ភ្នំពេញ៖ បុរសបើកម៉ូតូរ៉ឺម៉កដឹកដែកម្នាក់ ដោយសារតែធ្ងន់ពេក បានរេចង្កូតជ្រុលទៅបុកស្ពានបណ្តាលឲ្យជនរងគ្រោះ ធ្លាក់ចូលប្រឡាយទឹក បាក់កស្លាប់ភ្លាមៗនៅនឹងកន្លែងតែម្តង។ ហេតុការណ៍នេះ បានកើតឡើងនៅវេលាម៉ោង១២និង ១០នាទី ថ្ងៃទី១៩ ខែតុលា ឆ្នាំ២០១៧ ស្ថិតក្នុងចំរើនផល សង្កាត់បឹងទំពុន ខណ្ឌមានជ័យ។
សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបើករ៉ឺម៉កម៉ូតូ ចុះចំណោទពីផ្លូវ២៧១ ដោយជាន់ ហ្វ្រាំងមិនជាប់ ក៏ជ្រុលបុកបង្កាន់ដៃស្ពាន បណ្តាលអោយធ្លាក់ទៅក្រោមស្ពាន បាក់កស្លាប់តែម្តង ។សមត្ថកិច្ចបានឲ្យដឹងថា ជនរងគ្រោះ ឈ្មោះ ស្វាយ ចាន់ថន អាយុ ២៥ឆ្នាំ មានស្រុកកំណើតនៅស្រុក រមាសហែក ខេត្តស្វាយរៀង ខណៈនេះ សមត្ថកិច្ចបានស្រង់ យកលើគោក និងកំពុងរកសាច់ញាតិ ៕ ដោយ៖ជាលី
