ភ្នំពេញ៖ រថយន្តដឹកទឹកកកមួយគ្រឿង រ៉េចង្កូតឡើងលើសួនច្បារពុះចែកទ្រូងផ្លូវ ដោយសារ បើកគេចរថយន្តដែលនៅខាងមុខ កំពុងបត់ឆ្វេងត្រឡប់ក្រោយ ដោយខ្វះការប្រុងប្រយ័ត្ន។
ហេតុការណ៍នេះកើតឡើងកាលពីវេលាម៉ោង ១១ និង៣០ នាទីព្រឹក ថ្ងៃទី៨ ខែមករា ឆ្នាំ២០២០ ស្ថិតតាមបណ្តោយផ្លូវជាតិលេខ៥ ក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។
តាមប្រភពព័ត៌មានពីម្ចាស់រថយន្តដឹកទឹកកក បានប្រាប់ឱ្យដឹងថា មុនពេលកើតហេតុគាត់បានបើករថយន្តមួយគ្រឿងប្រភេទដឹកទឹកកក ពាក់ផ្លាកលេខ ភ្នំពេញ 2AE-6844 បើកបរតាមបណ្តោយផ្លូវជាតិលេខ៥ ទិសដៅពីជើងទៅត្បូង ខណៈពេលមកដល់ចំណុចកើតហតុ ស្រាប់តែមានរថយន្ត មិនចាំម៉ាកមួយគ្រឿងបើកវ៉ារថយន្តរបស់គាត់ខាងស្តាំ ហើយក៏បត់ឆ្វេងត្រឡប់ក្រោយនៅមុខរថយន្តរបស់គាត់ ដែលធ្វើឱ្យគាត់ដែលជាម្ចាស់រថយន្តដឹកទឹកកក ចាប់ហ្វ្រាំងមិនទាន់ក៏បួងចង្កូតគេចរថយន្ត ដែលកំពុងបត់ត្រឡប់ក្រោយនៅខាងមុខ រហូតជ្រុលឡើងលើសួនច្បារពុះចែកទ្រូងផ្លូវ បណ្តាលឱ្យរងការខូចខាត ទាំងរថយន្ត រួមទាំងសួនច្បារ តែមិនបណ្តាលនរណាម្នាក់រងរបួសនៅក្នុងហេតុការណ៍នេះទេ ចំណែករថយន្តដែលបត់ត្រទ្បប់ក្រោយដោយខ្វះការប្រុងប្រយ័ត្ននោះ បានបើកចេញពីកន្លែងកើតហេតុភ្លាមៗតែម្តង។
ក្រោយពេលកើតហេតុកម្លាំងសមត្ថកិច្ចមូលដ្ឋាន រួមកម្លាំងសមត្ថកិច្ចជំនាញ បានចុះមកដល់ចំណុចទីតាំងកើតហេតុ រួចធ្វើការវាស់វែង យករថយន្តទៅរកស្សាទុកនៅការិយាល័យចរាចរណ៍ផ្លូវគោក រងចាំការដោះស្រាយនៅពេលក្រោយ៕ រក្សាសិទ្ធិដោយ៖ ពន្លឺ
