ភ្នំពេញ៖ក្រសួងសុខាភិបាលចេញសេចក្តីជូនព័ត៌មានការហាមឃាត់គណនីបណ្តាញសង្គមហ្វេសប៊ុកឈ្មោះ Manwell កំពុងផ្សព្វផ្សាយលក់ផលិតផល គ្រឿងសម្អាងគ្មានប្រវេទន៍ និងគ្មានការទទួលស្គាល់ពីក្រសួងសុខាភិបាល។
ក្រសួងសុខាភិបាល សូមជូនព័ត៌មានដល់សាធារណជន ទាំងអស់ឱ្យបានជ្រាបថា៖ មានគណនី ហ្វេសប៊ុកឈ្មោះ Manwell កំពុង ផ្សព្វផ្សាយលក់ផលិតផលគ្រឿងសម្អាងមួយចំនួនគ្មានលេខប្រវេទន៍ ពីក្រសួងសុខាភិបាលគិតត្រឹមថ្ងៃទី ៣០ ខែធ្នូ ឆ្នាំ២០២០ ។
អនុលោមតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ ស្តីពីការគ្រប់គ្រង ឱសថ តម្រូវឱ្យរាល់ការចរាចរឱសថ ផលិតផលបំប៉នសុខភាព និងគ្រឿងសម្អាងគ្រប់ប្រភេទក្នុងព្រះរាជាណាចក្រកម្ពុជាត្រូវមានលេខទិដ្ឋាការ ឬបញ្ចិកា ឬប្រវេទន៍ពីក្រសួងសុខាភិបាល ហើយរាល់ការ ផ្សព្វផ្សាយផលិតផលទាំងនេះត្រូវមានការអនុញ្ញាតពីក្រសួងសុខាភិបាល ។
ដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាពអ្នកប្រើប្រាស់ទៀតនោះ ក្រសួងសុខាភិបាលសូមជូនព័ត៌មានដល់បងប្អូនប្រជាពលរដ្ឋទាំងអស់ ត្រូវបញ្ឈប់ការប្រើប្រាស់ផលិតផលគ្រឿងសម្អាងគ្មានប្រវេទន៍ពីក្រសួងសុខាភិបាល ដែលកំពុងផ្សព្វផ្សាយលក់តាមគណនីហ្វេសប៊ុកឈ្មោះ Manwell និងគណនី ដទៃទៀតពីព្រោះផលិតផលទាំងនេះ ពុំអាចធានាបាននូវប្រសិទ្ធភាព គុណភាព និងសុវត្ថិភាពបានឡើយ។ ក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ ចំពោះម្ចាស់គណនីហ្វេសប៊ុកឈ្មោះ Manwell ដែលកំពុងផ្សព្វផ្សាយលក់ផលិតផលគ្រឿងសម្អាងគ្មានប្រវេទន៍ ពីក្រសួងសុខាភិបាលទៅតាម ច្បាប់ស្តីពីច្បាប់វិសោធនកម្មច្បាប់ ស្តីពីការគ្រប់គ្រងឱសថជាធរមាន ៕រក្សាសិទ្ធិដោយ៖បញ្ញាស័ក្តិ
