កំពង់ធំ (សន្ទុក)៖ នារសៀលថ្ងៃទី៧មករា ឆ្នាំ២០២១សមាជិក សមាជិកាក្នុងជួរគណបក្សប្រជាជនស្រុកសន្ទុកបានជួបជុំគ្នាប្រារព្ធពិធី «អបអរសាទរខួបអនុស្សាវរីយ៍លើកទី៤២ ថ្ងៃជ័យជំនះ ៧ មករា ! ជាថ្ងៃដែលប្រទេសកម្ពុជាបានសង្គ្រោះ និងរំដោះចេញផុតពីរបបកម្ពុជាប្រជាធិបតេយ្យ។
ពិធីនេះ«អបអរសាទរខួបអនុស្សាវរីយ៍លើកទី៤២ នៃថ្ងៃជ័យជំនះ ៧ មករា !(៧ មករា ១៩៧៩ – ៧ មករា ២០២១)នេះប្រព្រឹត្តិទៅក្រោមអធីបតីភាពពី ឯកឧត្ដម ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និង ប្រធានក្រុមការងារថ្នាក់ជាតិចុះជួយស្រុកស្ទុក។
នៅក្នុងសារលិខិតរបស់សម្ដេចតេជោហ៊ុនសែន ប្រធានគណបក្សប្រជាជនកម្ពុជាដែលអានជូនអង្គពីធីដោយឯកឧត្ដម ជា ចាន់តូ បានបញ្ជាក់ច្បាស់ថា ក្រោយពីប្រទេសជាតិបានរំដោះចេញផុតពីរបបឃោរ ឃៅព្រៃផ្សៃនៅថ្ងៃទី៧ ខែមករា ឆ្នាំ១៩៧៩ ក្រោមការដឹកនាំរបស់គណបក្សមកប្រជាជនកម្ពុជា ពលរដ្ឋយើងមានសិទ្ធសេរីភាពពេញលេញឡើងវិញ ហើយប្រទេសជាតិទាំងមូលមានសុខសន្តិភាព និងការអភិវឌ្ឍន៍រីកចម្រើនគ្រប់វិស័យក្នុងនោះកម្ពុជាក៏មានកិត្យានុភាព និងមានមុខមាត់សារជាថ្មីលើឆាកអន្តរជាតិផងដែរ។
សារលិខិតក៏បានធ្វើការរំលឹកឲ្យដឹងទៀតថា កាលពី៤២ឆ្នាំមុនប្រជាពលរដ្ឋខ្មែរគ្រប់រូបរួមទាំងកុមារតូចៗ ផងដែរគឺរស់នៅក្រោមការបង្ខិតបង្ខំឲ្យធ្វើការលើសកម្លាំង គ្មានថ្ងៃឈប់សម្រាកទទួលទានអាហារមិនគ្រប់គ្រាន់ គ្មានមន្ទីរពេទ្យព្យាបាល គ្មានសាលារៀនហើយប្រពលរដ្ឋទាំងអស់ គឺរស់នៅគ្មានសិទ្ធិសេរីភាព។
ជាមួយនេះដែរសារលិខិតក៏បានអំពាវនាវសូមឲ្យថ្ងៃជ័យជ័យជំនះ ៧ មករា និងស្មារតីថ្ងៃរំដោះជាតិនេះ ស្ថិតនៅក្នុងក្រអៅបេះដូងពលរដ្ឋគ្រប់រូបៗ និងជានិមិត្តរូបនៃសាមគ្គីជាតិ និងមហាគ្រួសារខ្មែរ ស្ថិតនៅជាអមតៈក្រោមម្លប់សុខសន្តិភាពជានិច្ចនិរន្ត៍។
នៅក្នុងឱកាសនោះដែរសមាជិកសមាជិកា គណបក្សទាំងអស់បានប្តេជ្ញាថានឹងចងចាំ និងដឹងគុណជានិច្ចចំពោះគុណូបក្ការៈដ៏ថ្លៃថ្លាបំផុត នៃមហាជ័យជំនះ ៧ មករា ១៩៧៩ ដែលបានជួយសង្គ្រោះអាយុជីវិត និងសង្គមជាតិយើងឱ្យរស់ឡើងវិញ បានរួចផុតពីរបបប្រល័យពូជសាសន៍ ប៉ុល ពត «បើគ្មានថ្ងៃជ័យជំនះ ៧ មករា ទេយើងក៏មិនមានអ្វីៗ ដូចសព្វថ្ងៃនេះដែរ» ។ ហេតុដូច្នេះ ហើយបានជាប្រជាជនកម្ពុជាគ្រប់រូបៗចាត់ទុកថា «ថ្ងៃជ័យជំនះ ៧ មករា ជាថ្ងៃកំណើតទី២ របស់ខ្លួន»ជានិច្ចគ្មានថ្ងៃបំភ្លេចបានឡើយ៕
រក្សាសិទ្ធិដោយ៖CEN
