ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានចេញសេចក្តីប្រកាសព័ត៌មាន ស្តីពីការចុះប្រតិបត្តិការបង្ក្រាបទីតាំងស្តុកទុក និងចែកចាយផលិតផលស៊ីហ្សា និងបារីអេទ្បិចត្រូនិចខុសច្បាប់ (SISHA , E-Cigarette ឬ Vape) ជាច្រើនប្រភេទ ចំនួន៩ករណី នៅតាមបណ្តារាជធានី-ខេត្ត សរុបចំនួនជិត ៥តោន ។
គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ( គ .ប . ផ.ក ) សូមជម្រាបជូនដល់សាធារណជន និងសារព័ត៌មានជាតិ អន្តរជាតិទាំងអស់ មេត្តាជ្រាបថា ក្នុងឆ្នាំ២០២០ នេះ គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) បានបើកប្រតិបត្តិការ ចុះបង្ក្រាប ទីតាំងស្តុកទុក និងចែកចាយផលិតផលស៊ីហ្សា និងបារីអេឡិចត្រូនិចខុសច្បាប់ (SISHA , E-Cigarette y Vape ) ជាច្រើនប្រភេទ ចំនួន ៩ករណី នៅតាមបណ្តារាជធានី-ខេត្ត ។ ដោយការចុះបង្ក្រាបនេះ មានការសម្របសម្រួលពីតំណាង អយ្យការអមសាលាដំបូងរាជធានី-ខេត្ត និងមានការចូលរួមពីសមត្ថកិច្ចជំនាញពាក់ព័ន្ធ និងអាជ្ញាធរមូលដ្ឋាន ដូចមាន លទ្ធផល ៖ រាជធានីភ្នំពេញ ចំនួន៤ទីតាំង ខេត្តបាត់ដំបង ចំនួន១ទីតាំង និងខេត្តបន្ទាយមានជ័យ ចំនួន៤ទីតាំង សរុបរួមទាំងប្រភេទស៊ីហ្សា និងបារីអេឡិចត្រូនិចចម្រុះ ស្មើនឹងចំនួន ជិត៥តោន ក្នុងនោះមាន ៖ ឧបករណ៍ ម៉ាស៊ីនចម្រុះ ចំនួន ៤ , ៦៣៥២គ្រឿង ឧបករណ៍ជួសជុលចំនួន ១០ប្រអប់ ឆ្នាំងសាកថ្មបារីអេឡិចត្រូនិច ចំនួន៤២៤គ្រឿង ទឹកថ្នាំជក់ចំនួន ៩៥,៨៣១ដប និងឧបករណ៍ចម្រុះជាច្រើនប្រភេទទៀត។
បន្ទាប់ពីបានត្រួតពិនិត្យបារីអេឡិចត្រូនិចទាំង ៩ទីតាំង ដែលនាំចូល ស្តុកទុក និងចែកចាយខាងលើ បានល្មើសនឹងការណែនាំរបស់រាជរដ្ឋាភិបាល ក៏ដូចជាសេចក្តីណែនាំ របស់អាជ្ញាធរជាតិប្រយុទ្ធប្រឆាំងគ្រឿងញៀន និងច្បាប់ស្តីពីការត្រួតពិនិត្យផលិតផលថ្នាំជក់ ហើយម្ចាស់ទីតាំងទាំងនោះ ត្រូវបានអប់រំណែនាំ ដោយធ្វើកិច្ចសន្យា បញ្ឈប់អាជីវកម្មបារីអេឡិចត្រូនិច និងទទួលស្គាល់កំហុស។ ចំណែកផលិតផលទាំងអស់នេះ ស្ថាប័នអយ្យការអមសាលាដំបូងរាជធានី -ខេត្ត សម្រេចដកហូត រឹបអូស និងរក្សាទុក នៅគណៈកម្មាធិការ ដើម្បីយកមកធ្វើការកម្ទេចចោល ( កន្លងទៅបានកម្ទេចរួចរាល់ជិត ១តោន និងត្រៀមកម្ទេចនាពេលខាងមុខ ជាង៤តោនទៀត)។
ដោយពិនិត្យស្ថានភាពបច្ចុប្បន្ននេះ បារីអេឡិចត្រូនិច (E-Cigarette ឬ Vape) ត្រូវបានផ្សព្វផ្សាយយ៉ាងទូលំ ទូលាយតាមបណ្តាញសង្គម ជាឧបករណ៍ផ្តាច់បារី ប៉ុន្តែវាពុំដូច្នោះឡើយ ហើយអ្នកប្រើប្រាស់បារីអេឡិចត្រូនិចនេះ ក៏ មានការកើនឡើង និងកំពុងបានចរាចរលក់ចែកចាយនៅលើទីផ្សារកម្ពុជា ដោយរូបភាពលួចលាក់គួរឲ្យគត់សម្គាល់ ។ ទោះបីផលិតផលទាំងនេះ មិនមានសារធាតុញៀន ដែលមានចែងក្នុងតារាងឧបសម្ព័ន្ធ នៃច្បាប់ស្តីពីការត្រួតពិនិត្យ គ្រឿងញៀន ប៉ុន្តែ វាមានផ្ទុកនូវសារធាតុនីកូទីនសំយោគក្នុងកម្រិតខ្ពស់ ដែលបង្កឲ្យមានផលប៉ះពាល់យ៉ាងធ្ងន់ធ្ងរដល់ សុខភាពដូចជា ៖ មហារីកសួត មហារីកក្រពះ មហារីកបំពង់អាហារ ជំងឺផ្លូវដង្ហើម ជំងឺបេះដូង និងតម្រងនោមជាដើម ហើយឧបករណ៍ជក់សម័យថ្មីមួយនេះ អាចនឹងមានគ្រោះថ្នាក់កាន់តែខ្លាំងជាងបារីទៀតប្រសិនបើមានការផលិត ឬ ជនខិលខូចលាយបញ្ចូលនូវថ្នាំសម្រើប ឬគ្រឿងញៀនចូល ។ មហាជនទូទៅយល់ថា SHISHA និង E-Cigarette គឺជាប្រភេទញៀនថ្មីកំពុងបង្កហានិភ័យដល់យុវជនកម្ពុជានាពេលបច្ចុប្បន្ន និងអនាគតជាពិសេសពង្វក់ស្មារតីយុវជនខ្មែរ ឲ្យឈ្លក់វង្វែង ឈានទៅបោះបង់ការសិក្សា ការងារ បង្កបញ្ហាសង្គមផ្សេងទៀត គួរឲ្យព្រួយបារម្ភទន្ទឹមនេះដែរ គណៈកម្មាធិការ សូមអំពាវនាវដល់សាធារណៈជនមេត្តាចូលរួម និងសហការផ្តល់ព័ត៌មាន អំពីទីតាំង ឬជនដែលផលិត និងទីតាំងស្តុកទុក ចែកចាយផលិតផលក្លែងក្លាយ ខុសច្បាប់ ដែលធ្វើឲ្យប៉ះពាល់យ៉ាង ធ្ងន់ធ្ងរដល់សុខភាព និងសុវត្តិភាពសង្គម ដោយទំនាក់ទំនងផ្តល់ព័ត៌មានតាមរយៈលេខទូរស័ព្ទ ០៨១ ៩៩៩ ៨០៨ ឬ បណ្តាញសង្គមហ្វេសប៊ុក (FACEBOOK PAGE) ” គណៈកម្មាធិការប្រយុទ្ធប្រឆាំងផលិតផលក្លែងក្លាយ-Counter Counterfeit Committee។
រាល់ព័ត៌មាន របស់សាធារណៈជន ដែលរាយការណ៍មកគណៈកម្មាធិការ គឺនឹងត្រូវបានរក្សាការសម្ងាត់ និង តាមសំណូមពរ របស់សាមីខ្លួន ៕រក្សាសិទ្ធិដោយ៖បញ្ញាស័ក្តិ
