ភ្នំពេញ៖ ផ្សារមូលបត្រកម្ពុជា (ផ.ម.ក.) បានចាប់ផ្តើមថ្ងៃជួញដូរដំបូងក្នុងឆ្នាំថ្មីនេះ(ថ្ងៃទី៤មករាឆ្នាំ២០២០) ជាមួយនឹងទំហំជួញដូរភាគហ៊ុនសរុបយ៉ាងច្រើនគួរឱ្យកត់សម្គាល់ ដែលមានចំនួនរហូតដល់ទៅ ៥៧១,២០លានរៀល។
ក្នុងនោះភាគហ៊ុន អេស៊ីលីដា (ABC) មានចំណែកដល់ទៅ៦៩%។ ផ្ទុយទៅវិញ សន្ទស្សន៍ ផ.ម.ក. បានធ្លាក់ចុះជាង១% មកបិទត្រឹម៦៤០,៦៦ ពិន្ទុ ប៉ុណ្ណោះ។
ការធ្លាក់ចុះជាង៧ពិន្ទុ ក្នុងថ្ងៃនេះ បណ្តាលមកពីការធ្លាក់ចុះនៃថ្លៃភាគហ៊ុន អេស៊ីលីដា (ABC) និង កំពង់ផែស្វយ័តព្រះសីហនុ (PAS) ដែលបានបិទត្រឹម១៦.៨៨០រៀល និង១៤,០០០រៀល។ ស្របពេលជាមួយគ្នានេះ ភាគហ៊ុនបួនទៀត រដ្ឋាករទឹកស្វយ័តក្រុងភ្នំពេញ (PWSA) ហ្គ្រេនធ្វីន (GTI) និងកំពង់ផែស្វយ័តភ្នំពេញ (PPAP) និង ផេសថិក (PEPC) បានបន្តរក្សាថ្លៃថេរដដែលត្រឹម ៦.១០០រៀល ៣.២០០រៀល ១១.៧០០រៀល និង២.៩០០រៀល រៀងគ្នា។ ប៉ុន្តែមានតែភាគហ៊ុន តំបន់សេដ្ឋកិច្ចពិសេសភ្នំពេញ (PPSP) តែមួយគត់ដែលបានកើនដល់ ១.២០០រៀល៕
រក្សាសិទ្ធិដោយ៖CEN