ភ្នំពេញ ៖ នៅព្រឹកថ្ងៃទី៥ ខែមករា ឆ្នាំ២០២១ កម្លាំងនគរបាលក្រសួងមហាផ្ទៃ សហការជាមួយកម្លាំងនគរបាលរាជធានីភ្នំពេញ នគរបាលខណ្ឌពោធិ៍សែនជ័យ នគរបាលខណ្ឌកំបូល និងនគរបាលប៉ុស្តិ៍រដ្ឋបាលកំបូល ក្រោមការសម្របសម្រួលពីលោកគុជ គឹមឡុងព្រះរាជអាជ្ញារងអមសាលាដំបូងរាជធានីភ្នំពេញ បានចុះទៅធ្វើការពិនិត្យនិងស្រាវជ្រាវផ្ទះមួយកន្លែងលេខB9 ផ្លូវបេតុងបុរីទឹម សាខន ស្ថិតនៅក្នុងភូមិតាកេរ សង្កាត់កំបូល ខណ្ឌកំបូល រាជធានីភ្នំពេញដែលជាកម្មសិទ្ធិរបស់ខ្មាន់កាំភ្លើងដែលបាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ។
នគរបាលខណ្ឌកំបូល បានឲ្យដឹងថា ក្រោយពេលធ្វើការពិនិត្យជាក់ស្តែង គឺផ្ទះរបស់ជនសង្ស័យនេះ បានចាក់សោរទុកចោលគ្មានមនុស្សនៅឡើយ ហើយក៏ឆែកមិនឃើញអ្វីដែរ ទើបពេលនោះគណៈកម្មការចម្រុះ បានសម្រេចឃ្លុំបេចាក់សោផ្ទះទុក រួចប្រគល់ទៅឲ្យអាជ្ញាធរនិងសមត្ថកិច្ចមូលដ្ឋានឃ្លាំមើលបន្តទៀត ។
សមត្ថកិច្ចចម្រុះនៅខេត្តរតនគិរីឯណោះវិញ កំពុងឡោមព័ទ្ធឃាតករ ដែលបាញ់សម្លាប់ នាយរងការិយាល័យព្រហ្មទណ្ឌកម្រិតស្រាលរាជធានីភ្នំពេញ បានរត់គេចខ្លួនមកដល់ ស្រុកកោះញែក ខេត្តមណ្ឌលគិរី។ សមត្ថកិច្ចបានបានដាក់បារ៉ាស់តាមផ្លូវ ដើម្បីស្ទាក់ចាប់ឃាតករ ប៉ុន្តែឃាតករបានបើករថយន្តបុកបារ៉ាសសមត្ថកិច្ច នៅស្រុកកោះញែក បើករត់ប្រមាណ១គីឡូម៉ែត្រ ឈប់ចុះគេចខ្លួន ពួននៅក្នុងព្រៃ ទុកប្រពន្ធនិងកូន នៅក្នុងរថយន្ត។
ប្រភពពីសមត្ថកិច្ចនៅស្រុកលំផាត់បានឲ្យដឹងថា នៅព្រឹកថ្ងៃទី៥ ខែមករា ឆ្នាំ២០២១ ឃាតករបានជិះរថយន្តដឹកដូងមួយគ្រឿង មកចូលស្រុកលំផាត់ តាមផ្លូវលំមួយខ្សែឆ្ពោះស្រុកបរកែវ ប៉ុន្តែឃាតករបានដឹងខ្លួនមុន ហើយបានលោតចុះនៅពាក់កណ្តាលផ្លូវ ត្រង់ចំណុចឃុំសេដា ស្រុកលំផាត់ ខេត្តរតនគិរី។ ប៉ុន្តែឥឡូវសមត្ថកិច្ចកំពុងតាមប្រម៉ាញ់ចាប់ខ្លួនឃាតករ។
ទោះយ៉ាងណា សមត្ថកិច្ចបានឃាត់ខ្លួនស្ត្រីជាប្រពន្ធនិងកូន២នាក់។
បើតាមការផ្សាយព័ត៌មានរបស់ផេកហ្វេសប៊ុក ឈ្មោះ Sou Vendredy នៅថ្ងៃទី ៥ ខែមករា ឆ្នាំ២០២១ បានឲ្យដឹងថា យើងខ្ញុំទាំងគ្នាជានាយទាហាន នាយទាហានរង ពលទាហាន ក្នុងបញ្ជាការដ្ឋានទ័ពពិសេស សុំធ្វើការបដិសេធទាំងស្រុងចំពោះសារព័ត៌មានមួយចំនួន ដែលបានបង្ហោះនៅក្នុងបណ្តាញសង្គម Fb ថាបុគ្គលរូបនេះជាឧត្តមសេនីយ៍ត្រី នៅក្នុងអង្គភាពយើង ។ ហើយពួកយើងខ្ញុំទាំងអស់គ្នា ពុំដែលស្គាល់បុគ្គលដូចរូបនេះទេ ។
ស្នងការនគរបាលរាជធានីភ្នំពេញ បានចេញព័ត៌មានករណីបាញ់សម្លាប់លោកវរសេនីយ៍ទោ រ៉េត ស៊ីណែត ក្នុងករណីជម្លោះគ្រោះថ្នាក់ចរាចរណ៍ កាលពីរំលងអធ្រាត្រថ្ងៃទី៣០ ខែធ្នូ ឆ្នាំ២០២០។ ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ លោកឧត្តមសេនីយ៍ទោ សុង លី ស្នងការរងទទួលផែនការងារព្រហ្មទណ្ឌ បានដឹកនាំបញ្ជាកម្លាំងសហការជាមួយនាយកដ្ឋានព្រហ្មទណ្ឌក្រសួងមហាផ្ទៃ ដើម្បីធ្វើការស្រាវជ្រាវ និងតាមចាប់ខ្លួន ឃាតករ និងបក្សពួក ដែលបានបាញ់សម្លាប់លោកវរសេនីយ៍ទោ រ៉េត ស៊ីណែត នាយរងការិយាល័យព្រហ្មទណ្ឌកម្រិតស្រាល កាលពីរំលងអធ្រាត្រចូលថ្ងៃទី៣០ ខែធ្នូ ឆ្នាំ២០២០ ក្នុងករណីជម្លោះគ្រោះថ្នាក់ចរាចរណ៍ នៅតាមបណ្តោយមហាវិថីសហព័ន្ធរុស្ស៊ី ខណ្ឌពោធិ៍សែនជ័យ ។
បន្ទាប់ពីជំនាញធ្វើការសហការស្រាវជ្រាវ បានធ្វើការកំណត់មុខសញ្ញា និងបានធ្វើការឃាត់ខ្លួនបានអ្នកបើកបររថយន្តម្នាក់ឈ្មោះ កែ ចាន់មាន កាលពីថ្ងៃទី៣ ខែមករា ឆ្នាំ២០២០ នៅសង្កាត់ទួលតាឯក ក្រុងបាត់ដំបង ខេត្តបាត់ដំបង ។
រហូតមកដល់ពេលនេះ សមត្ថកិច្ចជំនាញបានកំពុងតែធ្វើការសហការគ្នាក្នុងការតាមចាប់ខ្លួនឃាតករ ដើម្បីយកមកផ្តន្ទាទោសតាមច្បាប់ ៕រក្សាសិទ្ធិដោយ៖បញ្ញាស័ក្តិ