ភ្នំពេញ ÷ លោកឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៥ បានអញ្ជើញជាអធិបតីក្នុងពិធីបិទវគ្គហ្វឹកហ្វឺនយុទ្ធដំណើរទ័ពសហការវាយលុកបាញ់គ្រាប់ពិត អាវុធ AK 47 និង PKM របស់វរសេនាតូចលេខ៥២៣ នៃកងពលតូចថ្មើរជើងលេខ៥២ នៅព្រឹកថ្ងៃទី៦ ខែមករា ឆ្នាំ២០២១ ស្ថិតនៅទីលានបាញ់គ្រាប់ពិតថ្មី ក្នុងភូមិសេកសក ឃុំផ្លូវមាស ស្រុករតនមណ្ឌល ខេត្តបាត់ដំបង ដោយមានការអញ្ជើញចូលរួមពី លោកមេបញ្ជាការ មេបញ្ជាការរង នាយសេនាធិការ នាយសេនាធិការរង នាយទាហាន នាយទាហានរង ពលទាហាន និងអាជ្ញាធរដែនដី ។
តាមរបាយការណ៍របស់គណៈគ្រប់គ្រងវគ្គបានឱ្យដឹងថា វគ្គនេះមានរយ:ពេល២៩ថ្ងៃ មានសិក្ខាកាម ១០៩នាក់ ជាលទ្ធផលទទួលបាននិទ្ទេសល្អ ៣២នាក់ ល្អបង្គួរ ៥៩នាក់ និងមធ្យម ១៨នាក់។
លោកឧត្តមសេនីយ៍ឯក ឯក សំអូន បានថ្លែងឲ្យដឹងថា ក្រៅពីភារកិច្ចប្រយុទ្ធដើម្បីការពារជាតិមាតុភូមិ កងយោធពលខេមរភូមិន្ទ ក្នុងនោះ ភារកិច្ច ហ្វឹកហ្វឺន សិក្សារៀនសូត្រជាអាទិភាព ហើយត្រូវបានថ្នាក់លើយកចិត្តទុកដាក់ហ្វឹកហ្វឺនយុទ្ធដំណើរទ័ពសហការវាយលុកបាញ់គ្រាប់ពិតនេះ ដើម្បីយកអនុវត្តភារកិច្ចស្នូលរបស់ខ្លួនផង និងជាការប្រមូលផ្ដុំកម្លាំងដើម្បីត្រៀមអន្តរាគមន៍ជួយសង្គ្រោះដល់ប្រជាពលរដ្ឋដែលរងគ្រោះមហន្តរាយផ្សេងៗតាមបទបញ្ជារបស់ថ្នាក់លើ។
លោកឧត្តមសេនីយ៍ឯក ឯក សំអូន បានធ្វើការកោតសរសើរដល់អង្គភាពវរសេនាតូចលេខ៥២៣ ដែលបានប្រឹងប្រែងអនុវត្តសម្រេចតាមបទបញ្ជា និងផែនការរបស់ថ្នាក់លើ ហើយសូមសរសើរចំពោះសិក្ខាកាមបានខិតខំហ្វឹកហ្វឺនដល់បញ្ចប់វគ្គនៅថ្ងៃនេះ និងបានខិតខំរៀនសូត្ររហូតទទួលបានលទ្ធផលល្អប្រសើរគួរឲ្យកត់សម្គាល់ និងសូមផ្ដាំផ្ញើដល់កម្លាំងដែលបានធ្វើការហ្វឹកហ្វឺនរៀនសូត្ររួច ត្រូវយកចំណេះដឹងទៅអនុវត្ត និងជួយបង្ហាត់បង្ហាញដល់អ្នកមិនទាន់ចេះ ។
លោកឧត្តមសេនីយ៍ឯក ឯក សំអូន បានណែនាំឲ្យនាយទាហាន និងពលទាហានទាំងអស់ត្រូវបន្តយកចិត្តទុកដាក់អនុវត្តឱ្យបានម៉ឺងម៉ាត់រាល់បទបញ្ជាប្រមុខរាជរដ្ឋាភិបាល និងវិធានរបស់ក្រសួងសុខាភិបាល ស្តីពីការទប់ស្កាត់ជំងឺកូវីដ-១៩ ចូលសហគមន៍ ត្រូវធ្វើការណែនាំអនុវត្តអនាម័យឱ្យបានត្រឹមត្រូវក្នុងការរស់នៅ ទាំងអង្គភាព និងគ្រួសារ។ សូមចៀសឱ្យឆ្ងាយពីការជួញដូរ និងសេពគ្រឿងញៀន។
ក្នុងឱកាសនេះផងដែរ ឯកឧត្តម មេបញ្ជាការក៏បានឧបត្ថម្ភថវិកាលើកទឹកចិត្តដល់សិក្ខាកាមដែលមានស្នាដៃល្អ និងជូនដល់អង្គភាពចំនួន២លានរៀល ៕រក្សាសិទ្ធិដោយ៖CEN