ភ្នំពេញ ៖ បុរសម្នាក់ជាជាង តបណ្តាញទឹកភ្លើង បានចូលទៅក្នុងដីឡូត៍មួយកន្លែង ដើម្បីតទុយោទឹកក៏បានប្រទះឃើញសពបុរសម្នាក់ បានរាយការណ៍មកប្រាប់មេការរបស់ខ្លួនថា មានសាកសពបុរសម្នាក់នៅក្នុងដីឡូត៍ព្រៃស្បូវ មានសភាពស្វិតសល់តែស្បែកដណ្តប់ឆ្អឹង បង្កឲ្យមានការភ្ញាក់ផ្អើលនៅវេលាម៉ោង១០ព្រឹកថ្ងៃទី៦ មករា ២០២១ នៅចំណុចដីឡូត៍មួយកន្លែងក្នុងតំបន់បឹងកក់ ស្ថិតក្នុងសង្កាត់ស្រះចក ខណ្ឌ ដូនពេញ រាជធានីភ្នំពេញ។
រីឯសពពាក់អាវយឺតពណ៌ប្រផេះ ខោខ្មៅជើងវែងសាច់យឺត ស្បែកជើងស៊កជ័រពណ៌ស ក្បាលទម្ពែក សង្ស័យថាជាជនជាតិចិន វ័យប្រហែលជាង៤០ឆ្នាំ បើយោងតាមការសន្និដ្ឋានរបស់សមត្ថកិច្ចថា សពនេះទំនងជាស្លាប់ប្រហែលជិតមួយខែមកហើយ ។
បើតាមសាក្សីដែលចូលទៅឃើញសពនោះ មានមុខរបរជាងទឹកភ្លើងម្នាក់ មានឈ្មោះ ភិន សុភ័ក្ត្រ អាយុ២៤ឆ្នាំ លោកបានបញ្ជាក់ឲ្យដឹងថា មុនពេលកើតហេតុ មេរបស់គាត់បានប្រើឲ្យគាត់ ចូលទៅខាងក្នុងដីឡូត៍នោះ ទើបបុរសជាជាងទឹកភ្លើង បានប្រទះឃើញសពបានរាយការណ៍ប្រាប់ទៅមេការគាត់ និងរាយការណ៍បន្តប្រាប់សមត្ថកិច្ចមូលដ្ឋាន ឲ្យចុះមកត្រួតពិនិត្យមើលនៅកន្លែងហេតុ ។
បច្ចុប្បន្នទីតាំងកើតហេតុ ត្រូវបានកម្លាំងសមត្ថកិច្ចចងខ្សែហ៊ុមព័ទ្ធ និងទាក់ទងទៅជំនាញកោសល្យវិច័យ ដើម្បីត្រួតពិនិត្យមើល៕ រក្សាសិទ្ធិដោយ៖ហេងវុត្ថា និងពន្លឺ