ភ្នំពេញ៖ រថយន្តព្រូសមួយគ្រឿង បើកបក្នុងល្បឿនលឿន មកបុកនិងទ្រូងពុះចែកផ្លូវ ពេញទំហឹងបណ្តាលឲ្យបាក់អស់មួយកង់។ ចំណែកតៃកុងរថយន្តវិញរត់គេចខ្លួនបាត់ស្រមោល។
ហេតុការណ៍គ្រោះថ្នាក់ចរាចរណ៍នេះដែរ កើតឡើងនៅវេលាម៉ោង ២ និង ៣០នាទីយប់រំលងអធ្រាត្រឈានចូល ថ្ងៃទី៥ ខែមករា ឆ្នាំ ២០២០ ស្ថិតនៅតាមបណ្តោយផ្លូវ សហពន្ធ័រុស្ស៊ីក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ គាត់បានឃើញរថយន្ត ព្រូស មួយគ្រឿងពណ៌ទឹកប្រាក់ ពាក់ផ្លាកលេខ ភ្នំពេញ 2M 81 59 ធ្វើដំណើរតាមបណ្តោយផ្លូវ សហពន្ធ័រុស្ស៊ី ក្នុងទិសដៅពីកើតមកលិចក្នុងល្បឿនលឿន ខណៈមកដល់ចំណុចកើតហេតុ ស្រាប់តែរេចង្កូតជ្រុលទៅបុកទ្រូងពុះចែកផ្លូវ បណ្តាលឲ្យបាក់អស់មួយកង់រួចបម្រុងបន្តបើកទៅមុខ តែដោយសភាពកង់រថយន្តខ្ទេចពីចំហៀងខាងមុខ ក៏ទើរនៅជាប់ត្រឹមនឹង។ ហើយសំណាងល្អ ក្នុងហេតុការណ៍គ្រោះថ្នាក់ចរាចរណ៍នេះ មិនមានប៉ះពារទៅលើនាក់ដទៃនោះទេ រងការខូចខាតតែរថយន្តនិងបាក់ទ្រូងផ្លូវអស់មួយកង់។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងជំនាញចរាចរណ៍ខណ្ឌសែនសុខ ចុះមកដល់ទីតាំងកន្លែងកើតហេតុ
រួចប្រគល់តួនាទីនេះទៅឲ្យខាងចរាចរណ៍ជំនាញក្រុង ចុះមកធ្វើការវាស់វែង និងយករថយន្តស្ទូចមកស្ទូចយករថយន្តបង្កហេតុខាងលើ ទៅរក្សាទុកនៅខាងចរាចរណ៍ក្រុង រង់ចាំដោះស្រាយនៅពេលក្រោយ៕រក្សាសិទ្ធិដោយ៖ សា មេត
