បាត់ដំបង៖ពលករទើបត្រឡប់មកពីធ្វើការនៅប្រទេសថៃ ដែលឆ្លងកាត់តាមច្រកព្រំដែនជាប់ខេត្តបាត់ដំបង និងខេត្តមួយចំនួនទៀត កំពុងធ្វើចត្តាឡីស័កនៅបាត់ដំបង ត្រូវមន្ត្រីសុខាភិបាលយកសំណាកទៅពិនិត្យរកមេរោគជំងឺកូវីដ១៩ ជាលទ្ធផលអវិជ្ជមានជាបន្តបន្ទាប់។
បើតាមរបាយការណ៍របស់រដ្ឋបាលខេត្តបាត់ដំបង បានឲ្យដឹងថា ខេត្តបាត់ដំបង បច្ចុប្បន្នមានពលករទើបត្រឡប់មកពីប្រទេ
សថៃ ក្នុងអំឡុងការឆ្លងរីករាលដាលក្នុងសហគមន៍ នៃខេត្តសាមុទសាខន មានចំនួនជាង ៨៤០នាក់ កំពុងធ្វើចត្តាឡីស័កក្នុង៦ទីតាំង មាននៅស្រុកកំរៀង ស្រុកសំពៅលូន ស្រុកភ្នំព្រឹក ស្រុកសំឡូត ស្រុកបវេល និងស្រុកមោងឫស្សី ។ ពលករទាំងអស់នេះ ខ្លះរស់នៅខេត្តបាត់ដំបង ដោយពួកគេមួយចំនួន បានធ្វើដំណើរឆ្លងព្រំដែនកម្ពុជា-ថៃ តាមច្រកនានា ជាប់នឹងខេត្តបាត់ដំបងនិងខេត្តបន្ទាយមានជ័យ និងឧត្តរមានជ័យ ត្រូវបានបញ្ជូនពីមក ខណៈពលករមានទីលំនៅក្នុងខេត្តផ្សេងៗទៀត កំពុងធ្វើចត្តាឡីស័ក នៅក្នុងខេត្តបាត់ដំបង មួយចំនួនផងដែរ។
លោក សឿម ប៊ុនរិទ្ធ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង បានមានប្រសាសន៍ថា ក្នុងចំណោមពលករជាង ៨៤០នាក់ ត្រូវបានមន្ត្រីសុខាភិបាលយកសំណាកពិនិត្យរកមេរោគជំងឺកូវីដ១៩ គិតត្រឹមថ្ងៃទី២៧ ខែធ្នូ ឆ្នាំ២០២០ បានចំនួនជាង ៧៥០សំណាក។ ចំពោះសំណាកទាំងអស់ ដែលយកនិងបញ្ជូនទៅពិសោន៍នៅវិទ្យាស្ថានប៉ាស្ទ័រ នៅរាជធានីភ្នំពេញ ជាលទ្ធផលបង្ហាញថាគឺអវិជ្ជមានចំនួន ៣៥៧នាក់ ខណៈសំណាកនៅសល់ នៅមិនទាន់ចេញលទ្ធផលនៅឡើយទេ។
គួរបញ្ជាក់ផងដែរថា សម្រាប់ពលករ កំពុងធ្វើចត្តាឡីស័កនៅបាត់ដំបង ត្រូវបានយកចិត្តទុកដាក់ទាំងការពារសុខសុវត្ថិភាព ការថែរទាំសុខភាព ការផ្ដល់អាហារ ដោយឥតគិតថ្លៃចំនួន ៣ពេល ហើយម្នាក់ៗ បានទទួលនូវឃីតមួយជាអំណោយរបស់សម្ដេចតេជោនាយករដ្ឋមន្ត្រី ក្នុងនោះមាន ភួយ មុងនិងខ្នើយ ហើយពួកគេ ត្រូវបានអនុញ្ញាតឲ្យទទួលសាច់ញាតិមកសួរសុខទុកផងដែរ៕ រក្សាសិទ្ធិដោយ៖អ៊ុងសារុំ
