ភ្នំពេញ៖ រដ្ឋលេខាធិការក្រសួងទេសចរណ៍ ឯកឧត្តម សុង តុងហាប់ បានឱ្យដឹងថា រយៈពេល១០ខែ នៅឆ្នាំ២០២០នេះ អាជីវកម្មទេសចរណ៍បានបើកដំណើរទូទាំងប្រទេស មានចំនួនសរុប ៩.៦០០ទីតាំង រួមមាន សេវាកម្សាន្ត, ភោជនីយដ្ឋាន, ផ្ទះសំណាក់ និងសណ្ឋាគារ ក្នុងនោះមានបុគ្គលិក ដែលបានបម្រើការងារនៅក្នុងវិស័យ នេះ មានចំនួន ១១ម៉ឺននាក់ ខណៈដែលមានអាជីវកម្មទេសចរណ៍ចំនួនជិត ៣.០០០ទីតាំង ត្រូវបានបិទទ្វារ ក្នុងនោះមានបុគ្គលិកចំនួន ៥១.០០០នាក់ បានបាត់បង់ការងារធ្វើផង ដោយសារតែបញ្ហាជំងឺកូវីដ១៩។
ឯកឧត្តមបន្តថា វិស័យទេសចរណ៍នេះ រដ្ឋាភិបាលកម្ពុជា បានបន្តលើកលែងការបង់ពន្ធប្រចាំខែគ្រប់ប្រភេទទាំងអស់ រយៈពេល ៣ខែបន្ថែមទៀត ចាប់ពីខែមករា ដល់ខែមីនា ឆ្នាំ២០២១ សម្រាប់វិស័យសណ្ឋាគារ, ផ្ទះសំណាក់, ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីនៅអគ្គនាយកដ្ឋានពន្ធដារ និងមានសកម្មភាពអាជីវកម្ម នៅក្នុងរាជធានីភ្នំពេញ, ខេត្តសៀមរាប, ខេត្តព្រះសីហនុ, កែប, កំពត, ក្រុងបាវិត និងក្រុងប៉ោយប៉ែតជាដើម ពោលគឺមិនត្រូវបានបង់ពន្ធថ្លៃអាជ្ញាប័ណ្ណដែលត្រូវបានចុះបញ្ជីធ្វើអាជីវកម្មនោះឡើយ ប៉ុន្តែលើកលែងតែពួកគាត់ស្នើសុំបង្កើតអាជ្ញាប័ណ្ណកន្លែងថ្មីនោះ ទើបត្រូវបង់ពន្ធជាធម្មតា។
មន្ត្រីក្រសួងទេសចរណ៍ សង្ឃឹមថា ការបន្តលើកលែងការបង់ពន្ធរយៈពេលបីខែនេះ នឹងជួយជំរុញឲ្យវិស័យទេសចរណ៍នៅកម្ពុជា អាចងើបឡើងវិញជាបណ្តើរៗ ដើម្បីឱ្យភ្ញៀវទេសចរនៅក្នុងស្រុក បានបន្តដំណើរកម្សាន្តនៅតាមរមណីដ្ឋាន និងតំបន់ទេសចរណ៍នៅកម្ពុជា។
គួរបញ្ជាក់ថា ការបន្តលើកលែងការបង់ពន្ធប៉ាតង់ និងពន្ធលើស្លាកយីហោ ចំពោះក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្ម នៅភ្នំពេញ, ខេត្តសៀមរាប, ខេត្តព្រះសីហនុ, កែប, កំពត, ក្រុងបាវិត និងក្រុងប៉ោយប៉ែត ដោយដាក់លិខិតប្រកាសពន្ធលើប្រាក់ចំណូលប្រចាំឆ្នាំ២០២០ យ៉ាងយឺតបំផុតឱ្យបានមុនដំណាច់ខែមីនា ឆ្នាំ២០២១ ប៉ុន្តែមិនតម្រូវឱ្យបង់ពន្ធគ្រប់ប្រភេទ៕ រក្សាសិទ្ធិដោយ ៖ CEN