ភ្នំពេញ ៖ សាកលវិទ្យាល័យភូមិន្ទភ្នំពេញ (សភភព) បានធ្វើកិច្ចសហប្រតិបត្តិការជាមួយ DMG MORI ក្នុងការបើក«វគ្គសិក្សាស្តីពីសង្វាក់ផលិតកម្មបែបឌីជីថលសម្រាប់ឧស្សាហកម្ម៤.០ តាមអនឡាញ» ដែលនឹងប្រព្រឹត្តទៅនៅខែកុម្ភៈនេះ។
ឧស្សាហកម្ម ៤.០ គឺជាកូនសោរដែលអនុញ្ញាតឱ្យប្រទេសកម្ពុជាសម្រេចគោលដៅរយៈពេលវែងរបស់ខ្លួនដើម្បីក្លាយជាប្រទេសមានប្រាក់ចំណូលមធ្យមកម្រិតខ្ពស់ និងប្រទេសអភិវឌ្ឍន៍។ និន្នាការសំខាន់មួយនៃឧស្សាហកម្ម ៤.០ គឺស្វ័យប្រវត្តិកម្មនៃការផលិតនិងការអនុវត្តឧស្សាហកម្ម ពីបែបប្រពៃណី ទៅជាស្វ័យប្រវត្តិ ជំនួសឱ្យដំណើរការផលិតបែបប្រពៃណីដែលកម្លាំងពលកម្មរបស់មនុស្សត្រូវបានប្រើជាចម្បង ការផលិតបែបឌីជីថលថ្មីនឹងត្រូវបានគាំទ្រដោយកុំព្យូទ័រ និងគ្រឿងយន្តរ៉ូបូត។
ក្នុងនាមជាសាកលវិទ្យាល័យឈានមុខគេនៅកម្ពុជា សាកលវិទ្យាល័យភូមិន្ទភ្នំពេញបានសំរេចចិត្តបោះជំហានដំបូងដើម្បីសម្រេចឱ្យបាននូវចក្ខុវិស័យនេះ ដោយប្រើប្រាស់ធនធានដ៏ទូលំទូលាយ និងពហុជំនាញដ៏សម្បូរបែបរបស់ ខ្លួន។
ដើម្បីសំរេចគោលដៅនេះ សភភព បានសហការជាមួយក្រុមហ៊ុន DMG MORI ដែលជាក្រុមហ៊ុនលំដាប់លេខមួយនៅលើពិភពលោកខាងផលិតគ្រឿងម៉ាស៊ីនCNC ដែលជាម៉ាស៊ីនស្វ័យប្រវត្តិដ៏ទំនើបគ្រប់គ្រងដោយកុំព្យូទ័រ សម្រាប់ធ្វើការកាត់ ចោះ និងក្រឡឹង ដើម្បីផលិតជាគ្រឿងបន្លាស់ និងផលិតផលផ្សេងៗ។
យើងបានអនុវត្តគម្រោងនេះ តាមគំរូម៉ូឌែលជប៉ុនដ៏មានកេរ្តិ៍ឈ្មោះសម្រាប់នវានុវត្ត (សាន់ កាន កាកគុ) ឬគំរូម៉ូឌែល Triple Helix នៃការច្នៃប្រឌិត ដែលជម្រុញសហប្រតិបត្តិការត្រីភាគី រវាងសាកលវិទ្យាល័យ ឧស្សាហកម្ម និងរដ្ឋាភិបាល ដើម្បីជំរុញការអភិវឌ្ឍន៍សេដ្ឋកិច្ច និងសង្គម ព្រោះវាគាំទ្រខ្សែសង្វាក់ផលិតកម្មពេញលេញ ចាប់តាំងពីការធ្វើផែនការ រហូតដល់ផលិតផលចុងក្រោយ។ នេះបើយោងតាមលោក បណ្ឌិត ម៉ី កល្យាណ ប្រធានក្រុមប្រឹក្សាភិបាលនៃសាកលវិទ្យាល័យភូមិន្ទភ្នំពេញ។
លោកបណ្ឌិតថា នាបច្ចុប្បន្ននេះ រដ្ឋាភិបាលចំនួន ៣ គឺរដ្ឋាភិបាលនៃប្រទេសកម្ពុជា ជប៉ុន និងអាឡឺម៉ង់កំពុងពិចារណាជួយយើង។ លើសពីនេះទៀត UNDPក៏កំពុងពិចារណាចូលរួមដែរ។ លោកបន្តថាចំពោះវិស័យឧស្សាហកម្មឬផ្នែកឯកជន ក្រុមហ៊ុនធំដែលប្រតិបត្តិការនៅតំបន់សេដ្ឋកិច្ចពិសេសភ្នំពេញចំនួនពីរគឺ Minebea និង Denso កំពុងមានទំនាក់ទំនងជាមួយពួកយើង នាពេលបច្ចុប្បន្ននេះ។ យើងនឹងពង្រីកទៅក្រុមហ៊ុនបច្ចេកវិទ្យាខ្ពស់ផ្សេងទៀតនៅក្នុងប្រទេសកម្ពុជា។
លោកបណ្ឌិតថ្លែងថា៖« ពិភពលោកកំពុងឆ្ពោះទៅរកបដិវត្តឧស្សាហកម្មថ្មីមួយ គឺ ឧស្សាហកម្ម៤.០ ពីព្រោះប្រទេសទាំងអស់នៅលើពិភពលោកជឿថាបដិវត្តនេះនឹងជួយជំរុញកំណើនសេដ្ឋកិច្ចនៃប្រទេសរបស់ពួកគេ។ ដូចបដិវត្តឧស្សាហកម្មមុនៗដែរ ឥទ្ធិពលនៃបដិវត្តនីមួយៗមានវិសាលភាពធំធេងខ្លាំងណាស់លើការអភិវឌ្ឍសេដ្ឋកិច្ច និងសង្គម។»
លោកថា បដិវត្តឧស្សាហកម្មលើកទី៤ នឹងធ្វើឱ្យឧស្សាហកម្ម៣.០បច្ចុប្បន្នភាគច្រើន លែងប្រើកើត ដោយសារវាបាត់បង់សមត្ថភាពប្រកួត ប្រជែង។ លោកបណ្ឌិតបន្តថាទោះជាប្រទេសកម្ពុជានៅឆ្ងាយពីឧស្សាហកម្ម៤.០ក៏ដោយ រដ្ឋាភិបាលនៃព្រះរាជាណាចក្រកម្ពុជាកំពុងក្រសោបយកចក្ខុវិស័យនេះដើម្បីសម្រេចគោលដៅអភិវឌ្ឍឆ្នាំ ២០៣០ និង២០៥០ តាមរយៈការដាក់ចេញនូវគោលនយោបាយ យុទ្ធសាស្ត្រអភិវឌ្ឍន៍ និងកំណែទម្រង់ជាច្រើន ដូចជាគោលនយោបាយអភិវឌ្ឍន៍ឧស្សាហកម្ម គោលនយោបាយពិពិធកម្មសេដ្ឋកិច្ច យុទ្ធសាស្ត្រអប់រំ STEM និង ការលើកកម្ពស់ការស្រាវជ្រាវ ការអភិវឌ្ឍន៍ និងនវានុវត្តន៍។
ចំណែកខាងសាកលវិទ្យាល័យវិញយើងផ្តល់ឱកាសដល់និស្សិតកម្ពុជាទាំងអស់ដែលស្ថិតក្នុងក្រុមចង្កោម(cluster)របស់យើង រួមមានសាកលវិទ្យាល័យភូមិន្ទភ្នំពេញ វិទ្យាស្ថានបច្ចេកវិទ្យាកម្ពុជា និងវិទ្យាស្ថានជាតិពហុបច្ចេកទេសកម្ពុជា។
លោកបណ្ឌិត ម៉ី កល្យាណថា៖ យើងនឹងពង្រីកទៅសាកលវិទ្យាល័យបន្ថែមទៀត ប្រសិនបើមានតម្រូវការ។ បច្ចុប្បន្ន យើងរំពឹងថានិស្សិតបញ្ចប់ការសិក្សារបស់យើងនឹងធ្វើការនៅក្រុមហ៊ុនបច្ចេកវិទ្យាដែលសហការជាមួយយើងបច្ចុប្បន្ននេះ។ នៅពេលអនាគត ពួកគេក៏នឹងដើរតួយ៉ាងសំខាន់ក្នុងការគាំទ្រដល់ឧស្សាហកម្មដទៃទៀតនៅក្នុងប្រទេសដើម្បីផ្លាស់ប្តូរឆ្ពោះទៅរកផលិតកម្មស្វ័យប្រវត្តិឆ្លាតវៃថ្មីនេះ ដែលនឹងធ្វើឱ្យប្រសើរឡើងនូវវិស័យកម្មន្តសាលរបស់ប្រទេស ហើយនៅទីបំផុតលើកកម្ពស់រចនាសម្ព័ន្ធសេដ្ឋកិច្ចរបស់យើងទាំងមូល។»
គួរបញ្ជាក់ថា វគ្គបណ្តុះបណ្តាលនឹងត្រូវធ្វើឡើងជា២ដំណាក់កាលគឺវគ្គទី១ និងវគ្គទី២។ វគ្គទី១ ដែលមានឈ្មោះថា «សង្វាក់ផលិតកម្មបែបឌីជីថលសម្រាប់ឧស្សាហកម្ម ៤.០» នឹងត្រូវបើកដំណើរការតាមប្រព័ន្ធអ៊ីនធឺណេត ចាប់ពីខែកុម្ភៈ ឆ្នាំ ២០២១។ ការបង្រៀនទាំងអស់នឹងត្រូវផ្តល់ដោយផ្ទាល់ពីអ្នកជំនាញមកពីក្រុមហ៊ុនDMG MORI អាល្លឺម៉ង់ដែលមានបទពិសោធន៏ ក្នុងការបណ្តុះបណ្តាលបែបបែបនេះនៅជុំវិញពិភពលោក។ នៅចុងបញ្ចប់នៃវគ្គសិក្សាការប្រឡងនឹងត្រូវរៀបចំឡើង ហើយវិញ្ញាបនបត្រនឹងត្រូវផ្តល់ជូនដល់និស្សិត។ ការទទួលស្គាល់វិញ្ញាបនប័ត្រដោយDMG MORI ត្រូវបានរៀបចំឡើង ដើម្បីធានាគុណភាពកម្មវិធីអប់រំលំដាប់ពិភពលោកដល់និស្សិត និងឧស្សាហកម្មរបស់យើង។
សម្រាប់វគ្គទី២ ការរៀនសូត្រនឹងត្រូវបានធ្វើឡើងជាមួយម៉ាស៊ីនពិតប្រាកដ ដើម្បីឱ្យសិស្សរបស់យើងអាចទទួលបានទាំងចំណេះដឹងទ្រឹស្តី និងការអនុវត្តជាក់ស្តែង ដើម្បីលើកកម្ពស់គុណភាពបន្ថែមមួយកម្រិតទៀត ដោយអនុញ្ញាតមានការបញ្ចូលបញ្ហាឧស្សាហកម្មជាក់ស្តែងនៅក្នុងការបណ្តុះបណ្តាល។ ។ តំណាក់កាលនេះនឹងជួយឱ្យកម្មវិធីសមត្ថភាពក្នុងការចូលរួមជួយដោះស្រាយបញ្ហាឧស្សាហកម្មពិតៗ។
ទោះជាយ៉ាងនេះក្តី លោកបណ្ឌិតកល្យាណថ្លែងបន្តថា៖«ការព្រួយបារម្ភចម្បងរបស់យើងនៅពេលនេះគឺការអនុវត្តជាក់ស្តែងដំណាក់កាលទី ២ ពីព្រោះ RUPP មិនទាន់មានធនធានសម្រាប់សាងសង់ទីកន្លែង ទិញម៉ាស៊ីន និងសម្ភារៈ និងផ្តល់មូលនិធិដល់ប្រតិបត្តិការនេះនៅឡើយទេ។ ក្រុមការងាររបស់យើងកំពុងធ្វើការអំពាវនាវរកការគាំទ្របន្ថែមទៀតនៅពេលនេះ។ ហើយយើងត្រូវការការគាំទ្រពីដៃគូសប្បុរសទាំងអស់សម្រាប់បុព្វហេតុដ៏ថ្លៃថ្នូនេះ។ ភាពជោគជ័យនៃគម្រោងនេះមានសារៈសំខាន់ណាស់សម្រាប់សង្គមកម្ពុជាទាំងមូល ព្រោះវានឹងដើរតួជាគំរូជោគជ័យមួយនៃកិច្ចសហប្រតិបត្តិការរវាងសាកលវិទ្យាល័យ ឧស្សាហកម្ម និងរដ្ឋាភិបាលឆ្ពោះទៅរកឧស្សាហកម្ម ៤.០។៕» រក្សាសិទ្ធដោយ ៖ CEN