ភ្នំពេញ៖ ក្រសួងយុត្តិធម៌ បានចេញសេចក្តីប្រកាសព័ត៌មាន ជម្រាបជូនដល់សាធារណជនទាំងអស់ ឱ្យបានជ្រាបថា៖ នៅថ្ងៃទី៣០ ខែធ្នូ ឆ្នាំ២០២០ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី ខេត្ត (គ.យ.ក.ស.) បានបើកកិច្ចប្រជុំក្រោមអធិបតីភាព ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធាន គ.យ.ក.ស. ដោយមានការ ចូលរួមពីថ្នាក់ដឹកនាំក្រសួងយុត្តិធម៌, ប្រធានសាលាដំបូង , ព្រះរាជអាជ្ញាអមសាលាដំបូង និងប្រធានលេខាធិការដ្ឋានរដ្ឋបាល សាលាដំបូងពាក់ព័ន្ធមួយចំនួន ដើម្បីពិនិត្យមើលវឌ្ឍនភាព និងលទ្ធផលរយៈពេល ២២២ថ្ងៃ នៃការអនុវត្តយុទ្ធនាការ ដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត។
ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានមានប្រសាសន៍ថា ជាលទ្ធផលក្នុងរយៈពេល២២២ថ្ងៃ នៃការអនុវត្តយុទ្ធនាការនេះ សាលាដំបូង និងអយ្យការអមសាលាដំបូងរាជធានី ខេត្តទូទាំងប្រទេស បានដោះស្រាយសំណុំរឿងព្រហ្មទណ្ឌ ដែលកកស្ទះទាំងដំណាក់កាលអយ្យការ ទាំងដំណាក់កាលស៊ើបសួរ និងទាំងដំណាក់កាលជំនុំជម្រះ មានចំនួនសរុបជាង ៣៥ ១០០ សំណុំរឿង ស្មើនឹង ៨៩ % នៃសំណុំរឿងព្រហ្មទណ្ឌដែលកកស្ទះ (សំណុំរឿងដែលត្រូវបានជំនុំជម្រះរួចមានចំនួនជាង ១២ ២០០ សំណុំរឿង ស្មើនឹង ៩៥ % នៃសំណុំរឿងទាំងអស់ក្នុង ដំណាក់កាលជំនុំជម្រះ)។ បន្ថែមពីនេះ សាលាដំបូងរាជធានី ខេត្តទូទាំងប្រទេស ក៏បានដោះស្រាយសំណុំរឿងព្រហ្មទណ្ឌ ដែលចូលថ្មី ចំនួនជាង ៣៦ ៥០០ សំណុំរឿង ស្មើនឹង ៧៣% នៃសំណុំរឿងចូលថ្មីសរុប។
ជាមួយនឹងលទ្ធផលនេះ គ.យ.ក.ស. ក៏បានប្រកាសអំពីជោគជ័យ នៃការអនុវត្តយុទ្ធនាការដល់សាលាដំបូង និងអយ្យការអមសាលាដំបូងខេត្តចំនួន ១០ បន្ថែមទៀត រួមមាន ខេត្តរតនគិរី ខេត្តមណ្ឌលគិរី, ខេត្តក្រចេះ, ខេត្តកំពង់ចាម, ខេត្តពោធិ៍សាត់ , ខេត្តបាត់ដំបង, ខេត្តប៉ៃលិន, ខេត្តឧត្តរមានជ័យ, ខេត្តកំពង់ស្ពឺ និងខេត្តតាកែវ។
គិតមកដល់បច្ចុប្បន្ននេះ សាលាដំបូង និងអយ្យការអមសាលាដំបូងខេត្តសរុប ចំនួន ១៥ ហើយក្នុងចំណោមសាលាដំបូង និងអយ្យការអមសាលាដំបូងរាជធានី ខេត្តចំនួន ២៤ បានប្រកាសបញ្ចប់ដោយជោគជ័យ នៃការអនុវត្តយុទ្ធនាការ នៅក្នុងស្ថាប័នរបស់ខ្លួន ដោយបានសម្រេចដោះស្រាយសំណុំរឿងព្រហ្មទណ្ឌ ដែលកកស្ទះ បានយ៉ាងតិច ៩៥% និងសំណុំរឿងដែលចូលថ្មី យ៉ាងតិច ៧០%។ លទ្ធផលលម្អិត និងសង្ខេបនៃការអនុវត្តយុទ្ធនាការ រយៈពេល ២២២ថ្ងៃ មានភ្ជាប់ជាឧបសម្ព័ន្ធនៃសេចក្តីប្រកាសព័ត៌មាននេះ។
តាមការគ្រោងទុក យុទ្ធនាការដោះស្រាយការកកស្ទះ សំណុំរឿងនៅតាមសាលាដំបូងរាជធានី ខេត្ត នឹងត្រូវប្រើរយៈពេល ១ឆ្នាំ ដោយចាប់ផ្តើមគិតពីថ្ងៃប្រកាសបើកយុទ្ធនាការ កាលពីថ្ងៃទី១៨ ខែឧសភា ឆ្នាំ២០២០ និងគ្រោងបញ្ចប់នៅថ្ងៃទី១៧ ខែឧសភា ឆ្នាំ២០២១។ ផ្អែកលើលទ្ធផលដែលសម្រេចបានរយៈពេល ២២២ថ្ងៃនេះ ជាមួយនឹងការខិតខំប្រឹងប្រែងរបស់សាលាដំបូង និងអយ្យការអមសាលាដំបូងរាជធានី ខេត្ត និងដោយមានការគាំទ្រពីគ្រប់តួអង្គពាក់ព័ន្ធទាំងអស់ គ.យ.ក .ស. មានក្តីរំពឹងទុកយ៉ាងមុតមាំថា សាលាដំបូង និងអយ្យការអមសាលាដំបូងទូទាំងប្រទេស នឹងអនុវត្ត យុទ្ធនាការសម្រេចបានលទ្ធផលជោគជ័យ ដោយធ្វើការដោះស្រាយសំណុំរឿងកកស្ទះទាំងអស់ ហើយឈានទៅដល់ការ ប្រកាសបិទបញ្ចប់នៃការអនុវត្តយុទ្ធនាការតាមផែនការដែលបានគ្រោងទុក។ ទន្ទឹមនឹងការសម្តែងនូវអំណរសាទរចំពោះសាលាដំបូង និងអយ្យការអមសាលាដំបូង ដែលត្រូវបានប្រកាសអំពី ជោគជ័យនៃការអនុវត្តយុទ្ធនាកានាពេលនេះ គ.យ.ក.ស . ក៏សូមឆ្លៀតឱកាសនៃកិច្ចប្រជុំនេះ សម្តែងការកោតសរសើរ និងវាយតម្លៃខ្ពស់ ដល់កិច្ចខិតខំប្រឹងប្រែងរបស់ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា មន្ត្រីរាជការនៃអង្គភាពរដ្ឋបាល នៃសាលាដំបូង និងអយ្យការអមសាលាដំបូងទាំងអស់ ព្រមទាំងក្រុមការងារនៃ គ.យ.ក.ស. ក៏ដូចជាស្ថាប័នពាក់ព័ន្ធ ដែលបានចូលរួមយ៉ាងសកម្មប្រកបដោយឆន្ទៈ និងស្មារតីទទួលខុសត្រូវខ្ពស់ ក្នុងការជំរុញការអនុវត្តយុទ្ធនាការដោះស្រាយការ កកស្ទះសំណុំរឿងនៅតាមសាលាដំបូងរាជធានី ខេត្ត ឱ្យសម្រេចបាននូវសមិទ្ធផលមួយល្អប្រសើរគួរជាទីមោទក ប្រកបដោយគុណភាព និងប្រសិទ្ធភាព ធានាបាននូវការអនុវត្តយ៉ាងត្រឹមត្រូវ នូវអភិក្រមការងារក្នុងយុទ្ធនាការគឺ “លឿន ត្រឹមត្រូវ យុត្តិធម៌ និងមិនពុករលួយ ដើម្បីជាប្រយោជន៍ដល់ប្រជាពលរដ្ឋ ក៏ដូចជាវិស័យយុត្តិធម៌ផងដែរ។
នៅថ្ងៃទី៣០ ខែធ្នូ ឆ្នាំ២០២០ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី ខេត្ត (គ.យ.ក.ស.) បានចេញរបាយការណ៍ស្តីពីលទ្ធផលរយៈពេល ២២២ថ្ងៃ ។ ក្រសួងយុត្តិធម៌ លេខាធិការដ្ឋាន គ.ម.ក.ស. នៃការអនុវត្តយុទ្ធនាការដោះស្រាយ ការកកស្ទះសំណុំរឿង នៅតាមសាលាដំបូងរាជធានី ខេត្ត (ថ្ងៃទី១៨ ខែឧសភា ដល់ ថ្ងៃទី២៥ ខែធ្នូ ឆ្នាំ២០២០) គឺកាលពីថ្ងៃទី១៨ ខែឧសភា ឆ្នាំ២០២០ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធាន គ.យ.ក.ស . បានប្រកាសបើកយុទ្ធនាការដោះស្រាយ ការកកស្ទះសំណុំរឿងនៅតាមសាលាដំបូងរាជធានី ខេត្ត ដោយមានក្រុម ការងារចំនួន ៤ និងលេខាធិការដ្ឋានជាសេនាធិការ ។ ក្រុមការងារទាំងអស់បានចាប់ផ្តើមអនុវត្តយុទ្ធនាការនេះជាបន្ត បន្ទាប់តាមតំបន់ទទួលខុសត្រូវនៅសាលាដំបូងទូទាំងប្រទេស។ ក្នុងស្មារតី និងឆន្ទៈប្រកបដោយការទទួលខុសត្រូវ របស់ខ្លួន ក្រុមការងារទាំង៤ នៃ គ.យ.ក.ស. ដោយមានការគាំទ្របច្ចេកទេស រដ្ឋបាល និងហិរញ្ញវត្ថុរបស់លេខាធិការដ្ឋាន ក្រុមការងារនីមួយៗ បានរៀបចំបែងចែកតួនាទី ភារកិច្ច កម្មវិធីការងារ និងផែនការសកម្មភាពរបស់ខ្លួន ព្រមទាំងបាន អនុវត្តយុទ្ធនាការជាបន្តបន្ទាប់ គិតមកដល់ថ្ងៃទី២៥ ខែធ្នូ ឆ្នាំ២០២០នេះ គឺជាថ្ងៃទី២២២ នៃការអនុវត្តយុទ្ធនាការ ដោះស្រាយការកកស្ទះសំណុំរឿង នៅតាមសាលាដំបូងរាជធានី ខេត្ត ដោយទទួលលទ្ធផលជាផ្លែផ្កា និងសមិទ្ធផល ការងារជាច្រើន ដែលមានខ្លឹមសារដូចខាងក្រោម។
សមិទ្ធផលដែលសម្រេចបានក្នុងរយៈពេល ២២២ថ្ងៃនៃយុទ្ធនាការ គឺយោងតាមលក្ខខណ្ឌដែលបានកំណត់ដោយ គ.យ.ក.ស. ការប្រកាសអំពីជោគជ័យនៃយុទ្ធនាការនៅតាមសាលាដំបូង និងអយ្យការអមសាលាដំបូងនីមួយៗ ធ្វើឡើងដោយឈរលើមូលដ្ឋាន នៃចំណាត់ការដោះស្រាយសំណុំរឿងចាស់ឱ្យបានយ៉ាងតិចចំនួន ៩៥% និងសំណុំរឿងថ្មីចំនួន ៧០% នៃសំណុំរឿងទាំង ៣ដំណាក់កាលបញ្ចូលគ្នា (ដំណាក់កាលអយ្យការ ដំណាក់កាលស៊ើបសួរ និងដំណាក់កាលជំនុំជម្រះ)។
ដោយផ្អែកតាមទិន្នន័យសំណុំរឿង ដែលបានបូកសរុបទូទាំងប្រទេស នៅក្នុងដំណាក់កាលទាំង៣ សម្រាប់ រយៈពេល ២២២ថ្ងៃ នៃយុទ្ធនាការ យើងអាចកត់សម្គាល់ឃើញថា សាលាដំបូង និងអយ្យការអមសាលាដំបូងខេត្ត ចំនួន ៥ ដែលបានប្រកាសជោគជ័យរួចរាល់ ក្នុងរយៈពេល ១៥០ថ្ងៃនៃយុទ្ធនាការគឺ ខេត្តសៀមរាប ខេត្តកោះកុង ខេត្តកំពត ខេត្តបន្ទាយមានជ័យ និងខេត្តត្បូងឃ្មុំ ។ គិតត្រឹមរយៈពេល២២២ថ្ងៃ នៃយុទ្ធនាការ មានសាលាដំបូង និងអយ្យការអមសាលាដំបូងខេត្តចំនួន ១០ បន្ថែមទៀតដែលត្រូវបានប្រកាសជោគជ័យនៃយុទ្ធនាការ រួមមាន ខេត្តបាត់ដំបង ខេត្តមណ្ឌលគិរី ខេត្តក្រចេះ ខេត្តរតនគិរី ខេត្តពោធិ៍សាត់ ខេត្តតាកែវ ខេត្តកំពង់ស្ពឺ ខេត្តកំពង់ចាម ខេត្តប៉ៃលិន និងខេត្តឧត្តរមានជ័យ៕ រក្សាសិទ្ធិដោយ៖បញ្ញាស័ក្តិ
)