ភ្នំពេញ៖ បើទោះបីជាមានមានការរាតត្បាតពីជំងឺឆ្លងកូវីដ-១៩ ប៉ុន្តែបរិមាណនៃការនាំចេញជ័រកៅស៊ូស្ងួតរបស់កម្ពុជា កើនទាំងបរិមាណ និងតម្លៃ ដើម្បីផ្គត់ផ្គង់ដល់ខ្សែចង្វាក់ផលិតកម្មរបស់ទីផ្សារអន្តរជាតិ។
តួលេខចុងក្រោយ ដែលបង្ហាញដោយអគ្គនាយកដ្ឋានកៅស៊ូ បានឲ្យដឹងថា ក្នុងរយៈពេល ១១ ខែឆ្នាំ២០២០នេះ កម្ពុជាសម្រេចបានការនាំចេញជ័រកៅស៊ូស្ងួតទៅកាន់ទីផ្សារក្រៅប្រទេស ប្រមាណជាង ២៨,៥ ម៉ឺនតោន កើនឡើង ២២% បើប្រៀបធៀបរយៈពេលដូចគ្នានិងឆ្នាំទៅ។
តម្លៃកៅស៊ូជាមធ្យម លក់នៅលើទីផ្សារ ១.៣៤១ ដុល្លារអាមេរិក ក្នុងមួយតោន។ កម្ពុជា អាចបានរកចំណូល បានពីការនាំចេញកៅស៊ូនេះ ក្នុងរយៈពេល ១១ខែ បានប្រមាណ ៣៨៣ លាន ដុល្លារ ដោយបានកើនឡើង ២៣% បើប្រៀបធៀប រយៈពេល ដូចគ្នានឹងឆ្នាំទៅ។
មន្ត្រីអគ្គនាយកដ្ឋានកៅស៊ូនៃក្រសួងកសិកម្ម បានឱ្យដឹងថា ការនាំចេញកៅស៊ូកើនឡើងនេះ គឺដោយសារតែមានការជំរុញពីក្រោយកត្តាសំខាន់ៗមួយចំនួន។ កត្តាដែលធ្វើឲ្យ ការនាំចេញកៅស៊ូ ១១ខែ ឆ្នាំ២០២០នេះ មានការកើនឡើង គឺដោយសារតែ ទិន្នផល មានការកើនឡើង ខណៈ ផ្ទៃដី កៅស៊ូដែលអាច ជៀរជ័របាន មានការកើនឡើងដែរ។ ទន្ទឹមគ្នានេះ កត្តាចម្បងនៃផ្ទុះរាលដាលឆ្លងជាសកលនៃកូវីដ-១៩ ក៏បានជួយធ្វើឲ្យ តម្លៃកៅស៊ូ មានការកើនឡើងផងដែរ។
ឯកឧត្តម ប៉ុល សុផា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកៅស៊ូ បាន លើកឡើងថា« ក្នុងរយៈពេល ពីរខែ ចុងក្រោយនេះ បញ្ហាកូវីដនេះ ធ្វើឲ្យប្រទេសផលិតកៅស៊ូធំៗ ខ្វះកម្លាំងពលកម្ម ធ្វើឲ្យការផ្គត់ផ្គង់ មិនមានការគ្រប់គ្រាន់។ ម្យ៉ាងទៀត ដោយសារចិនសង្គ្រោះកូវីដបាន ក៏ធ្វើឲ្យផលិតកម្មចិន ដំណើរការឡើងវិញ ហើយត្រូវការផលិតផល»។ ឯកឧត្តមរំពឹងថា នៅឆ្នាំ២០២១ខាងមុខនេះ ផលិតផលជ័រកៅស៊ូ នឹងនៅតែបន្ដកើនឡើង។
គួរបញ្ជាក់ថា ទីផ្សារនាំចេញជ័រកៅស៊ូរបស់ប្រទេសកម្ពុជា មានទៅប្រទេសវៀតណាម ម៉ាឡេស៊ី សិង្ហបុរី និងប្រទេសចិនជាដើម។ ដោយក្នុងនោះ ការនាំចេញទៅកាន់ទីផ្សារប្រទេសវៀតណាម មានចំណែក ធំជាងគេ រហូតដល់ប្រមាណពី៦០% ទៅ៧០%ឯណោះ៕
រក្សាសិទ្ធិដោយ៖CEN
