការបំភ្លឺពីមន្ត្រីតុលាការខេត្តឧត្ដមានជ័យផងដែរ ប៉ុន្តែមិនអាចទាក់ទងបាន ដោយមិនមានស្គាល់លេខទូរស័ព្ទ៕រក្សាសិទ្ធិដោយ៖CEN