នេះជារឿងដ៏ភ្ញាក់ផ្អើល និងនឹកស្មានមិនដល់ ខណៈដែលបានដឹងថា ជនសង្ស័យជាឃាតករបាញ់សម្លាប់នាយរងការិយាល័យព្រហ្មទណ្ឌកម្រិតស្រាលរាជធានីភ្នំពេញ តាមពិតជាគឺជាបុគ្គលដ៏សាហាវម្នាក់ ដែលធ្លាប់ប្រព្រឹត្តបទឧក្រិដ្ឋកាលពីពេលកន្លងទៅ និងក៏ធ្លាប់ជាប់ពន្ធនាគារផងដែរ។
ជនសង្ស័យជាឃាតកររូបនេះ ដែលសមត្ថកិច្ចកំពុងតាមប្រមាញ់នៅក្នុងទឹកដីខេត្តស្ទឹងត្រែង និងខេត្តរតនគីរី ត្រូវបានដឹងថា មានឈ្មោះ អ៊ា ណារ៉េន ហៅ រិន ផាន់ អាយុ ៣៨ ឆ្នាំ ជាអតីតទាហាន កុម្ម៉ង់ដូ ស្នាក់នៅ ផ្ទះលេខ ៥៨ អឺ១ ផ្លូវ លេខ១១០ ភូមិ ១៦ សង្កាត់ផ្សា រកណ្ដាល ១ ខណ្ឌដូនពេញ។
យោងតាមប្រភពព័ត៌មានបានឲ្យដឹងថា កាលពីដើមឆ្នាំ២០០៣ ឈ្មោះ អ៊ា ណារ៉េន និងបក្ខពួករបស់ខ្លួន ធ្លាប់ធ្វើ សកម្មភាពប្លន់បាញ់សម្លាប់លោក ឱម រដ្ឋសាឌី ទីប្រឹក្សាសម្ដេចក្រុមព្រះ ប្លន់យកទូរស័ព្ទដៃ ណូគា ៩២០០ នៅ ចំណុចជិតផ្សារកាប់គោ សង្កាត់ទន្លេ បាសាក់ ខណ្ឌចំការមន។
ប្រភពបន្តថា ក្រោយធ្វើ សកម្មភាពប្លន់បាញ់សម្លាប់លោក ឱម រដ្ឋសាឌី កម្លាំងជំនាញការិយាល័យប្រឆាំងភេរវកម្ម នៃ ស្នងការដ្ឋាននគរបាលរាជធានី ក៏បានបើកការស្រាវជ្រាវ និងឈានចាប់ឃាត់ខ្លួន អ៊ា ណារ៉េន និងបក្ខពួក យកផ្តន្ទាទោសដាក់ពន្ធនាគារ។ ហើយនៅ ឆ្នាំ២០១៨ ឈ្មោះ អ៊ា ណារ៉េន ក៏បានចេញពីពន្ធនាគារមកវិញ និងមានសេរីភាពមកទល់សព្វថ្ងៃ។
តែយ៉ាងណា ដោយសារតែមិនចោលសារជាតិរបស់ខ្លួន ជនសង្ស័យជាឃាតករដៃឆៅរូបនេះ បានបន្តប្រព្រឹត្តបទឧក្រិដ្ឋនេះដដែល គឺយប់ថ្ងៃទី២៩ ខែធ្នូ ឆ្នាំ២០២០ ជនរូបនេះបានបាញ់សម្លាប់នាយរងការិយាល័យ នគរបាលព្រហ្មទណ្ឌកម្រិតស្រាល នៃ ស្នងការដ្ឋាននគរបាលរាជធានីភ្នំពេញ នៅនៅមុខអាកាសយានដ្ឋានអន្តរជាតិភ្នំពេញ ដោយខឹងជនរងគ្រោះជេរប្រមាថ និងយកកាំភ្លើងភ្ជង់ មកលើតៃកុងឡានរបស់ខ្លួន ក្នុងទំនាស់ពាក្យសម្តីរឿងគ្រោះថ្នាក់ចរាចរណ៍បន្តិចបន្តួច។
មកទល់ពេលនេះ ជនសង្ស័យជាឃាតករដ៏សាហាវខាងលើនេះ ត្រូវបានដឹងថា បានកំពុងបន្តលាក់ខ្លួននៅក្នុងព្រៃ គេចពីការតាមប្រមាញ់របស់សមត្ថកិច្ចដែលកំពុងឡោមព័ទ្ធ។ ហេតុនេះ សូមកម្លាំងសមត្ថកិច្ចដែលកំពុងបំពេញប្រតិបត្តិការនេះ ត្រូវមានការប្រុងប្រយ័ត្នខ្ពស់ ព្រោះថា ជនរូបនេះមានកាំភ្លើងនៅជាប់តាមខ្លួន ដែលអាចទាល់ច្រកនឹងបាញ់តដៃណាមួយជាមួយសមត្ថកិច្ច៕ រក្សាសិទ្ធិដោយ៖ លឹម ហុង