ភ្នំពេញ៖បុរសម្នាក់បើករថយន្តព្រូសបោះពួយឡើងលើស្ពានហង្ស ត្រូវបានម៉ូតូមួយគ្រឿងបើកឆ្លងកាត់ បណ្ដាលឲ្យបុកចំពីហៀងដួលបោកក្បាលរងរបួសយ៉ាងធ្ងន់ធ្ងរ ចំណែកក្មួយដែលជានាក់រួមដំណើរជាមួយនោះរងរបួសស្រាល ត្រូវបានបញ្ជូនយកទៅសង្គ្រោះនៅឯមន្ទីរពេទ្យ ។
ហេតុការណ៍នេះបានកើតឡើង កាលពីវេលាម៉ោង១០នឹង៣០នាទីព្រឹក ថ្ងៃទី២៧ ខែធ្នូ ឆ្នាំ ២០២០ ស្ថិតត្រង់ចំណុចស្ពានហង្ស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៏មានដែលក្រុមការងារយើង ទទួលបានពីប្រជាពលរដ្ឋ នៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុពួកគាត់បានឃើញ បុរសម្នាក់រួមដំណើរជាមួយនឹងក្មួយប្រុសរបស់គាត់ជិះម៉ូតូម៉ាកសង់សេរីឆ្នាំ២០១៧ពណ៌ខ្មៅមួយគ្រឿងដែលមានពាក់ផ្លាកលេខកំពង់ស្ពឺ1J-5712 ជិះធ្វើដំណើរក្នុងទិសដៅពីត្បូងទៅជើង ខណៈពេលមកដល់ចំណុចនឹងស្ពានហង្ស ក៏មានរថយន្តម៉ាកព្រូសពណ៌ទឹកប្រាក់មួយគ្រឿង ពាក់ផ្លាកលេខភ្នំពេញ2-BB6187 បើកបរក្នុងទិសដៅពីលិចទៅកើត យ៉ាងលឿនសំដៅឡើងទៅលើស្ពានហង្សនោះ បណ្ដាលឲ្យបុកទៅលើម៉ូតូរបស់ជនរងគ្រោះតែម្ដង ហើយព្យាយាមបើកបន្តទៅមុខទៀតតែត្រូវបានកម្លាំងសន្តិសុខដែលយាមនៅក្នុងកោះពេជ្រ ធ្វើការឃាត់ទាំងរថយន្តនឹងអ្នកបើកបររង់ចាំសមត្ថកិច្ច ចុះមកដល់សិនដើម្បីធ្វើការដោះស្រាយគ្នា។
ក្រោយកើតហេតុសមត្ថកិច្ចមូលដ្ឋានក៏បានចុះមកដល់ ដើម្បីធ្វើការវាស់វែង និងយករថយន្តបង្កនិងម៉ូតូជនរងគ្រោះទៅរក្សាទុកនៅឯអធិការខណ្ឌចំការមន រង់ចាំដោះស្រាយគ្នាទៅតាមផ្លូវច្បាប់៕ រក្សាសិទ្ធិដោយ៖ហេងវុត្ថា