ភ្នំពេញ៖ បើតាមការផ្សាយព័ត៌មានរបស់សហភាពអឺរ៉ុប នៅថ្ងៃទី៣១ ខែធ្នូ ឆ្នាំ២០២០នេះ បានឲ្យដឹងថា តំណាងរាជរដ្ឋាភិបាលកម្ពុជា ធនាគារអភិវឌ្ឍន៍អាល្លឺម៉ង់ (KfW) ទីភ្នាក់ងារអភិវឌ្ឍន៍បារាំង (AFD) និង សហភាពអឺរ៉ុប បានចុះហត្ថលេខាលើកិច្ចព្រមព្រៀង ហិរញ្ញប្បទានសម្រាប់គម្រោង អភិវឌ្ឍហេដ្ឋារចនាសម្ព័ន្ធជនបទនៅកម្ពុជា (RID4CAM) ដែលគម្រោងនេះមានគោលដៅអភិវឌ្ឍហេដ្ឋារចនាសម្ព័ន្ធនៅតំបន់ជនបទទំនាបកណ្តាលនៃប្រទេសកម្ពុជា។
RID4CAM មានគោលដៅផុ្តល់ហិរញ្ញប្បទានដើម្បីអភិវឌ្ឍបណ្តាញផ្លូវថ្នល់ក្នុងខេត្តមួយចំនួន នៅតំបន់ទំនាបកណ្តាលនៃប្រទេស ដែលមានចំនួនប្រជាជនច្រើន និងងាយរងគ្រោះបំផុតដោយសារផលប៉ះពាល់ នៃការប្រែប្រួលអាកាសធាតុ និងការកសាងបន្ថែមនូវហេដ្ឋារចនាសម្ព័ន្ធក្នុងវិស័យទឹកស្អាត និងអនាម័យ កសិកម្ម សុខាភិបាល និងអប់រំ។ គម្រោងនេះក៏នឹងពង្រឹងសមត្ថភាពរបស់គ្រប់តួអង្គពាក់ព័ន្ធទាំងអស់ដែរ។
លោកជំទាវ Carmen Moreno ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា បានមានប្រសាសន៍ថា “ខ្ញុំជឿថា គម្រោងក្រុមអឺរ៉ុបថ្មីមួយនេះ ដែលរួមគ្នារវាងអាល្លឺម៉ង់ បារាំង និងសហភាពអឺរ៉ុប នឹងផ្តល់ផលជាវិជ្ជមានដល់ជីវិតប្រជាជនកម្ពុជានៅទីជនបទរាប់ម៉ឺនគ្រួសារ។ ការតភ្ជាប់ដ៏ប្រសើរជាងមុនទៅកាន់ទីផ្សារ និងទទួលបានសេវាកម្មផ្សេងៗ គឺជាគន្លឹះក្នុងការកាត់បន្ថយភាពក្រីក្រ និងភាពមិនស្មើគ្នាក្នុងសេដ្ឋកិច្ច ហើយក៏នឹងបង្កើតឱកាសការងារថ្មីៗតាមបណ្តាលខេត្តផ្សេងៗផងដែរ។ វាពិតជាសំខាន់ណាស់ក្នុងការជួយស្តារឡើងវិញពីវិបត្តិកូវីដ១៩។ លើសពីការស្តារផ្លូវជនបទ យើងនឹងផ្តោតសំខាន់លើដំណើរការប្រព័ន្ធសមស្របដើម្បីថែទាំផ្លូវជនបទទាំងនោះយ៉ាងទៀងទាត់”។
RID4CAM គឺជាហិរញ្ញប្បទានរួមគ្នារវាង ធនាគារអភិវឌ្ឍន៍អាល្លឺម៉ង់ (KfW)តំណាងឱ្យរដ្ឋាភិបាលអាល្លឺម៉ង់ ទីភ្នាក់ងារអភិវឌ្ឍន៍បារាំង (AFD) និងសហភាពអឺរ៉ុប។ ធនាគារអភិវឌ្ឍន៍អាល្លឺម៉ង់ (KfW) ផ្តល់ជាកម្ចី និងជំនួយសរុប ៣៧,១ លានអឺរ៉ូ កម្ចីរបស់ភ្នាក់ងារអភិវឌ្ឍន៍បារាំង (AFD) ៥០លានអឺរ៉ូ និង ជំនួយរបស់សហភាពអឺរ៉ុបចំនួន ៨,៧៣លានអឺរ៉ូ៕ រក្សាសិទ្ធិដោយ៖បញ្ញាស័ក្តិ