ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានចេញសេចក្តីជូនដំណឹង ស្ដីពី វិធានការរារាំងការវាយប្រហារតាមប្រព័ន្ធ WhatsApp ក្រោមទម្រង់ជាការបញ្ជូនលេខកូដ ៦ខ្ទង់តាមរយៈ SMS ដោយចៃដន្យ
សេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍ បានឱ្យដឹងកាលពីម្សិលមិញថា នាពេលថ្មីៗនេះ ចោរបច្ចេកវិទ្យា Hackers បានវាយប្រហារដោយធ្វើការក្លែងបន្លំជាផ្ញើសារតាម WhatsApp ទៅកាន់អ្នកប្រើប្រាស់ (ជនរងគ្រោះ) ដែលមានខ្លឹមសារថា «Sorry ! I send 6digit code by SMS by mistake. Can you transfer it to me? It is Urgent» ហើយខ្លឹមសារនេះក៏អាចផ្ញើទៅកាន់មិត្តភក្តិឬអ្នកដែលយើងស្គាល់ក្នុងគណនី WhatsApp ដែលគេលួចរួចហើយ។
ក្រសួងបញ្ជាក់ថា ក្រោយអ្នកប្រើប្រាស់បញ្ចូលលេខកូដ៦ខ្ទង់ ដែលបានពីក្រុមហ៊ុនWhatsAppនោះ ចោរបច្ចេកវិទ្យា Hackers អាចមានលទ្ធភាព Log ចូលគណនី WhatsApp របស់អ្នកប្រើប្រាស់ ដោយប្រើលេខកូដ ៦ខ្ទង់នោះ និងលេខទូរសព្ទរបស់អ្នកប្រើប្រាស់ដោយជោគជ័យ។
ក្រសួង បានបញ្ជាក់ថា អ្នកប្រើប្រាស់ WhatsApp ទាំងអស់ត្រូវពិនិត្យខ្លឹមសារនិងគណនីរបស់បុគ្គលដែលផ្ញើសារមកឱ្យបានច្បាស់លាស់ និងមិនគួរធ្វើតាមការទាមទាររបស់ក្រុម Hackers ទេ ទើបចៀសវាងជាប់អន្ទាក់របស់ក្រុមទាំងនោះ។
ក្រសួងបានណែនាំថា បើអ្នកប្រើប្រាស់ WhatsApp មានការសង្ស័យនៅពេលមានអ្នកផ្ញើសារសុំលេខកូដ៦ខ្ទង់នោះ គួរតែតេទៅសាកសួរម្ចាស់គណនីដោយផ្ទាល់វិញ។ ប៉ុន្តែបើសិនជាតេទៅ ម្ចាស់គណនីមិនមែនជាម្ចាស់ពិតប្រាកដទេ ម្ចាស់គណនីត្រូវចុចបិទ (Block)។ ក្នុងករណីបាត់បង់គណនី WhatsApp របស់ខ្លួន អ្នកប្រើប្រាស់អាចព្យាយាម Log ចូល WhatsApp របស់ខ្លួនសារជាថ្មីទៀត ដើម្បីទទួលបានការកាន់កាប់មកវិញ។
ក្រសួងរំលឹកថា អ្នកប្រើប្រាស់ទាំងអស់មិនត្រូវផ្ញើលេខកដ៦ខ្ទង់ទៅឱ្យអ្នកដទៃនោះទេ ទោះជាមនុស្សស្គាល់គ្នាឬធ្លាប់ផ្ញើសារ (Chat) ជាមួយគ្នារាល់ថ្ងៃក៏ដោយ ជាពិសេសលេខកូដ៦ខ្ទង់នៃបណ្តាញសង្គម ដូចជា WhatsApp , Telegram, Messenger, Viber, Line ឬកម្មវិធីប្រើប្រាស់សេវាធនាគារតាមទូរសព្ទ ជាដើម៕រក្សាសិទ្ធិដោយ៖បញ្ញាស័ក្តិ
