ប្រទេសចិននិងអេហ្ស៊ីបបានចុះហត្ថលេខា កាលពីថ្ងៃព្រហស្បតិ៍នូវលិខិតបង្ហាញបំណង សម្រាប់កិច្ចសហប្រតិបត្តិការគ្នាលើវ៉ាក់សាំងកូវីដ១៩ ។
ឯកអគ្គរដ្ឋទូតចិនប្រចាំនៅអេហ្ស៊ីបលោក លីវ លីកាំង (Liao Liqiang) បានចុះហត្ថលេខាលើលិខិតនោះ ក្នុងនាមគណកម្មការសុខភាពជាតិចិនជាមួយលោក មហាម៉ាត់ ហាសានី (Mohamed Hassani) ឧបការីរដ្ឋមន្រ្តីក្រសួងសុខាភិបាលអេហ្ស៊ីបសម្រាប់គំនិតផ្តួចផ្តើមសុខភាពសាធារណៈ។
សេចក្តីថ្លែងការណ៍បាននិយាយថា ពិធីចុះហត្ថលេខានេះ ក៏មានការចូលរួមពីរដ្ឋមន្ត្រីសុខាភិបាលអេហ្ស៊ីបហាឡាហ្សាយ (Hala Zayed )ដែរ។
លោកលីវបានមានប្រសាសន៍ថា ការចុះហត្ថលេខាលើលិខិតនេះនឹងជំរុញយ៉ាងខ្លាំង ដល់កិច្ចសហប្រតិបត្តិការលើការស្រាវជ្រាវការអភិវឌ្ឍការផលិត និងការប្រើប្រាស់វ៉ាក់សាំងការពារវីរុសកូវីដ១៩ រវាងស្ថាប័នពាក់ព័ន្ធនៃប្រទេសទាំងពីរ។
ឯកអគ្គរដ្ឋទូតបាននិយាយថា ប្រទេសចិននិងអេហ្ស៊ីប បានជួយគ្នាទៅវិញទៅមកចំពេលដែល មានការរីករាលដាលនៃរោគរាតត្បាតនេះ។ លោកបានបន្ថែមថាការចុះហត្ថលេខាលើលិខិតនោះ គឺជាតំណាងនៃកិច្ចខិតខំប្រឹងប្រែងរួមគ្នារបស់ប្រទេសចិន និងអេហ្ស៊ីបក្នុងការកសាងសហគមន៍សុខភាពមួយ។
លោកបានសង្កត់ធ្ងន់ថាប្រជាជននៃប្រទេសទាំងអស់ មានសិទ្ធិទទួលបានវ៉ាក់សាំងនិងថ្នាំដោយចង្អុលបង្ហាញថា រដ្ឋាភិបាលចិនយកចិត្តទុកដាក់យ៉ាងខ្លាំង ចំពោះសុវត្ថិភាពនិងប្រសិទ្ធភាពនៃវ៉ាក់សាំង។ លោកលីវបាននិយាយថា“ វ៉ាក់សាំងចិនកំពុងដំណើរការសាកល្បងដំណាក់កាលទី ៣ នៅក្នុងប្រទេសជាច្រើន ហើយពួកគេកំពុងដំណើរការទៅមុខយ៉ាងរលូន។
ប្រទេសចិនបានអនុម័តការប្រើប្រាស់វ៉ាក់សាំងជាបន្ទាន់ នៅក្នុងប្រទេសនេះហើយមិនមានប្រតិកម្មអ្វីធ្ងន់ធ្ងរនោះទេ” ។
លោកឯកអគ្គរដ្ឋទូតបានសង្កត់ធ្ងន់ថា ប្រទេសចិនបានប្តេជ្ញាចិត្តយ៉ាងមុតមាំថា ខ្លួននឹងបម្រើវ៉ាក់សាំងជាផលិតផលសាធារណៈ និងផ្គត់ផ្គង់ដល់ពិភពលោកក្នុងតម្លៃសមរម្យ និងសមហេតុផលដែលរួមចំណែកដល់ការធ្វើឱ្យសម្រេចបាន នូវវ៉ាក់សាំងនិងតម្លៃសមរម្យនៅក្នុងប្រទេសកំពុងអភិវឌ្ឍន៍។
សម្រាប់ផ្នែករបស់លោកស្រី រដ្ឋមន្រ្តីសុខាភិបាលអេហ្ស៊ីប បាននិយាយថាទំនាក់ទំនងអេហ្ស៊ីប-ចិន មានលក្ខណៈរួសរាយរាក់ទាក់ ហើយកិច្ចសហប្រតិបត្តិការ ក្នុងវិស័យសុខាភិបាលត្រូវបានពង្រីកបន្ថែមទៀត។
លោកស្រីបាននិយាយថាប្រទេសចិន បានផ្តល់ការចូលរួមយ៉ាងពេញទំហឹង ចំពោះកិច្ចខិតខំប្រឹងប្រែងរួមគ្នារបស់រដ្ឋាភិបាល និងសហគ្រាសដើម្បីគាំទ្រនិងជួយដល់ប្រទេសអេហ្ស៊ីប ក្នុងអំឡុងពេលប្រយុទ្ធប្រឆាំងនឹងការរាតត្បាតនេះ ហើយប្រទេសអេហ្ស៊ីបបានវាយតម្លៃខ្ពស់ចំពោះបញ្ហានេះ។
លោកស្រីបានមានប្រសាសន៍ថា“ ក្នុងនាមជាប្រទេសមួយដែលមានប្រជាជនច្រើន នៅក្នុងតំបន់អេហ្ស៊ីបមានបំណងប្រាថ្នាយ៉ាងស្មោះ ដើម្បីអនុវត្តកិច្ចសហប្រតិបត្តិការប្រឆាំង នឹងការរីករាលដាលជាមួយប្រទេសចិនរួមទាំងវ៉ាក់សាំងផង” ដោយកត់សម្គាល់ថាអេហ្ស៊ីប ទន្ទឹងរងចាំការគាំទ្រជាបន្តរបស់ចិន។
នៅថ្ងៃទី ១០ ខែធ្នូប្រទេសអេហ្ស៊ីប បានទទួលវ៉ាក់សាំងការពារវីរុសកូវីដ១៩ ពីចិនលើកដំបូង ដើម្បីជួយប្រយុទ្ធប្រឆាំង នឹងការរីករាលដាលនៃជំងឺរាតត្បាតនេះ។ បណ្តុំវ៉ាក់សាំង ដែលបង្កើតដោយក្រុមឱសថជាតិចិនឬ Sinopharm គឺមកពីប្រទេសអារ៉ាប់រួម៕
ប្រភព៖ Xinhua
រក្សាសិទ្ធិដោយ៖CEN
