កណ្តាល៖ យោងតាមសេចក្ដីរាយការណ៍ បានឲ្យដឹងថា មនុស្សប្រុសស្រី២នាក់ ជិះម៉ូតូប្រភេទធុនធំ ដោយជិះឌុបគ្នា បើកបរក្នុងល្បឿនលឿន មិនបានពាក់មួកសុវត្ថិភាព លុះដល់ផ្លូវកោង មិនបន្ថយល្បឿន ក៏ជ្រុលចង្កូតទៅបុកចំបង្គោលភ្លើងបំភ្លឺផ្លូវពេញទំហឹង បណ្ដាលឲ្យស្លាប់ទាំង២នាក់ នៅនឹងកន្លែងតែម្ដង។ ចំណែកម៉ូតូខ្ទាតទៅមុខផ្ទះប្រជាជនខូចខ្ទេចតែម្ដង។
គ្រោះថ្នាក់ចរាចរណ៍ដ៏រន្ធត់នេះបានកើតឡើង កាលពីវេលាម៉ោងជាង១កណ្ដាលយប់រំលងអធ្រាត្រ ឈានចូលថ្ងៃទី៨ ខែមករា ឆ្នាំ២០២១នេះ នៅលើកំណាត់ផ្លូវ២០៦ ស្ថិតក្នុងភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្ដាល ។
អ្នកបើកម៉ូតូឈ្មោះ នៅ រស្មី ភេទប្រុស អាយុ៣០ឆ្នាំ មានទីលំនៅភូមិស្វាយជួរ ឃុំកោះខែល ស្រុកស្អាង ខេត្តកណ្ដាល និងនារីម្នាក់ទៀតរួមដំណើរជិះនៅពីក្រោយ មានឈ្មោះ ប៊ី អាយុ២៧ឆ្នាំ ស្នាក់នៅផ្ទះជួលមួយកន្លែង ក្នុងក្រុងតាខ្មៅ (អ្នកទាំងពីរបានស្លាប់ពេលបញ្ជូនទៅដល់មន្ទីរពេទ្យជ័យជំនះ) ។ អ្នកដែលបានឃើញហេតុការណ៍បាននិយាយរៀបរាប់ថា នៅមុនពេលកើតហេតុ មានម៉ូតូប្រភេទធុនធំ១គ្រឿង ម៉ាក BMW (ដែលគេហៅថា ម៉ូតូកាហ្វេ) ពណ៌ខ្មៅ គ្មានផ្លាកលេខ (មិនពាក់មួកសុវត្ថិភាព និងគ្មានកញ្ចក់មើលក្រោយ) ម៉ូតូបើកក្នុងទិសដៅពីត្បូងទៅជើងក្នុងល្បឿនលឿន មកដល់ចំណុចកើតហេតុខាងលើ នោះដែលជាចំណុចផ្លូវកោង មិនបន្ថយល្បឿន ក៏បានជ្រុលចង្កូតទៅបុកបង្គោលភ្លើងបំភ្លឺផ្លូវពេញទំហឹងតែម្ដង ។
យោងតាមការ សន្ឋិដ្ឋានរបស់សមត្ថកិច្ច មូលហេតុមកពី អ្នកបើកបរម៉ូតូបើកបរលើផ្លូវកោង ក្នុងល្បឿនលឿន ខ្វះការប្រុងប្រយ័ត្ន ។
ក្រោយកើតហេតុ មធ្យោបាយដែលពាក់ព័ន្ធត្រូវបានសមត្ថកិច្ចនគរបាលចរាចរណ៍ក្រុងតាខ្មៅ យកមករក្សាទុក បណ្ដោះ អាសន្ន នៅអធិការដ្ឋាន ក្រុងតាខ្មៅ ៕រក្សាសិទ្ធិដោយ៖បញ្ញាស័ក្តិ
